上星期六同我細佬慶生(其實佢係7月中生日架，不過約下約下，搞到8月最後一日先約到)。哈哈，因為我實在太掛住打邊爐，而細佬又無所謂，我就揀咗我愛既新東記，又因為得兩個人好難叫得多嘢食，我就情商朋友P一齊去。
就係因為要打邊爐，我嗰朝就做定一個鐘頭既stepper，再拉筋一個鐘，盡下人事咁。朝早食咗個青蘋果，再間斷食咗啲朱古力呀、薯片呀、立立雜雜咁，臨撘車仲吔咗一粒OK買既牛肉球 (話時話，佢個質地真係幾鬼得意，怪怪地，但我鍾意)，再加半個Bread Talk既辣鬆包。三點幾出到尖沙咀仲要去金巴利街既新世界買咗韓國壽司 (食過其他舖買既，都係lee間最對口味) 同細細個既泡菜煎餅 (唔同我地平時喺餐廳食既，不過我都覺得幾好味，$10咋喎，用來頂住癮都ok架)。跟住仲要去K11間Glacio食個雪糕，揀咗double scoop ( $45)，要雙色葡萄同焦糖餅乾，yummy~~~
食完個雪糕，行咗一陣就去awfully chocolate買咗個cupcake (生日都係要有個蛋糕既)，就去新東記打邊爐。其實我近年打親港式邊爐，都會去lee間喎，咁有咩咁吸引到我呢，咪就係個味菜胡椒豬肚湯同三黃雞囉，堅啱我口味。
今次就叫咗個鴛鴦煱，味菜胡椒豬肚拼四川麻辣，咁因為又叫麻辣既關係，就一定要叫午餐肉 (好好味，我好掛住你呀，餐肉)。其他既仲有：大愛的響鈴、油麥菜(都幾新鮮)、三黃雞半隻(一貫的好味~~~)、鳯城水餃(好食)、蝦滑(好彈牙、味都幾好)、牛頸脊小肥 (中size，lee度叫牛就要睇彩數，今次就不過不失啦~~) ，之後再追加咗黑椒牛丸(普通啦，同出面街買既差唔多，不過細佬想食嘛)同稻庭烏冬(lee個我like，加埋個胡椒豬肚湯，堅係正)，加埋細佬嗰枝可樂，埋單$871，唔平，但啲料又真係幾好味，同我真係好鍾意佢個湯底。
調味車呀~~ 不過其實啲湯夠味同啲火鍋料新鮮，唔需要點太多豉油
左邊係我既(後尾再加咗啲辣椒)，右邊係朋友P既，多咗啲葱~~之後梗係再加豉油啦~~
lee日收吸收既熱量真係差唔多我2日weekday既量喎，驚呀。所以食到好飽嗰一陣，都諗住星期日晏晝就食生果餐，夜晚就veggie salad with parma ham咁啦。但當經過一晚時間消化呢，一起身，我又掛住 pret a manager 既小龍蝦三文治喇喎，咁我就同自己講，半件都唔係好肥啫，lunch 嗰陣食啦，最多朝早打拳加多幾分力啦吓 (hehe，實情係有心無力呀，wakaka)。就係咁，我打完拳，又去咗 pret a manager 食我愛既小龍蝦三文治、朱古力曲奇半塊 (在此鳴謝朋友P同我有肥同當，分咗半塊)、同Cappuccino。食飽，就去咗敗衫，又洗咗千幾蚊，我好似儲緊錢架喎，點解又買咗嘢既呢，殘念~~
好彩，敗完都有去買菜，乖乖的食veggie salad with parma ham做晚餐。嚟緊星期四朝又要上磅啦，可唔可唔好重咗呢~~ (咁如果有輕咗，就堅開心啦，梗係)
沒有留言:
張貼留言