減肥繼續break - Zoe 篇 (唔駛再去)

話說上星期四晚食完韓燒加甜品直落，肥返兩磅，係咪應該要乖乖忍口先？不過我無囉，忍唔住呀，上星期五見朋友P出咗尖沙咀做嘢，即約佢食酸辣粉，大滿足完，又有少少內疚咁啦。

到星期六，朋友P又出動，整 crepe，今次佢溝咗啲高筋麵粉落下，睇下會唔會好啲。煮後意見係易煎咗，但只可煎一面，兩面都煎既話，會太脆，好難包住啲料。味道呢，我覺得一樣咁好食囉。

11點半左右食完crepe，就乖乖做運動啦，鄭多燕加stepper。到兩點幾，好鬼肚餓，就煮咗個mama麵share食啦，今次唔係冬蔭功味，係肉碎(我估係打抛醬)，但唔係好味囉，唔知關唔關過期事呢，哈哈，因為個麵過咗7日期呀。 (見煮咗出來試味無事就照食，不過大人細路都唔好亂學呀，wakaka)。夜晚，就食咗veggie salad with parma ham，但買餸嗰陣太肚餓，我地都買咗件卷蛋share食。食完菜，心思思，就食咗個yogurt pudding，我覺得自己似增肥多啲囉。

星期日，朝早嘆我既牛油、果jam、花生醬方包。打完拳，就去咗食pret a manager既小龍蝦三文治、曲奇同 cappuccino。跟住就行下街，但無嘢啱買。見近住Zoe，仲諗住佢搬前，食多次啦。

唔食就由自可，一食就把鬼火。話說好耐之前個老闆唔做，我已經覺得間嘢變咗，好似好商業咁，啲新cake更加由賣相到味道都唔掂。ok，fine，無人唔想搵多啲錢，但唔係話出咗名，啲服務就要差咗，白鴿眼咗咁囉。但因為佢個crème brulee真係我喺香港食過至啱我口味既，好啦，我忍。但噚日一食，嘩，個crème brulee得過滑，但無奶香，又無晒啲vanilla籽既香味，咁係因為成杯都唔見有一粒vanilla籽囉。雖則我幫襯得唔多，但我從跑馬地舖既$2x一件，食到銅鑼灣舖既$38一件，唔expect啲嘢會退步到咁囉。可能名氣夠，賣咩啲人都食啩，又可能覺得而家啲人唔識食，食唔出啩。個key lime pie都係好味既，但我會同Zoe講bye bye lu，佢又變咗一間我唔會再去既食店。其實都有啲唔開心架，因為我以前真係好like lee 間cake shop，仲介紹咗好多朋友幫襯，但終於要同佢一別。人要向前看既，我會再搵另一間好食既cake shop既。

Dinner就試新嘢，Thai呀，哈哈。係冬蔭公同泰式蘆筍車厘茄蝦沙律，個冬蔭公就用上次喺曼谷買嗰啲即係醬包煮既，加啲蝦同本菇，幾好味喎又，如果係新鮮蝦會更正囉，不過我真係自煮新手，所以未識處理鮮蝦，用咗急涷蝦。個沙律，又係上網搵到既食譜，都幾好味喎，不過我漏咗加辣椒碎落過汁度，唔怪得總覺得差咁啲嘢啦，等我下次再整一次先。

經過幾日既增肥假期，再加上每個月都會嚟探我既親密朋友又到期搵我，我決定今個星期唔上磅住，但我唔會鬆懈。今日lunch係韓式辣醬秋葵炒雞柳 (因為見小t啲飯盒好靚，所以我都要買過個新兜兜，唔好失禮至得架)，晚餐就係奇異果加青蘋果希望可以收復部份失地啦。

減肥break : 韓燒@BBQ7080

今日個胃有啲唔舒服，因為噚晚呢....食咗太多嘢同埋飲咗好多真露，堅係飲多咗囉。

好嘞，講返我噚日上磅先啦，之前都仲話緊覺得有啲險峻，不過經過我星期三晚 stepper 咗 45 分鐘同鄭多燕既 figure mat，形勢好似唔同咗喎。噚日一早起身即磅，噢，太開心嘞，剩返4.6磅咋，即係今星期減咗1.6磅啦，唔知係咪過咗個平台期呢，yeah!!!

噚日既 lunch就試整咗鬼嫁既另一個食譜：雞鬆蓋飯。見佢話切碎啲雞肉，唔駛醃呢，都有丁點既懷疑，但我對佢既食譜好有信心，所以我就剩係用咗啲啲既酒同胡椒粉辟腥。為咗減肥，我就減少咗肉既份量，加咗半塊蒟蒻。一個好易煮既飯，但好好好味囉，係可以減返半湯匙豉油，因為我喜歡濃味啲，所以呢，我就落咗2湯匙，不過我估1.5湯匙都夠味囉。lee餐又係$10左右~~

食飽之後，就落咗卓悅入面既一生良品買糖食，原本想買我食開嗰隻梅糖，但無得買呀，望完輪，揀咗lee兩包：

左邊嗰包 ($16.5) 好普通，偏甜，但右邊嗰包($19.5)就好好好味，好重梅味，少少咸同偏酸的。我有個同事都係愛梅之人，分咗每樣一粒俾佢試，我地意見一致，推介男梅。

好嘞，到咗戲肉啦，就係同啲拳友去韓燒。韓燒之前去打堂拳先，但因為前一晚既figure mat令我攰到無朋友，我都堅無力打~~

我地去嗰間嘢叫BBQ 7080，點解會去lee間呢，係因為拳友T之前睇咗阿洪永城喺首爾食咗燒豬皮，好想試吓，咁拳友J就話lee間食過都幾好味，咁就決定咗lee間。lee間嘢都堅難book，佢會叫你3-5點打去訂位，我試過其他時間打去係唔通既。終於有日記得3點打去，但都打咗幾次先有人聽。原本想book 8:45，佢答話得8:30先有枱同埋限時90分鐘 (唔係放題呀)，難得打得通，就好啦，趕啲啲囉。

拳友T 8:25去攞位，等到8:35左右有位，我同拳友J打完拳，趕住去，好另咁都係嗰個時間到啦，拳友E就塞緊車 (最後9點先到)，但因為都幾肚餓，所以我地3個都點咗嘢食同食住等拳友E啦。我地好癲叫咗好多嘢食，仲要4個飲咗5支真露，個個最後都醉咗。

左上：4小碟前菜，我碟碟都鍾意喎，右上：wasabi 酸汁生洋葱同生菜，撈啲烤肉一齊食，好好味，又無咁膩，隔離嗰碗就係涷湯，好酸吓，都係解膩既 (我估)
左中：辣豆腐海鮮湯，幾好飲：中間：燒緊既豬皮同五花腩，豬皮好味喎，又香，質感又得意喎，五花腩好味。右中：牛肉同啲生菜，牛肉都係普通，無咩牛味。
右下：左上嗰塊白色嘢就係豬皮嘞、隔離係辣豬腸， 都幾香、下面個塊係海鮮煎餅，lee個唔得呀，可以唔試。中間：未燒既五花腩呀。右下：牛舌，又係唔夠味喎。

食下食下，都俾我地食到11點(因為無人等枱)，加多5支真露，埋單$1,1xx，今餐拳友E請客呀，佢有開心事吖嘛，堅要多謝佢囉。Lee間嘢ok喎，可以再去。

11點幾，我同拳友E都好想食甜品，咁醉住由山林道走出去美麗華附近既甜牙牙食 (拳友E介紹)，叫咗心太軟同窩夫。食完，拳友E唔夠喉，要再食心太軟喎，我有啲嚇親呀，因為佢平時食杯乳酪做早餐、晏晝飲杯熱好立克、夜晚食烚菜同幾粒丸咋，咁我地無理由唔俾佢食啦。無奈人地last order咗，咁我地唯有同佢去厚福街食啦，去咗糖仁街，叫咗心太軟同蘋果酥。

上面嗰兩碟呢係糖人街既，個賣相真係差啲，但其實都幾好味既，可能我堅鍾意蘋果酥啦，最正佢免費upgrade Glacio既cassie & cream 雪糕嘛，係呀係呀，我成日去K11嗰間雪糕舖呀。

下面嗰兩碟係甜牙牙既，賣相好得下，味道都幾好，不過個雪糕就削啲囉。

話說係朋友E話要再食架嘛，但佢等啲甜品時就醉到瞓著咗lu，叫佢都唔醒。係最後call咗士先叫得醒佢咋。我知我地有少少醉後失儀，喧嘩咗啲，希望俾我地騷擾到既人多多見諒啦。同埋呢，我見今日個肚好鬼大，所以又忍唔住上磅check check啦，嘩，肥返2磅呀，咁...咁...咁...點算好呢？

今日既lunch係朋友P煮既香蒜橄欖辣芝士腸(Johnsonville)炒意粉，又係好好味喎，我個胃頂頂地都食晒，佢真係意粉達人，又係$10左右一個人，自煮真係好鬼抵。

又係減肥，好悶呀~~

星期三嘞，聽日又上磅，但我 feel到情況有啲嚴峻呀，因為經過中秋節同長週末既狂食之後，噚日我仲唔識死咁約咗同事去飲茶呀，因為我堅恨食點心呀。

等我記低我食過啲咩先：1粒山竹牛肉、2粒燒賣、1粒無湯汁既小籠包 (始終覺得喺酒樓係唔應該叫小籠包既，不過同事想食無計)、半個叉燒包 (一籠3個，好鬼細個嗰啲)、1/3條叉燒腸、1粒蝦餃、1/6塊薄餐，仲有一碗仔雪菜炆火鴨絲米 (lee個又係我鍾意食既，如果佢地叫炒河咪好囉，因為我唔鐘意炒河吖嘛)。喺太古既玉桃軒食，都ok好味，不過同啲同事食就無得影相，因為佢地會覺得我好低能。

好啦，食完咁肥膩既一餐，成個下晝個胃都頂住，好鬼辛苦，夜晚就乖乖的食個蘋果同西柚啦，終於都清晒中秋節收到嗰啲水果嘞。食飽抖咗陣就鄭多燕 (又係紅帽子) 同 stepper。順帶一提，我星期一晚試咗鄭多燕既塾上操，簡真係殺人呀，有啲動作真係跟唔到十足，爆汗程度又係恐佈，做完，我真係成個人散晒同腳軟，攰過紅帽子喎。雖則話堅辛苦，我今晚都想再挑戰。塾上操主要鍛鍊肌肉，多啲肌肉做有氧運動會消多啲脂肪，所以我要間住做。

今日既早餐係1/4個半島既奶黃月餅加一杯星巴克既 cappuccino (tall)，午餐同晚餐都係南瓜炒雞柳，Miss P自己研製既，好似係用韓國麵豉醬炒既，好好味。

聽日磅完再報告，唔知係喜定憂呢，忐忑中。聽晚同的拳友仲有個飯局，試間新既韓燒呀，試完再寫下好無食呀吓。

我的減肥食記 - 中秋篇 (part 2)

大食咗兩日，星期六朝8點幾就乖乖起身做運動(無錯，噚晚夜媽媽做完，今朝又要做喇)。先嚟一part鄭多燕，再做30分鐘stepper，其實我鍾意朝早做運動，咁就算出咗街都唔駛趕住返屋企嘛。10點幾先食早餐，今日乖呀，食咗yogurt加半個大蘋果。但晏晝就失守喇，食咗半個韓國蔬菜即食麵+3隻超大泡菜餃子(喺韓國街新世界度買既)。嘩，我堅掛住即食麵囉，雖則話lee個麵唔係最好味嗰隻(我覺得阿信屋賣嗰隻泡菜麵好食啲)，但我又真係太耐無食過 (未減肥之前，兩個星期都會食到一兩餐)，所以我都覺得好好味。諗起仲有啲冬蔭公mama麵同阿信屋買既日本basil & tomato 麵 (Miss P試過，話好味喎)，好想好想食呀，但又要等人同我share先食得，泣。食飽飽瞓咗個晏覺，就落街掃貨喇，買麵包做聽日早餐啦，買菜煲羅宋湯啦(因為打風，啲菜貴咗呀，同埋好似搶咁喎)，買洗衣液啦，同埋去阿信屋買麵粉for crepe mix，剛啱中秋嗰4日做緊滿$100就有7折，減價都仲有8折至85折，公價就有95折，咁本住唔蝕抵既心態，我買咗7包薯片同埋其他零食呀，希望我會慢慢享受佢地啦。

一餐乖，一餐唔乖再加埋食咗啲零食，夜晚嗰餐真係唔敢再放肆啦，整咗香蒜露筍巴馬火腿意粉，又係跟鬼嫁既食譜架，佢啲食譜真係好易跟(我都跟到既話，我估一般人都無問題，除咗啲對煮嘢食毫無興趣同concept既人啦，咁就叫身邊人煮啦吓)，又好味喎。炒好咗啲意粉，試味時都覺得淡架，但見鬼嫁話撈埋啲火腿一齊食就夠味，咁就試下囉，又真係夠味喎，好食好食。今餐自煮嚟講貴啲啲啦，包露筍就$28，火腿就$30左右(我通常係taste刨$100分三餐食)，半包意粉就$6左右(牌子係 DE CECCO，喺價真盞賣$13，TASTE就賣緊$23)，夾埋$64，即係$32一個人啦。哈哈，不過呢，我估lee個出去食應該差唔多$100 (雖然會大碟啲)，我覺得抵喎，同埋最緊要係我可以控制分量同油份吖嘛。

食飽，就輪到Miss P入廚房煲羅宋湯，我地終於同我地個真空煲開齋啦。見佢切切切，都幾辛苦同花時間，跟住仲要睇下火，煲成半個鐘有多先可以放落個真空煲入面。lee啲要咁有耐性既嘢，我真係未做到住囉。今晚仲應下節，食咗2粒湯丸，好好味。

到咗星期日，朝早就食咗油、花生醬同果醬搽方包。上完泰拳堂就應該返屋企入湯既，專登噚晚煮定就係想LUNCH有得飲，但我就突然好想食burger，喺麥記同MOS之間，我地揀咗MOS，諗住買個包share再加羅宋湯啦，但去到見套餐加$8有咖喱炸包喎(原價係$14)，我好鍾意食咖喱炸包架，嗰時去東京都會去中村屋買嚟食。雖然知好鬼肥，但我既慾望已經戰勝咗理性，餐就餐啦(薯條同綠茶latte又好好味架嘛)，個包就要咗吉列豬扒漢堡，所有嘢都好好味 (我同Miss P share食架，一個人食既話，我估我會好鬼憎自己囉)。我覺得個吉列豬扒漢堡同個咖喱包都好值得試喎，推介~~，食晒啲mos，仲飲咗兩碗湯，咦，我個胃口唔係細咗既咩？點解我咁大食架？

夜晚就飲咗3碗湯，再飲咗一杯夏桑菊，飲到成肚水。HEHE，夜啲就睇之前錄既Mentalist，又食咗啲啲零食，電視送零食好開心架嘛。我覺得放假真係減唔到肥，但我又好鍾意放假食下嘢咁喎，咦，咁點算呀???? 

同場加映：親子丼，原先諗住隻兔會晏啲先走，可以飲埋啲湯做lunch，點知一早天文台就話考慮10點或以前改掛3號 (其實都知改硬，考咩鬼慮)，咁就快快手煮個飯帶啦(因為帶湯好麻煩，我實打瀉好多)，又係跟鬼嫁個食譜喎，煮完先知原來親子丼係咁易煮既，粗略計算，lee餐都係$25 - $30左右，咁即係每人十幾蚊，好抵囉。今晚返去飲埋啲湯同做運動，我又回歸我”正常”既減肥生活嘞。

我的減肥食記：中秋篇 (part 1)

對於減緊肥既我，中秋節 (仲要long weekend) 真係一個好大既挑戰，我已經好努力去控制自己架喇，等我回顧下自己lee幾日食咗啲咩先：

中秋嗰日，去咗我阿姨天台BBQ，今次因為大家都要返工，所以由我爸媽負責買同醃食物。由我爸媽負責都唔好 expect 有海鮮、羊架同埋和牛嗰啲，因為佢地燒開都只係雞翼、豬扒、牛仔骨、腸仔、什丸，所以佢地都係買咗lee啲普通嘢另加我要求既煙肉同車厘茄。雖然lee幾年我鍾意咗食海鮮 (燒蝦真係好好味)，但今次搵返既係以前同爸媽燒烤既味道，醃料只係豉油、薑、乾葱、黑椒嗰，好懷念。同啲親戚一齊吹下水，同阿表姪玩下 (我堅俾 lee個21個月既人仔氹得好開心)，又覺得好鬼warm喎。雖則話放自己假，我都有大概計住我食咗啲咩既：2隻雞中翼、豬扒同牛仔骨各1塊、什丸5粒、腸仔1條，煙肉車厘茄4粒同埋半塊麵包 (homemade by 十姨)。除咗lee啲，仲有食咗啲甜品囉，1個迷你muffin，我阿姨個男朋友整既，佢話用yogurt代替cream喎，係乾咗少少，但都幾好味，仲有就係1/4個大師姐既奶黃月餅 (lee個我覺得好食喎，好過半島同朗庭，下年可以再買) 同1/8個杏汁官燕月餅，好鬼開心同滿足既一日。

中秋放肆完，好應該乖乖的忍口啦，但我做唔到呀，泣。一早起身就食咗半條粢飯 (好肥，但係好好味)，之後就摷啲零食食，朱古力啦、薯片啦，月餅啦同埋嗰啲迷你muffin。食到咁上下就趁隻天兔未殺到嚟出街玩啦。出到去3點零鐘就去咗譚仔三哥，同P小姐share咗個米線套餐同細土匪。食飽經過咗印尼餐廳忍唔住買咗件千層糕，之係去咗K11行街，又忍唔住係Glacio買咗杯雪糕。行街行到8點幾又搵嘢食啦，唔係好肚餓既關係，我地去咗美味廚食。

Glacio既雪糕，今次試咗好多味，但都係鍾情expresso & cream同雙色葡萄，最surprise係double scoop會再送一個雙色櫻桃 scoop俾我地，死啦，咁兩個人咪要 share 3個scoop囉，但又無理由唔要架，當然最後我地都食晒啦。左邊嗰舊就係班蘭千層糕，我地叫佢做擦字膠€(係咪好低能呢)。下低個3樣就係美味廚食既 (又係同 Miss P share啦)，左中個碗其實係菜肉雲吞，不過食晒先記得無影，右中係排骨菜飯 (lee樹出名既)，下面嗰個酸菜就每枱派一碟，收錢既，見幾好味，都無試過問佢可唔可以唔收錢拎走。返到屋企其實都11點lu，但因為食咗好多嘢既關係，我都有跳鄭多燕同做咗30分鐘stepper，咁先至安樂去瞓咋。

繼續減肥~~ 同中秋節快樂呀~~

噚晚我好乖呀，雖然好想食大家樂既四寶飯、吉野家既牛肉飯，但我都係乖乖的去咗超市買咗個椰菜，煮日式炒麵做晚餐同今日既 lunch。

個椰菜$7.4，麵同雞柳夾埋都係$10左右，即係$9一餐啦，好抵。不過因為我減緊肥，個胃口真係細咗好多，一個麵分兩餐食。

跟住就乖乖的跳咗鄭多燕，今次又爆汗啦，地下都滴到濕晒。跳完，就做多30分鐘stepper。因為我覺得自己好乖，所以我奬咗自己食咗少少薯片、朱古力同埋1/4個冰皮月餅。我知，我知，如果我唔食，成績可能會好啲吖嘛，不過呢，連lee啲都無得食既話，我會好唔開心呀。所以我情願慢啲啲，都要keep住心景開朗去減囉。

噚晚食嗰個冰皮月餅，係大班既香芒官燕，我其實唔多like燕窩，不過阿嫂送既，都好開心呀。同埋啲芒果同綠豆蓉都好好味，yummy。

好嘞，今朝都係要上磅，咦，都ok喎，跌咗0.6磅喎，雖則2個星期先減到1磅，係慢啲，但我終於衝破咗，唔係成日都仲有7.x磅，係6.6磅呀，唔知56日減唔減到呢，擔心ing~~~

不過呢，今日中秋吖嘛，我會放自己一日假，BBQ啦，月餅啦 (我仲專登買咗大師姐既奶黃月餅同啲屋企人分享)，我都會食既。老土啲都要講句：祝大家中秋節快樂!!!!

仲有兩個零鐘就放工 (公司大發慈悲，放早兩個鐘呀，開心開心)，已經有啲心散添。唔得，我要乖乖的做埋嗰兩個鐘，跟住好好咁過我既中秋同埋 long weekend 呀。

開心、不開心

噚日好開心喎，有人搵我食 lunch 呀，咪係朋友S囉。今次係為咗拎：

因為卓悅入面既一生良品賣腸仔賣得好平，5條裝都係$8.5咋，仲遇著5送1，即係$8.5有6條，所以買埋俾朋友S囉。果條 choco snack就俾佢試下既。而家減緊肥，會再睇清楚啲零食既calories，lee兩款都係較為低既，口痕既時候，我就會食佢地架喇。當然肥既薯片呀，我都有食啦，不過食少啲囉。我真係零食怪嚟架，大灰~~~~

噚日又係食元氣，食咗幾碟先記得影相，都係食嗰幾款啦，食咗7件+一份芝麻豆腐。都ok飽喎，我諗我而家胃口真係細咗 lu。其實朋友S要撘一個站過嚟同我食飯架，我知佢唔係為咗啲腸既，係為咗見我囉，你睇我幾唔知醜，wakaka~~~

噚日出咗街 lunch，諗住食生果做dinner啦，但又好想食Circle K個牛肉球喎，好啦，買俾自己食下啦。之後，再加多個奇異果同一塊小老板紫菜 (喺囉，去完曼谷就愛上咗泰國紫菜喇，點算？)，就係我既 dinner嘞。

食飽 (其實唔飽，但又唔餓囉)，就煮今日既 lunch啦。hehe，薑燒豬肉飯呀，買咗盒急凍梅頭豬肉片，一個洋葱，都係$20左右，再加埋屋企啲米呀，調味料，我估lee餐$30左右啦，2人份喎，即係$15 per person啦，仲要好味喎 (hehe，自己讚自己添，不過都係因為鬼嫁個食譜掂啫，易煮又好味)。自煮真係好好，食幾多煮幾多，控制食量之餘，又唔會製造廚餘吖嘛。出街食，好易食剩嘢。食晒又易肥喎，又要減，都係搵自己笨。

Lee餐好味，係衰在肥啲啲囉，一洗碗就知道豬肉肥過雞柳好多囉......耐唔耐食下好啦~~ (小t，影我個飯盒俾你睇下喇，快啲試下整啦)

好嘞，唔開心啲咩呢又，我遇到好多樽頸呀，事業啦 (太悶唔係度講)，儲蓄啦 (儲極都未到另一個 level)，仲有就係減肥啦，真係平台期呀，我已經又鄭多燕、又stepper、又打拳啦，但磅數停留咗兩星期啦，好鬼 frustrated，仲要中秋多引誘喎，又BBQ，又月餅啦，我度火都好怕會被淋熄呀，點算啫？？唯有買啲殺傷力無咁勁既嘢氹下自己囉，今日係一杯 cappuccino 做早餐，開心返少少咁啦。

又係食食食

上星期好開心喎，又食又敗，等我喺度分享吓食嗰 part 先，呵呵呵~~~

上星期五晚，又約咗我啲舊同事食飯，lee班同事真係共患難嗰隻，因為我前老細堅係癲既，所以我地感情真係唔錯架。今次約佢地去四姐川菜，無錯，又係lee間，因為我真心覺得坐得幾舒服，啲嘢食又幾好味，又唔算貴。佢地都食完都覺得ok，開心呀!!!

上次試過嗰涼麵同皮蛋都好味，所以encore。今次再試埋白水牛肉同口水雞，但兩樣都係普普通通~~

左上：椒鹽蝦 (唔辣)，又估唔到lee個幾好味喎，好香口。右上：水煮魚，我覺得佢同涼麵係必食囉。左中：辣子雞軟骨，送酒一流。右中：乾煸四季豆，lee個就真係麻麻地。左下：黃燜雞(唔辣)，又係好味喎。鍋耙回鍋肉，飯腳們既意見係好壞參半，我就覺得ok喎。

其實，你問我lee間嘢係咪好好好食，我會話唔係囉，但$280 一位，免開瓶，免加一，服務好，坐得又幾舒服 (係嘈少少 )，最緊要唔趕你交枱，我覺得聚會真係好ok喎。

好啦，食完啲heavy嘢，星期六就應該要乖啦，但唔係囉，因為朋友P決定要試整啲新嘢俾我試下呀。咁我唯有乖乖的爬起身，先跳鄭多燕同做stepper打個底先啦。登登登登~~~

就係自製crepe呀，材料有芝士，辣肉腸 (chorizo)，雞蛋同埋Chives，係我地喺 Paris 既 Bastille Market食過之後，念念不忘之下，朋友P希望可以令我地重温嗰個美味而整架 (我要喺度向你致敬呀，朋友)

佢整緊既時候，我聽住佢猛話裂啦，要補呀，好硬呀，就係咁，第一個製成品出世啦，哈哈，emm，個樣真係唔係好對勁囉，朋友P個樣都唔係好對勁囉，亦因為咁既樣，佢連chives都唔記得落。雖則個樣係咁，食落都ok好味喎，係個皮硬啲 (因為我減緊肥，朋友P開漿時齋落水，無落奶同蛋，真係難整架)，同啲料少咗啲囉。

其實好食就得啦，樣既嘢唔緊要，但真係估佢唔到，隔咗一陣，朋友P攞咗下面嗰件嘢出嚟：

Lee個讚啦，色香味俱全呀，老友，好好好好味，堅佩服同感激呀。雖則話唔夠bastille 嗰個好味，但lee個健康得嚟有咁既味道，真係好叻囉。下次麻煩你再整呀吓~~~

食咗咁多好嘢，星期日應該要乖啦，係咪先？但又唔係囉，晏晝食咗UCC，夜晚食完 homemade veggie salad with parma ham之後，再食lee啲呀：

上面係綠茶souffle，下面嗰個係抺茶朱古力三文治，$35 each，兩件都好好味架，但建議先食souffle，因為件三文治濃味啲既。喺銅鑼灣city's super 買架。而家佢擺緊counter，個姐姐話等city's super裝修完會搬入舖。而家尖沙咀city's super就己經有counter。鍾意綠茶既朋友，我覺得要試下囉。

今個星期四仲會去我阿姨度燒嘢食，咁食法，點算呀????

酒、酒、酒

今朝早又係上磅既日子，我好唔想上呀，因為我覺得我重咗，但話咗唔可以逃避架嘛。嘩……好彩今個星期係輕咗0.4磅，執身彩啦，仲諗住會重咗架嘛。不過，我都有少少驚而家係平台期，平台期好打擊士氣架嘛，加上近排有啲事唔係好開心，好驚我會放縱呀。唔得呀，要頂住呀。

一連兩天既大lunch之後，要乖乖回歸我既減肥餐，今日又係我最受既蕃茄乾雞柳炒意粉，lee個真係好好味架，我成日食都唔厭喎。食飽飽，就落咗AEON (之前叫吉之島咪幾好，改個咁既名) 睇下有無朋友C介紹嗰兩支酒。無喎，又死死氣去呀百佳睇下啦，估佢唔到，今日又有喎，即買啦。LEE兩支酒係FOR聽日個飯聚既，期待中~~

一紅一白，唔知好唔好飲既呢？

同場加映：

星期日貪得意喺阿信屋買咗支麥哥里飲，原來一唔係食住韓餐嚟飲，係甜到無朋友既，唔知點算好添 (不過賣得真係平，$16 VIP仲有9折。己經開咗，唔知可唔可以中秋嗰日扲去我阿姨嗰樹BBQ飲咗佢呢？

食食食 - 禪八 ＆ 千里之月鮨旬菜

一連兩天半公私的lunch meeting，都係日餐：

禪八@尖沙咀 (10.09.13) - 天婦羅好味、左下既吞拿魚蓉飯係好好好好味，個酢飯調味得好好呢，吞拿魚蓉又好鮮味，好想再食、茶碗蒸ok啦、烏冬就唔係好得，包一杯飲品，$135加一。雖然話個烏冬唔得，但咁既價錢，我覺得好抵囉。可以再去喎，lee間。

就係因為lee餐，我噚晚食完西芹炒雞柳，就急急腳跳咗鄭多燕既紅帽子同踩咗45 mins stepper，但我都仲係feel到我好以重咗囉……

千里之月鮨旬菜@銅鑼灣 (11.09.13)

睇openrice啲食評都大部份食壽司或魚生，其實我都有啲怕喺香港食魚生 (喺日本嗰邊都會搵一啲有口碑的試)，因為我真係好怕腥的，少少都唔得呢。不過，今日我決定豁出去啦，就試下你啲壽司先。

先來茶碗蒸，lee個幾好味，湯就飲咗一啖，都ok既。

12件既自選sushi set，嘩，個海膽堅難食囉，真係想吐返出嚟，但礙於同啲飯腳並未熟到咁既地步，就吞鬼咗佢算。拖羅同海鰻都幾失望，可能我又衰，搵壽司大既standard同佢比，但其實真係無得比囉，差好多，其他就普通啦。我諗我都係唔好喺香港食啲貴壽司，失望之餘都幾貴吓，今餐都要$250 plus 10%，咁既價錢，我覺得可以食得好啲。我諗將來真係喺香港會試，都係壽司廣既lunch。

甜品係綠茶慕司，再配杯鮮磨綠茶，ok啦。

因為聽日要打拳，所以今晚都唔會跳鄭多燕，唔想聽晚手軟腳軟影響咗打拳，就做1個鐘stepper啦。聽朝又上磅啦，我覺得今次會重咗囉，唉……

同場加映：

噚日食飯除咗catch up下之外，就係要帶阿聾貓返屋企，好嘢，屋企隻panda有同伴囉，yoyoyo~~

仲有就係噚日分到既中秋禮品呀，有我愛既梨同奶黃月餅(不過今日睇報紙話奶黃月餅勁肥，點算好呢~~)

食玩@ 尖沙咀

經過星期五晚食到飽飽既爸爸生日飯，星期六就應該要乖啦，但我知唔會囉，因為我諗住今日要去唱K LUNCH吖嘛，啲餐都係茶記貨色，都知幾肥架啦。所以呢，我7點幾自然醒咗就無返瞓，食咗乳酪做早餐後，就乖乖的去跳咗一段鄭多燕再加30分鐘Stepper，做埋拉筋同美腿摩司，咁就可以放心一啲啦。等埋朋友P，一點鬆啲先去到寶勒巷NEWAY，Oh no，佢執咗，跟佢指示話港晶最近，去到1:15，問佢有無K-Lunch，佢話完咗，我問係無Offer K-Lunch定係…？佢先答話12:30前入座先計K-Lunch，講清楚咪好囉，起碼我知下次幾點前要到吖嘛。再問收費，佢答$89 (再加一) 包2杯飲品，其實又唔係貴既，不過原本$60-$70 有飯食喎，唔係好甘心咁囉。Anyway，都係落咗去食飯先決定啦。我地去咗尖東既秀食韓國嘢，lee間係分店，總店喺金巴利街，我地耐唔耐都會幫襯下。今日見有set lunch，就試下啦，總店無set lunch叫既。

有5款前菜，份量細啲，但種類多2款，我最愛泡菜同蓮藕。仲有一碗海帶蜆湯，ok啦。

雜錦牛肉石頭鍋飯，lee個ok啦，但總店好味啲喎。

辣豆腐湯，啲豆腐好滑，湯底就不過不失，都係蜆湯底，料就有啲洋葱、蛋同粉絲。銅鑼灣既韓嘉嵐就出色得多，個湯底好鮮，lunch時間去食好抵，推介呀。

其實我係貪小便宜，諗住有set就試下，我估叫返平時食既泡菜餃子同泡菜煎餅會好啲既，不過我以後都會去返總店食。

因為唔係好甘心俾多啲錢既關係，我就提議改去睇戲啦，橫豎我地都諗住睇Before Midnight。食飽就去iSQUARE 買飛，途經印尼餐廳，忍唔住買咗三件糕點。去到買飛，3點左右買都得返前三行，但照睇啦，唔係又唔知拖到幾時。

買完飛，就去K11行下啦，其實係掛住佢呀：

我近排真係好愛Glacio既雪糕呢，今次係Cassie & Cream同埋Espresso & Cream，又係好好好味。

行完K11，再行埋海港城，終於夠鐘入場喇。我第一次係度睇戲，一嚟就三級片啦，好緊張喎(你睇我幾低能)，個house細得嚟都ok喎，係每行隔兩級樓梯嗰隻，啲椅又幾好坐，我幾鍾意，第日都可以嚟睇。好啦，講返套戲先，片長109 mins，都係好似上兩套咁，講呀、講呀、講呀咁就完。好睇，但少咗嗰份浪漫，換嚟既係現實到不得了既無奈。唔喺度講劇情啦，但未睇過Before Sunrise 同Before Sunset，最好睇咗先去睇啦，雖然其實無睇又唔會話唔明，但對Jesse同Celine有愛既話，係會投入好多。三套我最先睇既係Before Sunset，又係我最鍾意既一套，跟住先搵返Before Sunrise嚟睇。

睇完戲，好多嘢諗，因為我會投入好耐，抽離唔到，所以好鬼怕睇啲殘忍戲同慘戲，會覺得好痛同好sad。但其實我又好鍾意睇戲…無奈。之後去咗食印尼餐廳，叫咗巴東牛肉同咖喱羊肉，跟咗個飯share，就係完滿同充實既一天 (尤期係個肚….嗚，要繼續努力呀)