打邊爐@舅父家 08/02/14
話說我上次去lee個舅父屋企都成10幾年囉，但其實成日見佢架，不過佢之前隻狗太惡，所以唔方便招呼人上去，咁隻狗狗都走咗一排，佢地就趁新年搞咗餐邊爐聚熱鬧下。
上人屋企，都要買啲禮既，我同朋友P揀咗：
Sogo都算有多款揀，掙扎咗一排，我地最後揀咗露之水滴。唔錯喎，甜得嚟幾清香，唔似甜王咁蜜甜，我鍾意。
揀完士多啤梨，見到隔離有：
朋友P話佢啲同事話好正喎，咁呀....又買嚟試啦。做咗自私仔，lee包留返俾我同朋友P自己食。食後感，又確係幾新鮮，咬落會卜一聲，味道就唔係好同美國嗰啲，係香啲啲既，但試過就算嗰啲囉。又或者，我有機會去 Tasmania 會試既。
去到舅父屋企，拜完年，就周圍參觀下，俾我見到佢：
我覺得佢係塑膠魚，唔係真架囉。唔知邊個話佢係年糕，係喎，又確係幾似。哈哈，聽舅父講話佢買嗰陣，lee條魚得吋半，賣俾佢嗰個人仲話唔會大喎，但而家有成12吋囉，好正。我地都吼咗佢好耐，先見佢郁咋，好like佢呀~~
好嘞，講返正題先，我地有9個大人，食咗咁多嘢囉：
仲有30隻餃子未拎出嚟，仲有三大筲箕菜：西洋菜，生菜同唐苛。仲有仲有，贊歧烏冬、日版出前一丁。湯底係用好多豬骨熬成，好濃。啲蝦雖然係冰鮮，但好甜好爽，但我地覺得咁大隻攞嚟淥好浪費，所以每人分咗半隻就算，留返嚟煮豉油皇大蝦仲好啦。其他嘢都好味，我仲試咗件鱔，ok啦，可能係我始終唔係太鍾意鱔啦。
拳友私房菜 09/02/14
經過噚晚既邊爐，再加上夜晚個晚既大餐等緊我，我真係出盡力去打拳既。上完堂，食咗少少嘢，我地去買埋少少餸，就直入天水圍拳友E屋企。我地6個大人食咗：
首先係 starter：
拳友T買既 black olive，對我嚟講，淡口咗啲，都係愛青欖多啲，哈哈，越嚟越重口味。拳友E焗既蜜糖七味雞軟骨，我唔like佢呀，因為佢令我食到唔停得口囉，有兩碟架，都俾我地清晒。
食完咁豐富既starter同飲咗啲wine，要抖下先，就同貓貓影下相先。佢瞓到好甜呀~~
抖完，又嚟過，首先出場係炆牛肋條，最好味係啲紅、白蘿蔔，見唔見啲白蘿蔔呀，啡咗色嗰啲呀，入味到呢，個個搶住食。咁啲牛肋條都好味，"林"得嚟又有得咬下，幾好。
蒜蓉炒菜心、焗一字排，lee個拳友E第一次整喎，佢真係好堅囉，個味好好，焗既時間又啱啱好，好叻呀佢。
跟住就係海鮮出場嘞，黃金大蝦，又係第一次整喎，點解可以咁好味架，係稍稍咸咗少少，但好香囉，搞錯呀，搞到我食咗兩隻之後，仲去啄啲咸蛋黃囉。仲有蝦乾魚湯浸白菜，食咗少少咋，因為已經好飽。
壓軸係粉絲蟹煲，當然大家又係搶住食啲粉絲啦，哈哈，不過我都食咗兩件蟹。食完LEE個，又係食胃藥時間嘞，5條女，1人2粒。
跟住就到甜品，係朱古力火鍋，我負責既，亦都係令lee個飯局添上咗少少缺憾，講真，我都幾唔開心架。我地買咗哈根大師既雪糕同士多啤梨，醬就前一晚整好咗既。
其實整個陣，都試過太熱搞到佢油水分離咗，以為唔用得，但調返溫，又救得返。去到翻熱既時候，已經提咗唔可以太高溫，但因為都好夜嘞，大家都好心急，所以翻熱過龍，又出現咗油水分離，之後就急救咗一輪，但都救得返少少，仲係油水分離，但勉強食到啦，真係唔敢影出嚟獻世。佢地對我真係好好既，咁樣衰都肯食，仲要安慰我，我都話我好愛佢地架啦。事後檢討，個sauce杰身咗啲，應該稀返啲，同埋一定一定唔可太熱。我會再試整，下年啦，下年一定整得好好味俾佢地食既。等我呀~~~~~~~~~
Lee餐係我地一年一度既私房菜，辛苦晒天才廚師拳友E，忙咗成晚，又煮又洗。亦多謝佢地對我嗰把鬼火鍋咁包容，我真係好鍾意佢地既啫。已經期待下年既私房菜啦，wakaka~~
倒數：距離北海道東京食、敗之旅仲有4日咋，好緊張呀~~
仲有呀，我嚟緊 lee 4日都應該無時間寫blog嘞，要返嚟先寫到，你地要等我呀，唔好離棄我喎~~ 仲有仲有，我好歡迎大家留言俾我架，因為呢，而家我知道既，就係得三個人睇咋，究竟係咪既呢，哈哈。
