減肥繼續中~~

噚日放工去咗尖沙咀攞衫，上上個星期六買架嘞，買咗4件，都係得2件攞，幾時先攞得齊呀？買咗好想快啲著架嘛，希望快啲有得攞埋嗰2件啦。攞完衫，去買咗兩件印尼點心，就去會合埋朋友P (佢要攞鞋去整)，去食傷心酸辣粉，好辣好味 (不過真係好無益，偶爾食下好嘞)。跟住就趕返屋企買餸同做運動，嗱，我堅乖呀，返到屋企成10點幾，我都堅持做運動呀，搞到點幾鐘先瞓得。所以呢，我今朝就換咗Starbucks送既咖啡做早餐，如果唔係，我實喺公司瞓著囉。

今日晏晝嗰餐有mustard chicken pasta食，我覺得好味喎，不過朋友P就唔多滿意，話會再煮過，咁梗好啦，期待ing。

話說我地拳會個老闆同老闆娘生咗個B呀，咁我地4個拳友就決定夾份送份禮俾佢，拳友E就幫我地買咗份禮，我就負責整咭，不過呢，而家網上搵嗰啲都唔係好靚，咁我就唯有搵朋友P求救啦，佢除咗係意粉達人、行李達人之外，做手工都幾堅下。多謝佢捱義氣，咁忙都抽咗個LUNCH時間幫我整，thx呀!!!

又要停一停~~

話說上星期四有新進展，離目標只剩0.4磅，無奈我既親密朋友又要嚟探我，今星期唯有pass，唔磅啦 (磅嚟咪盞打擊自己)。lee兩日已經覺得自己腫腫地，好攰咁，但我會努力，唔俾自己偷懶既~~

講返上星期既節目先，星期五嗰晚去咗太興食，都好耐無去lu，今次2個人叫咗豆腐青衣腩煲加個叉燒飯餐，有油菜 (當然係全走啦)，餐飲改咗羅宋湯。

叉燒好咸呀，個湯就溫吞吞，一個唔好既開始。好彩個煲幾好味，挽回不少分數。最後食剩咗啲飯同啲枝竹 (話叉燒咸，我地都食晒喎)，都好飽下。雖然飽，但我地都去咗聰嫂買咗個杏汁燉蛋白食，lee個我真係好掛住囉，對上食lee個甜品係9月時爸爸生日個餐食既 (喺大角咀名苑)，完全唔對辦，令我更掛住佢呀。好啦，見減肥減咗咁耐，就俾自己食半個啦，飽住都覺得好好味囉。食飽雖然都夜夜地，但我都有堅持做運動。

星期六，一早食咗啲嘢同做完運動，就出咗尖沙咀試譚仔三哥既新湯底，嗰陣2點左右，full晒，前面有兩個女仔等緊，咁我地跟排啦。之後有兩個sales入嚟企我地後面，但當啲姐姐安排我地前面嗰兩個女仔坐既時候，其中一個sales 就猛話佢地兩位，搞到好似佢地排先咁。咁我咪話我地嚟先架喎，但佢又好嘢喎，完全無視我地架喎。最抵死係個cashier又同佢打招呼，搞到佢以為自己係VIP，唔駛等位咁喎。等咗陣，啲姐姐趕啲客走，張六人枱吉咗5個位出嚟，啲姐姐咪叫我地坐囉，嗰個sales想爬我地頭行過去喎，但sorry囉，我係唔會俾你爬頭既，雖然俾你爬咗頭，我地都有位坐，但條氣唔順囉。嬲完，講返個新湯底，我覺得都幾香口，但唔夠辣囉，暫時既第一位都係麻辣。食飽去咗攞衫，但仲未有囉，失望。跟住又去咗K11食雪糕，又係好好味囉。跟住就去咗配鏡片，行下街咁。因為唔餓既關係，求其去咗美味廚食排骨菜飯同酸辣湯，兩個人share食都食剩...

星期日，打完拳就去參加姪女既2歲生日會，但阿姪女其實唔係好啋我架，少見啩。都係無咩嘢做，食吓嘢，可能都悶悶地，所以都食咗幾多嘢下，有咖喱豬皮牛丸、雞翼、巴東牛肉 (好似阿嫂朋友整既，好好味喎lee個)、拍青瓜、菜心，仲有蛋糕。仲有啲意粉、沙律嗰啲無食。食到好飽吓，飽到頂住。雖然係咁，我地行完街，都有去pret a manager食咗個light dinner。個日真係好飽，夜晚要食太田胃片先瞓得到。其實"悶"真係幾致肥架。

姪女個蛋糕呀，希望姪女健康快樂啦。

食到咁，又係時候還債，所以噚晚係食kiwi同青蘋做dinner。今日晏晝就食自煮既sukiyaki汁炒野菜雞柳，都幾好味喎，不過切菜都用咗好多時間，搞到噚晚唔多夠時間做運動。今晚放工想去攞衫，諗緊今晚食咩好呀，haha~~星期三晚就繼續kiwi同青蘋，因為我星期四有個farewell lunch (好似semi buffet)、星期五晚就辣友打邊爐、星期六晚就係我今年第2個生日飯局 (第1個係上個月既brunch)，中學同學S同我 & 朋友P(佢10月生日既)食韓燒慶祝，之前仲有一個朋友A喺lee個gp既，但佢已經嫁咗去英國lu~~

咁食法，我覺得呢，個形勢又變得有點嚴峻呀，希望我目標可以達到啦~~

無錯，樣好衰，但幾好味架~~

倒數：距離北海道東京食、敗之旅仲有111日

住宿已訂，要諗行程咋~~開心ing~~

減、減、減

我呢，有啲開心呀又，噚日上磅發現我剩返0.4磅就去到我訂既目標啦。4年前，我其實都減到lee個磅數，但身型唔好睇，仲係好多fat。最慘係keep唔到，4年時間，肥返2x磅，縱然唔係我最"輝煌"既時刻，但都堅覺得自己好難睇。好啦，喺6月底既時候痛定思痛：減，減完仲要keep住，真係無咁既時間去再重覆lee個cycle。離我既生日仲有3星期左右，我都唔會偷懶，繼續減，減多2-3磅俾自己有啲buffer都好，因為我既底線係一直keep住我既目標磅數。

減完要keep其實先係最難，我諗住會先減運動量，由而家1星期做6日減到去4日，飲食就會keep住自己煮，少啲出街食，食多咗就要搵啲日子食下生果呀、菜呀咁還債，希望work啦。

好啦，講完啲減肥嘢，講下lee兩日做咗啲咩先：

星期三下晝臨時俾人捉咗出街做嘢，喺街行咗2個幾鐘，都幾攰，真係唔想做運動。返到屋企，食咗我掛住既 tomato & basil 即食麵半個同3隻韓式餃子，經過一輪既內心掙扎，我都係乖乖的做運動。做完運動，我奬咗自己半杯雪糕：

Lee個味第一次食，平時我唔係好鍾意食白色既雪糕，但lee個我又幾鍾意，因為佢有啲脆脆同果仁，又幾好味喎。星期三嗰日做緊$58.9/ 3杯，另外兩杯我就買咗唔同味既。

星期四朝上磅，好開心下。lunch約咗朋友S食飯，因為我屈咗佢買手信俾我，wakaka。又係去食coco curry，又係食返咖喱泡菜豬肉飯 (少飯)、沙律同凍檸茶，仲偷咗朋友S一件吉豬同一啖蛋，我認我係有啲得意忘形，見自己有啲成績，我食晒我碟飯喎，搞到嗰日我個胃都頂住頂住。放工打拳無咩力，我覺得係因為我星期三晚無做美腿摩司按返鬆對腳。打完去食咗個剩四寶，一向都係食剩雲吞既，但又係見有啲成績，就俾自己食下四寶啦，放鬆下。我知，我知，咁既心態好易出事架嘛，所以我會乖返啲，會好好控制，總之有借有還啦。

朋友S俾我既手信，我好鍾意個5枝彩色卷卷，好靚，好開心呀。我試咗條粉紅色，都幾好味，我去到日本都要買返嚟做手信至得。BTW，我知你睇我個BLOG，再多謝你一次先，haha~~

今日既午餐係朋友P主理既 pasta，一如過往的好好味。今次都係用洋葱啦，蕃茄乾煮，但就試咗另一隻pasta，我都幾鍾意lee隻pasta。下次話有得試 mustard chicken pasta 喎，期待ing~~

今晚約咗朋友P去太興食小炒，我都幾個月無係街食小炒，好掛住，但我會乖乖的不會放肆既

仲有，我想學小t咁倒數呀：

距離北海道東京食、敗之旅仲有115日
lee兩日已經訂緊啲酒店，雖然仲有排先飛，但我已好開心啦喂~~~

零食 vs 減肥

上幾次減肥，我都無戒零食，不過就限自己食好少量，忍得好辛苦。今次就唔同，我日日都有食零食，每日少少，我覺得咁好啲喎，因為唔會話忍得太辛苦，跟住就暴食零食。

我上個星期試咗lee 幾隻零食，想介紹下： 

左上嗰包係我個 hair stylist 送既仙貝，佢返日本時買既，其實佢係啲日式豬扒汁味，我好鍾意嗰隻味既，所以我大愛呢。不過最慘就係我上過佢個website，佢得間直營店喺千葉縣，一係就上網訂。其實真係好想下次去日本時買啲返嚟做手信，希望啲手信舖有得賣啦。

右上嗰包係銅鑼灣既 Max Value 買既，佢話係山藥，見咁得意又買嚟試下啦。試咗之後真係筧得好得意喎，佢好抵死咁做返山藥既黏口感，真係唔佩服啲日本零食既創意。

左下嗰包係阿信屋買既，lee啲係啲低卡啲既零食，但我麻麻地啲甜甜地既芝士味，都係鍾意蝦味多啲。

右下嗰支係啫喱梅酒，又係銅鑼灣既 Max Value 買既，lee個大愛呀，因為我係超愛啫喱既，加上梅酒我又大愛，堅正喎。

好啦，介紹完啲零食，又講下減肥啦。經歷咗上週末既放任，我星期一、二既早餐同 lunch都食麥皮同日式薯仔牛肉，晚餐就一晚食 kiwi 同青蘋，另一晚就食 OK既牛肉球同 Kiwi，還下債咁啦。還完債，我今日既早餐同午餐：

Starbucks 送我既 cappuccino做早餐，其實呢，真係幾飽，可能因為我要飲whole milk啦，skimmed milk嗰味我真係接受唔到呀。

lunch 呢，就係我自煮既 Pasta with Arrabiata sauce，無錯，我好大膽咁挑機，哈哈。唔係呀，因為朋友P事忙，而我又要清埋嗰半罐蕃茄同條辣肉腸，所以先硬住頭皮煮啫，好彩個味都OK喎，無失禮 (哈哈，勁開心，啱先俾意粉達人讚好味，wakaka~~) 。今晚好想食即食麵，但聽日上磅喇，點揀好呢？

減肥繼續中？唔覺囉~~

上星期四晚開始，一直都係食、食同埋都係食，有點內疚，但亦有點爽，食嘢真係好開心既。

講返，上星期四晚同拳友預祝生日，打完拳去咗伊呂波食 late dinner，四個人叫咗兩碟雞肝 (lee個好香，好味)、一碟豬肉 (好味)、一碟小牛排 (因為生日既拳友係VIP，lee碟係送既，好似有幾樣嘢揀既，佢揀咗LEE個，都幾好)、一碟牛舌 (好味啦又係)、一個海鮮煎餅 (佢LEE度既煎餅係最啱我地幾個口味，好食過其他韓國餐廳)、泡菜海鮮湯 (好多料，但得海鮮味，泡菜味唔見咗，都係韓嘉嵐好味啲)，同埋一個蔬菜沙律 (LEE個我好鍾意食架，但我唔記得影喎)，今次有個拳友唔舒服，只係叫咗一支Sake開心下就算，都好既，上次飲得太醉嘞......

上星期五要上廣州，晨咁早去到紅磡買車飛，買完去咗星巴克飲杯cappuccino 做早餐，上到廣州都成12點幾，就去食咗個lunch先啦，食泰菜，又係四個人叫咗冬蔭公 (味好，但唔夠熱)、芒果龍脷柳米紙卷 (幾好味)、炒貴刁 (ok好味啦)、蝦醬炒通菜 (香口)同埋菠蘿炒飯 (lee個最唔好食，淡到無味)，有兩個同事叫咗啲特飲，埋單 RMB470，唔平，但起碼無肚痛同味道ok啦。見食咗咁多嘢，夜晚返到屋企又成9點，所以食咗個kiwi同埋梨當晚餐就算啦。

上星期六一早起身食咗半個鳯梨酥做早餐，跟住就還債，做咗鄭多燕同stepper。之後出街敗家去，但上到去未開。唯有lunch先啦，想食"秀"，但未開，咁就去隔離亞之媽，入去無位，個姐姐帶我地去隔離舖 (佢地有兩間)，佢話我地知有lunch menu，入到去，姐姐就走咗，有另外兩個阿姐serve我地，但佢地堅衰囉，唔問都唔俾lunch menu，叫咗個牛肋骨肉飯同埋純豆腐辣湯，味道幾好，但唔鍾意佢地待客既態度囉，唔俾個lunch menu人，想侷人叫 al la carte....

食完之後，敗家去，今次開咗，我揀中咗4件，埋單$3千幾，赤架，但鍾意都無計。之後去咗買韓式sushi。又去咗K11食雪糕，今次係expresso同雙色葡萄，不過唔知啲staff係咪新人，個球細咗好多喎。食咗咁多，點都應該收口啦，哈哈，但完全失控囉我，去咗金華買咗個菠蘿油，兩個人share，菠蘿油呀、菠蘿油，點解你要咁好味先？晚餐就去咗食阿純餃子，今次叫咗香芹豬肉餃 (又係好味) 同埋麻辣雞絲冷麵，上枱見有好多麻醬，就知死，但最慘係佢啲麻醬唔好味架，又肥又唔好味，好唔抵囉 (不過個麵質同雞絲係好味既)，下次我都係會叫返餃子，唔試其他嘢。

到上星期日，早餐係牛油果醬花生醬方包，打完拳去咗UCC食lunch，lee度啲嘢食其實唔係話好食，但我又好鬼鍾意去，我覺得係因為個自助salad bar囉，覺得好開心咁。今次都係食汁煮漢堡扒、salad bar 同 iced coffee (佢杯咖啡又唔係特別出色，但個味好似咖啡糖咁，我有時又會想飲下咁)，好滿足既一餐。晚餐就係veggie salad with parma ham 同埋 brie cheese，叫做乖少少啦。但未完囉，我仲食咗啲mini 鯛魚燒，我每次見佢係sogo擺檔就忍唔住買，好衰。同埋食咗星期六買個件泰式千層糕。

今日我真係要還債嘞，朝早食麥皮同半個鳯梨酥，lunch就係日式薯仔手肉，我覺得今次煮得好好味呀，連朋友P都讚，好開心呀。dinner就食kiwi，而家諗緊撘青蘋定係OK既牛肉球好，因為我好掛住OK既牛肉球呀....

繼續努力減肥呀~~~

唔，我今日有啲啲開心呀，因為呢，我今日上磅既結果係：仲有2.8磅要減，即係話我今個week減咗1.4磅 (6月尾至到而家，總共減咗差唔多20磅嘞)，都叫做有啲成績啦，我要繼續努力先得。

噚日lunch原本想食和民既，點知啱啱full咗，即係有排等啦，咁梗係轉戰第二間，就去咗coco curry (其實我都餓咗lee間嘢好耐lu，難得朋友G話無所謂，你知啦，唔係好多人食日式curry架嘛)。今次我都係叫我既例牌：咖喱泡菜炒豬肉片，少飯、一分辣 (佢一分辣都ok辣架喇)，再加$15，要咗個沙律同凍檸茶。

沙律是我最愛的麻醬、凍檸茶我無落糖漿，味道都ok的~~

大愛，泡菜同咖喱其實好match架，不過食完個口會臭囉，呵呵~~

噚朝早仲食咗半條粢飯做早餐，哈，一係就唔食飯，一係連食兩餐，真係痴痴地。晚餐就唯有乖乖的食我的青蘋同奇異果。食飽就煮埋個炒麵做今日lunch，然後就乖乖的做鄭多燕同埋stepper 囉，做完之後，又奬咗自己半個鳯梨酥同埋啲啲零食。

我煮既懶人午餐，個味好淡呀，但我都落咗幾多汁架嘞 (上邊個支)，下次試下再落多啲囉。lee排煮嘢都有啲失準，但朋友P就越煮越勇喎，其實呢，我都覺得唔係幾好意思囉，希望我下次煮返好啲，唔駛佢"硬食"啦~~

增肥的長週末

今日我好核酸呀，我做完嘢行返公司途中，掛住check whatsapp，個頭撼咗埋塊厚玻璃度  (塊玻璃俾我撼到震晒呀)，痛到我死，仲要俾個男人笑，好彩我仲可以扮無嘢，繼續行，唉，但真係核酸死囉。

好啦，講返啱啱個 long weekend 先。星期五晚，返咗我婆婆度食飯，一嚟想見下婆婆，二嚟呢，就係攞 lee盒嘢嘞： 

我超級迷上"微熱山丘"既鳯梨酥，酸酸地，好鬼好味。我舅父仲買多咗支菠蘿汁俾我，不過未試呀，試咗再話俾大家知好唔好飲啦。

星期六一起身，就食咗1個奇異果同蘋果做早餐，因為要去食 The Market既 brunch，佢都幾巴閉架，要預早兩個月book喎，咁自然有啲期待啦。第一轉就食佢啲starter啦，emm，都幾好味喎，香檳 (任飲)呢，都ok喎。跟住就係泰式沙律、點心同燉湯，個沙律同湯幾好味喎。點知呢，再食就開始唔對路，有啲嘢就味ok，但質感唔得，有啲直情唔好味，朋友P食咗啲海鮮，食到佢吐返出嚟囉，我就唔敢試嘞。甜品就係buffet嚟講，都算ok啦，但又唔會令你有印象囉，剩係記得個榴槤雪糕，係超似凍咗既榴槤，但老實講，我都係鍾意食榴槤，多過榴槤製品囉。$398 plus 10% per pax，可以食得好啲。不過，我好衰架，有時就係鍾意食buffet，每樣都食少少，滿足個量，但我覺得其實buffet真係好浪費，我諗我會戒食lu。嗰晚無再食正餐，剩係食咗啲零食咁啦。又因為太guilty，原定lee日休息既，但都做咗45 mins stepper，幫下手咁啦。

星期日，打完拳，食咗譚仔，因為好想食土匪雞翼，但個味好以唔同咗。食飽仲去咗K11食雪糕，都係咁好味。跟住就去剪頭髮，今次剪得超短，連同行的朋友P都嚇親，好搞笑。我自己幾鍾意，不過唔止一個人話似 monchichi，搞到我有啲怯怯地。晚餐就去咗食阿純餃子，lee間幾好味架，係吊腳啲，但值得試喎。

我自己就唔好出鏡嘞，唔靚吖嘛，哈哈。lee張相係我俾我個 hair stylist 做 sample，剪得都似架，但仲短啲囉，我都覺得有啲激，不過見自己塊面細咗啲，就試一次囉。

餃子係蕃茄蛋餃同茴香豬肉餃，兩款都好味，但個拍青瓜就唔係好得，因為佢唔係拍既，唔吸味囉。

星期一無出街，一起身就即做運動，唔敢怠慢呀。Lunch就清屋企啲糧食，食咗半個韓麵同泡菜餃子，點解啲即食麵要咁好味喎？好肥架嘛，真係衰。喺屋企hea得，少不了食多咗零食，唉……夜晚都叫做肯乖乖地食veggie salad with ham 既，不過加咗半個朱古力蛋糕 (有啲似牛油蛋糕嗰啲)，又係好好味囉。

今日既lunch又係朋友P主理，辣蕃茄辣肉腸炒意粉，用canned tomato、paprika、辣肉腸，係稍為辣咗啲，但個味都好好呀。諗住今晚同聽晚都食生果還債，運動當然唔少得。聽日仲有個lunch 局，唉，星期四磅唔知會點呢，擔心ing……

繼續減肥 - 心態篇

噚日朝早磅完，見仲有4.2磅要減，都有啲frustrated，但都算好快就回復心情。下晝開會時有個break，老闆話請tea，其實好想食toast，但無人share，要咗杯熱檸茶算數，啲老闆問點解唔食，我話我減緊肥，佢地問我減咗幾多同點減，我答得好快：18磅，食健康啲同一個星期做6日運動囉。哈哈，我以前減肥都唔會咁高調，但今次又覺得減肥又唔係醜事，無謂扭扭擰擰啦。

其實今次減肥同以前都有啲唔同，雖然一樣有成績時會開心、平台期會好灰，但唔同既係我鍾意咗自煮同埋做運動。自煮其實都唔算出奇，不過鍾意咗做運動，就無諗過。Even 打泰拳，我雖然打咗3年，但如果得我一個打，我估我真係唔會打到咁耐，係要有啲朋友一齊上堂，之後一齊食飯同埋去玩，先至可以打到咁耐。可能今次跟埋鄭多燕，可以好好鍛鍊到啲肌肉，啲muscle firm咗，個body shape 好睇咗啦，其實我仲有個小小挑戰俾自己，睇下遲啲有無進展，再分享俾大家知呀。希望我對自煮同埋做運動既熱情可以繼續啦，因為減完仲要keep架嘛，堅想今次減完keep得住，因為越大，新陳代謝越慢，真係好難搞。

又講返轉頭，噚晚打完拳去食咗碗剩雲吞同凍檸茶少甜，其實都好夠飽，但見HD出咗隻新味，又好鬼想試，咁就買咗嚟同朋友P share啦。

朱古力雪糕入面有啲 hazelnut brittle (脆脆的，味就有啲似樂家杏仁糖)，我覺得幾好味，但半杯就夠囉，同埋我估好多人會覺得過甜既 (其實我好怕啲嘢甜，但唔知點解HD既朱古力雪糕同埋Godiva既朱古力，我又好ok喎。)

今日晏晝就係朋友P煮既意粉，今次又係新嘢喎，好似話係參考咗法式洋葱湯同 sundried tomato cream & cheese pasta 既煮法而成既。材料係洋葱、蒜蓉、sundried tomato、mozzarella cheese同長通粉，調味就用咗雞汁。洋葱就好似煮洋葱湯咁煮喎 (仲話不久將來會煮法式洋葱湯我試喎，yeah!!!)，我唔識呀，剩係知要慢慢煮，佢真係好有心機。咁心機係無白費到，因為真係好好食。　

話實在，佢近排越煮越勇，我都有啲壓力呀，唔得，我都要發奮圖強，煮啲好嘢過佢食，等佢讚返我轉頭先，wakaka~~

繼續減肥...

噚晚約咗舊老細食飯，諗住同佢catch up下，點知俾佢覺得我另有目的。唉，算啦，我都係想同佢傾下偈，關心下佢，佢點諗都無咩所謂啦。

個飯局係outback食，諗住就腳先揀lee間，好彩佢唔多人，因為我個舊老細遲咗成個鐘先到，因為做嘢遲就算啦，我就打candy crush解悶囉，係俾啲waiters望下望下有啲尷尬啫。我有記得自己減肥呀，所以呢，我就叫咗Queensland Salad同 lemon soda (其實佢得 lemon squash 架咋，咁我要求走雪碧同糖，佢話照收我 lemon squash 既錢，當然無問題啦)。

我無影相，費事俾佢覺得我幼稚啦，但又真係好想share俾大家睇睇，所以我就上openrice 搵咗張相俾大家睇睇啦 (from openrice by kevinning)。個沙律好大碟，有雞肉、煙肉、碎蛋、青瓜、車厘茄、菜同croutons，dressing呢，我就揀咗芥末醋汁，好好味喎。搞到我食剩啲雞肉同煙肉咋(其實我食咗大半碟嗰陣，已經好飽下架嘞)。

返到屋企都差唔多十點，多得朋友P仗義相助 (因為佢有生日lunch，唔駛帶飯架)，煮咗個Chorizo雞柳橄欖意粉，用 paprika 調味，又係堅好味囉，意粉達人並不是浪得虛名。唔駛煮飯，我先有時間做鄭多燕同stepper咋。

今朝起身覺得自己好重下，但都要面對架啦，emm，結果係兩個星期輕咗0.4磅，咁一方面諗輕得咁少，另一方面就覺得之前咁食法，無重都算係咁。但而家離我生日得返37日，但就

仲有4.2磅，我開始覺得我可能送唔到lee份禮物俾自己呀，愁~~

朋友P生日食、玩 - 禪八 & 字裡人間 (減肥唔知去咗邊LU)

哎呀，唔掂呀，我噚日又食咗好多嘢呀，咁搞落去，真係唔好話減，keep住都唔得啦，真係要好好反省呀。

話說噚日係朋友P生日，咁我又仲有啲大假剩，就放日假一齊食下玩下咁啦。節目一就係食 lunch嘞，之前都有提過有朋友帶咗我去禪八食lunch既，我堅覺得啲嘢好味，價錢又ok咁，所以就決定lee 一間啦。今次我試和牛漢堡呀 ($120)，上次見到好多日本人食，已經好想試下，朋友P就食吞拿魚蓉食跟喬麥麵 ($150)，其實我地最後都係share食，可以試多啲嘛：

你睇你睇，個漢堡扒幾咁厚，一夾開佢啲肉汁同油份即流出嚟，好味既，但半份就夠啦，成份會好漏呀，而且佢啲椰菜絲係唔好食 (丼吉嗰啲就好好味，不過真係無quota食炸豬扒住囉)，所以無食嚟解膩。個吞拿魚蓉飯都好好味，喬麥麵就好鬼一般囉。啲漬物同茶碗蒸就不過不失啦。餐茶同雪糕二擇其一，我地都揀咗雪糕，係 melon 味喎，有得揀一定唔會揀既味，但食落又幾好味喎。埋單都係$300，抵啦，咁既質素。

之後就行下街，我買唔到嘢呀，朋友P就買咗件外套，佢就好啦，唔知點解近排好想敗，但又無嘢啱。行到咁上下，我地就去睇戲，今次lee套 I級呀 (好耐無睇過 I 級了，對上嗰套講呀講呀就3級，hoho)，"字裡人間"，我覺得係平淡得嚟睇得幾舒服既戲，我ok鍾意lee啲戲，但我估好多人會覺得悶囉。

睇完戲其實都唔捨得返屋企，但因為之前食得過份咗，而嚟緊星期六有個好期待既brunch，堅唔可以再縱容自己，所以就乖乖的去買菜整沙律啦。返到屋企都成八點，煮得個醋汁，食埋都9:30，我仲要煮埋今日帶既飯，搞掂晒都成10點幾啦，無咩時間做運動，剩係做咗45 mins stepper咋。今朝偷偷的磅，我比兩星期前重咗1磅呀，泣~~今晚仲約咗人食飯，無得食生果收復失地添，點算好???

親子丼呀，今日個午餐，但衰在咸咗啲啦，因為我skip咗半湯匙糖 (諗住用半湯匙味醂代替，但唔得囉原來。)

同場加映：

新買既零食，都幾好味架，又無薯片咁高卡路里，恨食既時候頂下癮咁啦。

今晚有飯局，星期五晚又有好好味既微熱山丘既鳯梨酥等我去拎，仲有星期六既brunch，errrr，我真係好驚呀......

增肥定減肥

嘩，lee兩日好得人驚呀，我話我食得多到得人驚。

話說上星期五，我都仲乖乖的，lunch食咗朋友P第一次整既Chorizo雞柳橄欖燴飯，佢好似係用生米，落雞湯慢慢燴的，又好鬼好味喎。話時話，我地輪流煮飯，佢次次嗰啲都好難，我嗰啲就係啲簡易食譜，我有啲心虛添，呵呵~~

嗰晚其實好鬼肚餓，好鬼想去茶餐廳食酸辣豬扒米線，但諗起下午茶食咗兩粒散水麥樂雞(我order咗一盒架，但我分咗4粒俾人囉，幾唔捨得呀L)同埋今個星期既精采飯敍，唉，都係食個青蘋同奇異果算啦，咁當然又食咗啲薯片同朱古力啦。嗰晚係做咗鄭多燕既紅帽子同stepper。

星期六，10點零鐘起身就搵嘢食啦，因為啲 Johnsonville 辣肉腸就快過期，咁就一人一條做早餐啦。好耐無食過咁惹味既嘢做早餐，仲要啖啖肉，覺得自己好幸福囉，wakaka。跟住就打電話問下啲package，係呀，我去旅行呀，不過package price未出，就hold住咗機位先，等啲嘢 confirm 咗先講去邊啦 (驚小氣呀，哈哈)。雖然未confirm，我已經急不及待做research，我真係好想去旅行囉。hea 到兩點零，肚餓喎，咁又摷下嘢食啦，lee個麵又快過期嘞，又要食啦。咦，又幾好味喎，我係見有個舊同事喺fb介紹先去阿信屋買嚟試 (張相都係佢既，因為我唔記得影相就一手撇開咗個包裝)，值得一試既，不過堅肥囉。

食完無咩嘢做，咁又出街行下啦，我好想敗呀，但又敗唔到。夜晚去食咗譚仔，唔敢叫雞翼喇，套餐share食算啦，lee晚個麻辣湯底又好得下喎。除咗以上”違禁品”，其實我仲食咗半條HD雪條既同零食囉，所以堅超標。

到星期日嘞，今日都feel到自己有啲重重地，不過都照食我大愛既石窯提子麵包，喺little mermaid買既，都幾貴下，耐唔耐食下呢。上完boxing堂，去咗pret a manager度食lunch，諗住食light啲。原本諗住夜晚食veggie salad既，但唔願返屋企，因為我未敗到嘢呀，就繼續行下街啦，夜晚嗰餐就去咗喜宴食，我好掛住佢嗰凍蕃茄同擔擔拉麵呀。咁睇落，係咪好似唔係好過份呢，因為我未寫我今日食咗既甜品囉。

擔擔拉麵，我要咗辣既，好惹味；個凍蕃茄既汁係wasabi同芝麻餐，好好好味；仲叫咗個凍豆腐，lee個都好味。

個啲迷你可露利 (喺 Sogo買既)，都唔係可露利嚟既，俾人呃咗錢同quota呀 (如果鍾意食可露利，可以試下lee 間: http://www.lecaneledor.com.hk/，我訂過嚟食，好好味)。跟住就係嗰兩個pies (喺Great買既，叫 Tai Tai Pie Pies，佢都係online shop，但喺 Great度有counter)，兩個都好味喎。食咗咁鬼多甜品，應該過晒quota，但我又忍唔住去咗 J'aime bien patisserie (http://www.jaimebienpatisserie.com/#!) 同朋友P share食咗件 caramel cube，第一次食lee間，又幾好味喎，其實我好想試佢個 Gateau au Citron，但未減完肥，真係唔敢買住。下次儲咗quota，再去試下佢其他cake先。食咗咁多嘢，返到屋企都要做 1 part 鄭多燕先安樂啲，但我今日偷偷地磅，我重咗呀，泣~~~

今日既lunch係雞鬆蓋食，見今日個兜兜靚啲，就俾佢出多次場先。

繼續減肥 & 試堂記

噚日個 lunch meeting，好彩只係去咗 panash食，芸芸set lunch之中，我揀咗洋葱汁豬扒跟意粉。個set有跟湯、麵包同埋餐飲。

湯就揀咗菜湯，味ok，但最慘係唔夠熱，最怕啲溫吞吞既湯，所以飲咗3啖之後放棄。包就揀咗個合桃包，熱熱的，配牛油，很好味。個豬扒意粉啲豬扒都幾瘦下，不過味ok，我專切啲近骨位有啲啲脂肪既位食，食咗都有1.5塊。蒜蓉什菜 (除咗舊西蘭花同椰菜花之外)食晒，意粉睇見佢白雪雪，但都幾香蒜味既，都食咗幾味 (大啖個隻)，餐飲乖乖的叫咗杯熱檸茶 (唔落糖)。lee餐都幾飽下，不過又唔太過份既。

晏啲就去見客，同啲客去misocool 飲杯嘢 (因為得嗰度有位)，今次就唔乖lu，叫咗杯凍既日式炭燒咖啡，但把鬼，咪即係凍啡，不過叫做唔酸囉，飲咗半杯。見完客，同阿sir行咗一陣，各自撇。嗰陣先至6點，但噚晚試堂試9:30，啲時間真係唔知點過。行咗陣街，去咗iSQUARE搵位坐咗一個鐘，拳友約8:00食啲嘢先上堂，YEAH，唔駛等到我傻。最後食咗碗剩四寶同凍檸水，就去咗上堂。

去到間新拳會，一睇打個突，好細喎。changing room得兩間房仔 (男女共用)、男女toilet各一、shower得一間。我地係買 groupon 上去，拳友唔記得print out，上到去已經猛同個receptionist講唔好意思，俾個電話佢睇返個e-mail，但態度堅差囉，猛話咁會煩到佢地。黑住面咁幫我地登記，印象超差。好啦，等到夠鐘warm up，個師傅就掛住一度傾，一度帶住拉筋。節奏堅慢，又無咩練體能。終於捱完個warm up，一個師傅帶5個學生，輪住打。未到你時，就坐下同做下sit up，無沙包你打，佢話沙包唔識講，無用喎......打完第一round，佢話我地學師有問題，就執我地啲姿勢啦，ok，fine，佢講啲嘢有啲都 make sense 既，照跟無問題，同埋跟咗都ok囉。跟住輪住打，因為佢話我最差，所以我最尾嗰個打，咁跟佢講咁做啦，又ok喎，啱晒喎今次。練完拳，坐咗陣，到我同拳友T一齊練踢，開先佢話我踢得好差，但再踢，又話啱晒喎，好彩都叫做挽回啲啲面子。之後，就同啲同學一齊cool down，好搞笑，佢地真係無咩體能喎。我諗lee間會喺第一堂執你啲姿勢，俾個下馬威你。仲有3堂，再上埋睇下會唔會開佢個名啦吓。btw，食完嘢先上堂，個胃真係會幾唔舒服，不過呢，我返到屋企都忍唔住再食咗幾塊薯片。

今日lunch好好味呀，意粉達人朋友P煮咗香蒜黑醋車厘茄辣肉腸炒長通粉，佢煮親都好啱我口味架，搞到我期待咗一朝呀，而家飽飽的~~

繼續減肥 - tomato & basil 麵

星期一放工好肚餓，一返到屋企洗咗手就開咗包薯片食咗幾塊，之後就乖乖的食咗青蘋果同奇異果做晚餐。抖咗陣就做 stepper 同鄭多燕既 figure mat，個 stepper 俾我踩到short 咗，感應唔到，所以count 唔到時間同次數，咁唯有自己計時啦。figure mat 都做第3次啦，但都係攰到癲，但真係堅有效咁，所以我都會繼續努力既。

今日係假期，雖然無出街玩 (其實個心就好想出旺角食菠蘿油，不過肥呀，唔敢呀。)，喺屋企hea都幾開心吖。9點幾起身就食咗啲yogurt做早餐 (其實我真係好掛住麥當勞既早餐，仲要有薯餅嗰隻...)，之後又嚟 stepper 同 figure mat，唔知係咪噚晚先做完，今日再做啲肌肉真係好痛同無力做，唯有做下抖下咁捱咗佢啦。沖埋涼同拉埋筋，點成點幾鐘，好鬼肚餓，lunch係泡菜餃子3隻加半個 tomato & basil 即食麵 (阿信屋買)，又幾好味喎，味濃得嚟又唔油，鍾意 basil 既朋友可以試試喎。我下次想跟佢建議加啲蕃茄、蛋同芝士試下囉。

喺屋企打下機、上下網，又口痕啦，食咗半條哈根大師雪條、蒟蒻、米餅，仲試咗lee隻餅 (又係阿信屋買呀)，又幾好味，我諗配咖啡會幾好喎。

hea下hea下，又到6點，要落街買啲日常用品同補下啲零食咁。原本諗住今晚朋友P煮香蒜車厘茄辣肉腸炒意粉既，但經過海皇，又好想食炸腸喎 (都係朋友S啦，前幾日佢同我講起食炸腸，搞到我掛咗幾日)，咁今日有人share，就今晚食咗佢啦。兩個人叫咗個晚餐 ($35)，菜乾排骨粥、配碟炒麵、檸水再另加個炸腸 (跟餐$11)，加埋都係$46，每人$23，夠飽之餘，又幾抵食。不過lee餐看似清淡，實則都幾肥下，真係耐唔耐食下好lu。

 

聽日有個 lunch meeting 呀 (希望誘惑唔好咁大啦，好難忍架嘛)，之後仲有個tea meeting，成個下晝都出咗去，估計6點前可以收工，但聽晚試堂試9:30喎，啲時間可以點過呢，傷腦筋呀~~