急就章之關西自由行 2014 DAY FOUR (27 May 2014) PART TWO
食完雪糕，我地出發去梅田呀，無錯，因為我地又要 shopping 呀。我心目中已經有一個目標啦，go go go~~
咁第一站，梗係去食過晏先啦。阿拳友T話喺大丸食過一間幾抵既，咁我地又無諗到想到想食啲咩，咁跟食啦。大部份既 set lunch 都係千零、二千円左右，我同P揀咗兩個餐 share：
食飽就出發去伊勢丹血拼呀，但未到伊勢丹，途經大丸個超巿，P話啫喱呀，就衝咗入去買。係呀，咪就係上次喺北海道試過超美味，但又俾我阻止咗買嗰啲啫喱呀。今次重遇 (係嗰啲 promote counter 嚟架，仲要呢，係最後一日喎)，P嗱嗱聲入手買包大既雜錦味，諗住唔阻大家。點知呢，團友見唔肯點買嘢既P，衝住去買啫喱，忍唔住問P係咪正嘢，咁梗答係啦，拳友 T 試食完跟買包大既。原本諗住走，但其他團友又唔抵得，又試食下，一試又搶住買，最後仲要講到價，買咗好多包先走。哈，我覺得個叔叔真係要多謝阿 P 囉。臨尾一日，都幫佢清咗咁多貨。
去到伊勢丹，就各自行動啦。我同P先去搵 Pierre Herme 買 cake 食，無錯，我地上次食上癮喎，按此。但好可惜，lee 間係大阪唯一一間，係無 cake 賣架，泣。但我又唔想空手 (肚?)而回喎，就話試 lee 個啦：
食完，就去搵我既目標嘞，去到 Garcons 個 counter 見佢 show 大 size only，其實應該問佢仲有無size既，但再望下個價錢，又有 hesitation 嘞，所以最後都無問。跟住周圍行下啦，好多嘢都好靚呀，但都勁貴囉。所以我同 P咩都無買。不過就要等阿拳友J搞退稅囉，都等咗好耐呀。
之後，就去咗阪急，我都係去睇 Garcons，阿J先生就要搵手信俾人，我地喺一樓近 LV 個入去入既，嗰陣都6點幾，咁就約8點喺 lee 度集合返。去到 Garcons，又係無，但我見 sales 姐姐著住，膽粗粗問佢，佢就話入晒倉嘞，咁佢就入倉摷，跟住拎咗一太棟鞋出嚟，都係嗰個系列既slip on 同搭帶款。其實我想買白色既 slip on，但 size 唔啱，唯一一對啱既係搭帶款。其實呢，我一開始係 like 搭帶款既，但諗緊無咁好襯，所以就諗住買slip on，咁既然個天咁安排，哈，我就買咗對搭帶款，wakaka~~ 阪急有俾 tourist discount既，但嗰張 coupon 呢，就係喺 information counter 嗰度攞既，咁我唯有就撲落去攞啦。途經又見 CA4LA，我就叫 P 睇住先，我自己去拎鞋。攞完對鞋，我就同 P 回合，又 whatsapp 問下各拳友有無嘢夾退稅，因為我對鞋已經夠退，最後P都揀到頂帽。嗱臨同拳友E 同 P 去搞退稅，嗰陣都 7:50，好緊張。去到，好彩無咩人，拳友T 同 J 都過咗嚟，係唔見J先生。原來我睇錯咗佢張紙，佢要去阪神買手信，唔係阪急，所以佢地喺行勻阪急都搵唔到。J先生自己過咗阪神買，約咗喺LV嗰度等。退完稅，拳友E又見到嘢想買，咁拳友T 同 J先行去會合J先生啦。
好嘞，到買晒嘢，都8:10左右，條電梯封咗，無得上返LV嗰度，周圍望下，見佢地喺大門口等緊，仲衝過去，口快快問J先生買唔買到啦。點知，原來佢發緊脾氣呀，塊面好黑之餘，仲怒氣沖沖咁話自己等咗好耐，又聯絡唔到 (因為J夫婦無租咭)。Oh, my god!!!! 都唔知點收科之下，就話夠鐘去食飯啦，但又諗唔到食咩，咁就決定返去難波食啦。原本我想食S成日話好食既大阪王將，但佢地怕 J先生唔啱食，堅持食LEE 間，咁我同P叫咗 LEE 兩個 share：
無錯，係要食吉野家，P 揀咗咖喱牛肉飯，正常啦個味。
我揀咗sukiyaki，都ok既，係嗰啲麵條唔知點解一啲都吸唔到味，好怪囉。
嗰晚我同P落咗街行，之後就又join返埋一齊食宵夜，但明顯J先生度氣未消囉，唉~~
