食 @ 大澳東方小祗園、Pierre Herme

好開心，今日又得收早兩個鐘，上年無架，wakaka~~

聖誕節同臨近年尾真係食唔停。28號同29號我都食咗好鬼多嘢，即見自己脹咗，噚日仲驚見重咗6磅 (比起減到最輕既時候)，好彩今日回落返3磅咋。但係仲有3磅要還，我要係去台北之前搞掂佢先得 (無奈係下個月3號同7號都有局，oh，究竟我減唔減到嗰3磅呢？)

先講吓28號嗰日食咗咩先：

嗰朝一日起咗身，先食一件自製厚切餐肉(有成1cm厚)三文治先，茄汁加mustard，好味。跟住就長征入大澳，先撘1個鐘多啲既地鐡去到東涌，再撘9個字既巴士入大澳，撘咁多車為咩，咪為咗佢囉：

就係為咗隻鹽焗雞(@東方小祗園)囉，好味喎仲係，要預訂既，食完仲想食多隻，就問下有無佢話今次無預多，所以無得食lu。我地仲叫咗好多嘢食，不過一啲得 (茘芋茸卷、紅燒豆腐、椒絲腐乳炒唐生菜)，一啲普通 (生炒排骨、羅漢齋炒麵)、唔得嗰個就係我好期待既腐皮卷，以前好好味架，今次唔熱，又淡口。我覺得上兩次去食好味啲，可能無咁多人，今次full house，仲有人擺咗3圍，嘈到呢。不過，嗰日天氣好好，lee班舊同事又好好 (我食3次都係同lee班朋友，哈哈，佢地都係癲的，肯撘咁耐車入去食)，所以我都好開心。

食飽，去咗大澳街市行過圈，朋友P買咗炭火雞蛋仔一齊食，都幾香蛋味，我又買咗個糯米糍獨食，都幾好味，就撘返車出去嘞，你都咪話我地唔傻。撘車睇到有人係fb po marcaron，搞到好想食，途經香港站，就衝咗上ifc，又敗咗：

有個吉位係因為姐姐話白松露嗰個好濃味，會影響到其它，叫我地即場食喎。哈，個白松露味又確係幾趣怪，我唔會話佢好味，但又唔係唔好味囉，好重白松露味，似食緊咸點咁囉，幾得意。另外有一個鵝肝朱古力既，又係好趣怪囉，嗰朱古力帶有少少鵝肝既味，P話有啲似餸味喎，wakaka。等我再講一次，佢啲果味 (今次有檸檬榛子片 & 熱情果朱古力)真係做得好好，甜中帶酸，好balance囉，其他既咖啡呀、朱古力、栗子都好味。朋友M嗰日都買咗7粒，佢話好鍾意呀，我好開心囉。

買完唔願返屋企，撘船過咗海港城，又係食，先喺little mermaid 買咗個芝士橄欖包，之後就去咗食coco curry，嘩，你話點會唔肥吖。

今日係2013年既最後一天，回顧一下都有好多開心事：

3月去咗巴黎同倫敦，第一次去西歐，開頭無咩期望，但最後我愛上了巴黎，去完已經好想再去，多謝朋友P擴濶我既眼界。

6月同啲拳友去咗曼谷，十幾年無去，好好玩，尤期啲拳友真係好好，又好玩又好脾氣，我發咗老脾都對我好好，我對佢地唔住，下次唔敢嘞。

仲有好多大大小小既飯局，唔同圈子既朋友都對我好好，令我覺得自己都好幸運。

仲有仲有，就係寫返blog，雖然我寫咗幾個月，yahoo就話執笠，哈哈。我知起碼有3個人會睇我個blog，會俾啲feedback我，又真係好開心。希望你地唔會離棄我啦，wakaka~~

仲有 x 3，我用咗6個月減咗25磅，我覺得叻呀，wakaka，不過我要再叻啲，今次一定唔可以俾佢翻脹，我會乖既。

新既一年，希望大家都身體健康，開開心心，我呢，就貪心少少，健康開心之外，仲希望事業運再好啲囉~~

倒數：距離台北趕住食之旅仲有11日 (個心已經飛咗去)
距離北海道東京食、敗之旅仲有48日 (見4字嘞，但咩都未plan，wakaka)

聖誕之食與敗 - home party & 長洲一日遊

今日要返工喇!!! 唉，咁凍，堅唔想喺嗰被竇都爬出嚟呀，泣~~ 返到公司，無咩人返工囉，我估啲客都無咩邊個會返工，相信今日嗰電話都唔響既喇，都好，等我清埋啲paper work同filing先。

今個聖誕節，由吵鬧回歸平靜。24號嗰日，公司搞party，說實話，啲到會嘢幾難食，不過我都食咗唔算少，因為入到去，無咩嘢做，扮下食嘢就唔駛social咁多嘛。跟住就係玩集體遊戲，又係嗰唔會想玩既遊戲，但人大咗，知道有啲時候要放低自己，所以啲組員叫到，我都肯出既。玩得就想贏，又俾我地嗰組拎到第一喎。奬品係零食加啲X’mas hamper既嘢，都好，起碼用到。我見有枝細細既champagne，細細支啱我同P今晚飲喎，就問啲teammates，我拎走得唔得，佢地話ok喎，哈哈，原來付出真係有回報架，GOOD!!!

喺個party入面真係又嘈又熱，無既，啲人玩得癲吖嘛，我都到無晒電，好彩夜晚無咩特別節目，得我同P既home party (無錯，無人約2人組)。P抵得諗，佢話佢放假負責煮，咁我梗係贊成啦。餐單有：

頭盤：巴馬火腿伴烤車厘茄、芝士、橄欖

主菜：白松露醬牛肝菌長通粉

餐酒：半島香檳375ML一枝

哈哈，都話我酒量差架啦，飲咁少都wing wing地添。好彩有仲有湯飲咋。其實煲羅宋湯原本都係喺個menu入面既，但我地怕飽(我又怕肥)，咪諗住留返25號飲，但好想飲啲熱湯囉我，所以又舀咗兩碗飲，飲完真係舒服晒。

25號起身飲湯，就出發去長洲。係呀，我好想聖誕去離島行一趟，嗰日睇雜誌介紹nitti-gritti，咁就入長洲囉。我地先去ifc買咗啲嘢食。

去咗petite Amanda買咗個 croissant donut raspberry favour，近 croissant 既質感啲，都幾甜，不過中間啲 raspberry jam夠酸，中和返，都幾好味。星巴克嗰杯係 mocha praline，叫咗少甜都係好甜，我諗我堅唔鍾意飲mocha囉。仲有喺 little mermaid買咗個意大利雜菜餡角，都好味。

去到碼頭，我有啲怯喎，多人到呢。哎，都出到嚟，咁照去啦。好彩我地一早排定上船咋，原來係會無位架，不過其實係可以補錢上豪華位既。坐咗差唔多一個鐘船，15:00左右，終於到啦，嘩，多人到似旺角。因為食咗嘢既關係，我地決定先搵嗰間nitti-gritti。開咗個google map，都唔係好識路，仲行過咗條街都唔知，但咁啱又經過啲人話啲糕點好食既新照記，咁買舊紅豆糕食下啦，嘩，唔得囉，好多粉，都幾難食。見啲人仲話似紅豆沙做成既，我估佢地未食過深少埗坤記嗰啲囉，我同P食咗啖就丟咗嘞 (我知折墮，但真係唔好食到唔想嘥quota)。

跟住搵到條街，來來回回2次都搵唔到間舖，最後決定喺個分岔口度行入去睇睇，好嘢，終於搵到佢啦。間舖唔大，但啲嘢都幾得意。我地最後帶咗佢地返屋企。

敗完，又去搵食，食咗故鄉茶寮既紅豆餅同手卷，以前覺得好味架，但而家覺得唔好食囉。之後去咗甘永泰食咗串炸豆卜，原本仲想食蝦丸或者魚蛋既，不過賣晒喎。串豆卜ok啦，但唔係話特別好食囉。食完就出返香港lu，趕到17:30班船，但見到個碼頭已經逼滿人，所以我地都係俾多10蚊撘豪華位算。出到香港，去咗金鐘食Triple O’s，好味。

倒數：距離台北趕住食之旅仲有15日 (台證都搞埋)
距離北海道東京食、敗之旅仲有52日 

又係食 - 韓嘉嵐 & 自煮新題目

又凍、又聖誕節既關係，我呢，又食咗好多嘢同敗咗好多嘢呀。唉，好怕過完個聖誕會變成肥鬼同窮鬼囉。

上文提要話試新嘢既，咪就係試咗喺阿信屋買既韓式BBQ醬囉。我見近排好多blogger買咗嚟煮嘢，話好好味，咪又唔執輸試下啦。我參考咗啲食譜，再自己調下味，又ok好食喎。

lee隻醬有辣同唔辣揀，我買咗個price tag係寫微辣既，但都幾辣下，食唔到辣既應該頂唔順嗰隻。雞柳就用啲醬同酒醃咗先，炒咗啲洋葱、雞脾菇，再落埋啲雞柳去炒，最後再落烏冬，加啲醬、木魚汁同少少豉油炒勻。開頭試食，好似爭啲嘢咁，但第二日lunch食，又幾好味喎，可以再煮囉。今次係我試下隨意咁煮，煮到出嚟都ok好味，我好開心囉，同第日可以大膽啲去煮喇。

星期五仲收到lee份嘢，好靚呀，個calendar就俾咗拳友E，盒cookies就分咗啲俾同事，味道ok啦，不過個罐幾靚，朋友P已認頭要咗。

星期六去咗百年兌咗啲台幣，費事喺嗰邊兌，又懶去搞提款咭去海外提款，去得3日，兌咗少樣嘢煩。兌完，就撘船去尖沙咀食同敗囉，又食譚仔、雪糕嗰啲，夜晚就乖乖咁食生果同牛肉球，跟住做運動。哈哈，之不過做完運動，我又去食咗好多印尼餐廰買既蝦片 (唔怪之得做極都無再瘦啦)，恨食咗好耐，emm，又真係好味過超市買嗰啲架，好味。

星期日食咗包，就去打拳，原本諗住打得落力啲，但奈何嗰日個師傅令我有啲 hea......落堂就去咗韓嘉嵐食lunch (lee個就係諗住打得落力啲既原因囉)。叫咗個我大愛既豆腐海鮮湯同埋炆牛肋骨，點知個牛肋骨唔夠入味既，嘥咗錢同quota添 (早知聽P建議叫人參牛排湯或泡菜煎餅啦，我對阿P唔住添)。行咗一陣街，無咁多錢敗，就不如去食個tea啦，去咗pret，食咗個應節 log cake + sea salt caramel latte (ok好味啦)。夜晚無咁多quota，就食咗veggie salad with ham同埋嗰幾粒朱古力，lee間我都好鍾意，買咗4粒都$92，貴啲逼我食少啲呀，都好既。

其實，朋友P都有試新食譜，上星期五同今日既lunch，一白一橙pasta：

白色嗰個係用咗腰果粉、松子同雞柳煮既，係瘦版cream sauce，哈哈，都好好味 (當然無cream咁好味啦，但瘦版喎，好重要架嘛)。橙色 lee個係泡菜雞柳 pasta，好惹味，好好食，縱然俾同事話咗句我啲飯盒成日都橙色，但好食又健康，我又鬼咁鍾意食，你理我吖~~

聽日公司叫到會開party喎，都好，食完等收工，我估今年都有得早放兩個鐘啩，期待ing~~

倒數：距離台北趕住食之旅仲有19日 (仲爭台證未搞咋)
距離北海道東京食、敗之旅仲有56日 (行程一啲都未 plan，不過應該會去廸廸尼，haha)

試新嘢 : 和食@ 和三味

噚日去咗同客食lunch，又係半公半私，即上半部份做公事，下半部份吹吹水啦。今次試和三味，好似鐵板燒出名，但我地傾公事嘛，所以揀咗食和食，方便傾嘢嘛，都好多個餐揀架。咁凍，我同個客都揀鍋食。我嗰個係牛肉柳燒鍋(唔知有無記錯)：

Emm，我覺得味道唔算出色，但又唔難食既，價錢係$180，未加一。咁既價位，可以唔去lee間囉。

返到公司，見到有兩隻火雞，客送架喎，雖則話一番心意啫，但3點幾喎，2隻喎。我覺得我啲同事算叻喇，食剩大半隻，但都係做咗大嘥鬼囉，哎呀，我唔想做大嘥鬼喎，佢咁醜。

噚晚原本就去打邊爐既，點知星期一晚收到通知，被放飛機了，個理由仲幾奇。我就無咩，但其中一個成員就憤怒了，留了一段言喺個gp度就left gp了。我都有嘗試去安撫佢既，但無用，佢覺得無得返轉頭，咁就算啦，一個gp就散咗lu，都有啲可惜。食唔到邊爐，諗住食kiwi同青蘋還下債啦，畢竟經過週末既狂食同星期一既做節飯(又係叫爸爸生日嗰個餐，不過就加咗個咕嚕肉，因為我好想食呀)。不過呢，最衰咁凍啦，搞到我忍唔住要食熱嘢，最後食咗個香辣海鮮杯麵同埋kiwi做晚餐。食飽就要做運動啦，雖然好凍好唔想郁，但唔得啦，所以我還是乖乖的完成咗，我覺得自己好叻呀。

今朝有半條粢飯做早餐，好味，但今日得9度咋，單位數字噃，我覺得我需要一杯熱飲喎，所以我又去買咗杯cappuccino，當然係我最愛既whole fat milk啦，有杯熱飲，真係覺得好幸福呢。Lunch就係P煮既pasta，一貫的好味道。今晚我要出山啦，我都懶咗好多日，心思思想試新嘢，睇下最後會唔會整先。

死啦，我好驚我今晚都係敵唔過天氣凍食熱嘢既誘惑呀，話說今日我既腦海都不斷出現碗仔翅，唔好啦，我堅想食生果餐還債喎

倒數：距離台北趕住食之旅仲有24日 (其他兩間餐廳都訂埋位喇，微熱山丘都訂埋，好期待)
距離北海道東京食、敗之旅仲有61日

吃吃吃的週末

近排好鬼凍呀，搞到我想食嘢既慾望激增，泣~~

上星期五，又有份嘢收到，今次係 agnes b 既 gift box，因為我 on the list，同事叫我揀一份，其餘俾老細，咁咪攞咗盒似最正常架啦。點知一開，原來我揀咗盒最唔正常囉，choco tree 一棵，好彩我都係諗住請同事食，咪打碎佢，請人食啦。又好彩啲同事唔嫌棄佢打碎咗個樣啫。上網睇到 lee 棵 tree 零售價要 $350，(長18cm，厚2cm左右啦)，係咪真係會有人買???

味道ok啦，agnes b 既朱古力一向唔係我杯茶。

恨食小籠包好耐，捉咗朋友P去翡翠食，emm，退步咗呀，死啦，咁我仲可以去邊度食呀？

小籠包個皮夠薄，但個味差咗，個吉碗係酸辣湯，飲完先記得影，lee個 keep 到，上海粗炒都好味，係油咗啲，但叫得粗炒，預咗。

星期六，天陰，但都好想出街，因為我好想食勝香園既茄麵。12點半左右去到，都要排一陣。佢啲茄麵偏酸，啱我口味，啲牛肉又醃得好味，似阿媽整嗰啲，我耐唔耐都會想去食下，仲share食個檸蜜脆脆同凍檸茶，滿足。夜晚諗唔到食咩，去咗食酸辣粉，叫多個泡椒鳯爪，咁又一餐。我地食緊個陣，見有個staff整咗啲辣入眼，佢洗完出嚟，都係又好又腫，但佢求其搵塊棉花蓋住佢，繼續開工，但眼喎，好重要下架，可唔可以俾佢抖一陣呢又~~

求求其其食過晚餐，因為好戲在後頭，我地食飯前去咗 Pierre Herme 買嘢食，不過今次無買macaron，我地試新嘢：

8粒小小的朱古力，承惠$198 (我諗無記錯啩)。我覺得幾好味，尤其係有檸檬、橙味嗰啲，無論係朱古力定係macaron，佢都處理得好好，好refreshing。

星期日去咗打拳，因為好想食自助沙律bar，去咗UCC食，食到幾飽。不過行咗3個幾鐘街，又凍又攰，就去咗pret share咗碗湯飲。原本就應該返屋企食 veggie salad with parma ham (default咗逢星期日晚食嚟清腸胃既)，但因為凍、又唔想咁快返屋企、又就嚟冬至，所以我就提議食埋先返屋企啦 (係咪好多excuse呢我)：

去咗囍宴食，又係叫胡麻芥辣日本溫室蕃茄同擔擔拉麵，不過今次都試咗新嘢，花雕話梅雞翼，甜咗少少，肉實咗少少啦，但都 ok 既。食飽飽，去咗行 Great，都幾好行，又多嘢睇。最後買咗兩個 mini tart 做dessert (真係超級mini，直徑4cm左右啦)，cherry crumble 嗰個好味，另外嗰個 pecan choco 就普通啦 。

今晚會同屋企人做節，聽日有個 business lunch，夜晚就同舊同事打邊爐。唉，咁食法，我好怕會翻肥喎~~ 唔得，星期三、五、六，我要食生果做晚餐同埋做返運動先，但嚟緊會繼續咁凍，我怕我堅持唔到呀。wish me luck la!!!

好靚呀~~

噚日去飲茶，食咗好鬼多嘢呀：2粒燒賣、1粒牛肉球、1/4份咸薄罉、5粒燒腩仔、1粒炸雲吞、1條春風得意腸粉、仲有一個叉燒包，食完頂頂地，又唔係飽，係滯滯地咁，但好滿足囉，因為我餓咗飲茶都幾耐嘞 (上次飲係1個月前...)。

夜晚去咗打拳，都有盡力，但個胃頂住，打得都有啲吃力。打完拳，個胃又好返喎，咁就去食咗個剩雲吞，原本有諗過唔食既，不過見食到，就食啦，唔好俾自已慣咗食太少嘢。食到飽飽返屋企，噢，有我近排迷上了既熱浪薯片喎 (係呀，以前唔鍾意食，而家又覺得好好味喎)，忍唔住又食咗好多塊，仲要飲埋之前換既VLT (致肥毒物，但耐唔耐飲，又覺得好好味)。結果呢，又搞到個胃頂住囉，好彩屋企有太田胃片先救我一命咋。

今朝返到公司，見有份嘢喺個tray度，拆開睇，嘩，駛唔駛咁靚先。之前已經收到一個幾靚既，而家要我揀用邊個都有啲難。hehe，但我估我會用lee個囉。

lunch 又有朋友P煮既 pasta啦，美味之餘又唔會食到個胃頂住，讚呀。今晚就去翡翠食小籠包，期待中。

倒數：距離台北趕住食之旅仲有29日
距離北海道東京食、敗之旅仲有66日

減肥繼續？之 Tea Cake @ J'AIME BIEM PATISSERIE

其實我 lee兩日，我都有乖，夜晚都食咗生果，做咗運動，希望可以繼續減磅既。但真係俾啲虛磅，不斷上上落落，搞到有啲無癮。唉，其實生日月都叫平安過渡，但到咗12月，啲節日氣氛湧埋嚟，又加上減肥減咗5個月，而家成日心思思想食嘢開心吓，仲有好幾個gathering，唉，我都唔知點算添......

好啦，又講下我食咗啲咩好嘢先。lee幾日啲早餐都好豐富喎，有包，有蛋糕呀，之前我食幾匙 yogurt 就算架啦嘛 (因為我要留返啲quota 喺公司食零食)，所以佢地令我好有滿足感喎，但最慘既係，滿足還滿足，我都繼續食零食，emm，咁唔係幾好喎......

噚日lunch同咗朋友S食元氣again，因為想佢教我用部 Z1，佢俾咗好多有用既APP我喎，又解答咗我啲問題，真係好，我而家已經有少少鍾意咗部 Z1嘞，你話吖，朋友幾緊要呢。不過呢，唔知點解同朋友S食元氣，會食多啲架，噚日食咗9件壽司加一客芝麻豆腐喎，都幾 full 吓。跟住下晝要出街做嘢，喺上次講過嗰間J'AIME BIEM PATISSERIE 附近，搞到我心思思想食佢個 tea cake，但買一條又確實太多了。諗住算數啦，點知同我老細推介既時候，佢就話一人一半，因為佢都想試，但又覺得佢同佢老婆會食唔晒。咁我梗係話好啦，哈哈，今次又係佢請，其實我真心想俾返錢佢，有啲唔好意思嘛。anyway，多謝老細啦，雖然我唔認為佢會睇到我啲blog，呵呵。

噚晚要急不及待切咗一塊做dinner，之後就食多個奇異果同青蘋，應該收口既我仲食咗薯片啦、薯圈啦、朱古力啦，我諗我係時候要減返啲零食份量先得，咁落去會好危險架。剩返嗰啲就同朋友P今朝當早餐食咗lu。

今日lunch係朋友P煮既 pasta，佢話用咗paprika powder、olive in chilli 同 dried chilli 煮既，新口味，又好好味喎。

聽日有得飲茶呀，期待中又帶點心虛，唔得，要從零食嗰邊著手先得。

倒數：距離台北趕住食之旅仲有31日
距離北海道東京食、敗之旅仲有68日

食 @ Assaggio & 秀 AND 敗敗敗

上文提到上星期四食咗個豐富既早、午餐之後，我覺得好鬼飽同滯 (雖則話呻飢莫呻飽，但堅係頂住喎，真係要講出嚟先舒暢啲)，原本夜啲都覺得好啲架啦，但一上堂，郁兩郁，我又feel到好頂，所以呢，嗰晚打完拳，我都係飲咗杯熱檸水就算。但返到屋企，我都食下薯片呀，朱古力嗰啲零嘴。

星期五，諗住返到早工，可以join啲拳友放工去打拳，拳友J話lunch之後book，佢幾次都 book到既。咁就放心去食我個 business lunch啦，去咗奧海城間 Bene 食，啲嘢食都ok既，唔可以話好食，但都可以啦。我見有得打拳，就肆無忌憚咁食咗：一件 parma ham & arugula pizza、5 - 6塊ham with melon、一啖仔pasta、好多條薯條 with truffle cheese，仲有幾啖甜品同杯凍檸茶，食到好飽啦，但諗住有得打拳，應該都ok既。點知呢，拳友J覆返話，無位喎，Oh no，死得啦，早知就唔食咁多薯條啦。但唔食都食咗啦，都無辦法架。

到夜晚，就去食埋今年最後嗰餐 bday dinner，去咗我想試既 Assaggio @ mira mall。我地2個女仔食咗：bread basket、veggie & cheese既 starter (唔記得嗰名，係有嚿 homemade 既 cheese，跟住俾啲客揀5款veggie、ham & pear salad、grilled pork chop 同 1 個 hazelnut ice-cream & mousse with coffee jelly (又係唔記得名)。emm，lee間啲嘢就真係幾好味嘞，尤其係個 pork chop，無論個texture同味道都好好，你知啦，好食既豬係好難搵，難過遇到好食既牛好多架，所以呢，我會為咗lee個豬再嚟食囉。其他都好味，係個salad細份咗啲啫。

食咗lee兩餐之後，我覺得自已脹咗呀，可能大家都會覺得誇，2餐咋喎，但我星期六朝磅，真係重咗1.6磅，我知可能係虛既，但我既心都好虛囉。咁既形勢，星期六係咪要節制下呢，sorry，又無喎。一早起身食咗yogurt同啲零食做早餐，就趕住去剪頭髮，今次keep住短，但同上次有啲唔同，我覺得都幾好睇。跟住就去咗食譚仔，今次唔叫雞翼嘞，因為之前嗰日啲嘢仲漏緊，2個人食咗個米線套餐 + 尖椒皮蛋，都幾飽下。跟住去咗敗衫，玩咗半個鐘，就揀中咗2條裙，同一件OP，埋單$2,500。敗完衫，又去咗買印尼點心、韓國壽司卷，仲要去K11食咗杯雪糕。

之後就去咗衛訊睇 Sony Z1，原本想問下價錢先，但問咗又覺得價錢 ok，咁就買埋啦，因我部 4S 已經成日自已re-boot，睇嚟都到期。Trade 咗部 4S，買咗張記憶咭，埋單$2,8XX。部電話都幾難用，可能真係太慣用 iphone 嘞。又，我一直都有用 Line，儲咗啲sticker，點知我無 register 個e-mail，而家咩 stickers 都無晒嘞，傷心咗一陣架。不過好彩朋友S送返1 set 俾我做 welcome gift，哈哈，你真係好既啫。細佬都話送返俾我，但未收到囉......

敗晒啲錢，無咩嘢做，就去咗秀食晚飯，其實都有諗過食嗰啲點心同壽司卷做晚餐既，但諗起秀個泡菜餃子，又好想食。咁又去睇下有無位啦，都唔知好彩定唔好彩，有位囉。咁又唔好意思剩叫餃子架，又叫咗個石頭飯囉。之後就食埋嗰兩件印尼點心，怕壞，條壽司卷留返星期日食啦。

嘩，已經好長嘞，就咁講下星期日食過咩啦：朝早食麵包、lunch 吔 pret、tea 就食咗東方小祇園既齋鴨腎 (堅好味，大推)、半件紅豆糕同星期六買落既壽司卷。dinner食 veggie salad with ham、芝麻豆腐、半包薯片。宵夜食咗半個yogurt pudding。經過幾日既狂食，噚晚上磅，我重咗3.2磅呀!!!!

所以嚟緊 lee 3晚，我會乖乖的食生果做晚餐，我唔想啲虛既變咗實呀，減磅真係難架嘛。

其實我仲減緊肥架喎..... @ greyhound cafe

我今日食得好飽呀。今朝約咗人開會，9:20會合同事去咗 Habitu，飲咗杯 cappuccino brulee (whole fat milk 呀吓，但堅好飲，大推)，又食咗1/4個 raisin scone，1小件朱古力 brownie (跟cappuccino既)，再加兩啖 croissant，比起我平時食 3 spoon yogurt 做早餐，lee一餐簡直豐富到暈。

開完會，都係11:30左右，但老闆話有嘢傾，就食過 early lunch 傾啦。去咗 greyhound。Emm，啲嘢食都ok既，但覺得 Bangkok 好味啲囉，又平啲。不過，我今次試咗佢杯 iced lemon tea (我喺bkk 揀咗 lime soda)，甜咗少少，但又真係幾好味既。

兩個set lunch+ 單骨雞翼，3個人分。starter我揀咗洋葱湯，味道ok啦，老細叫咗 ceaser salad，好細碟，我無試，不過望落正常。main 我地就叫咗西冷 burger，都幾有牛味既，薯條都 ok，仲有個香草辣椒炒雞肉飯，我一向都好鍾意 lee個飯，lee 度煮得 ok啦，又唔係最好食嗰啲囉。出名既 iced lemon tea 好味，但單骨雞翼味道就不過不失啦，係好方便食咁囉。

返到公司，見有份gift喎，好靚，但我估應該唔好食囉，哈哈。

見仲有兩聲咳，啜咗包批杷膏(偷朋友P既)，直接啜，唔駛洗 spoon 呀，係咪懶到死呢，hehe。唔知啲同事見到，係咪覺得我好怪相呢？

今晚去打拳，要出力啲打先得呀，要 burn 晒今日啲 fat 呀。

倒數：距離台北趕住食之旅仲有37日

距離北海道東京食、敗之旅仲有74日

衰既走晒，好既返嚟~~

好嘞，噚日終於裝咗個新熱水爐，聽返朋友P講，其實過程都係一波幾折，亦都有啲手尾要跟，但開水喉就有熱水用，實在覺得太幸福了。

好啦，又講返有啲咩波折先，上文提到唔夠位裝爐既問題已經喺星期日解決咗，只係之後要再睇下點樣執返好個企缸。噚日煤氣師傅上嚟裝爐，一睇就話我地條熱水喉塞咗，唔夠水壓打火，唔係好想幫我地裝，咁朋友P就堅持裝咗上去先，點知真係唔夠力，咁朋友P就叫師傅睇下有咩幫到我地啦，求咗佢一陣，佢就唔知點樣整咗啲沙石出嚟，勉強可以打去到火，但條喉都係塞，要較到最大火先著到，但都會沖沖下無咗煤氣。所以呢，都要搵五金師傅上嚟搞搞條喉嘞。不過都好彩朋友P堅持咋，我覺得而家一開水喉有熱水真係幸福過煲水太多了，嗰啲斷斷續續，OK接受到喎。

搞完晒個爐，朋友P就會合我去太興食晚飯，好耐無食過炒嘢，叫咗個福建炒飯，我知好多人唔鍾意lee個飯，但唔知點解我又好鬼鍾意喎。

仲叫咗塊例牌叉燒，嗰啲燶燶既真係好好味囉，一次半次唔怕啦。

個飯就"不"咗兩啖先記得影相，哈哈，都幾多料既，又幾好味啦。

雖然幾好味，但我地兩個人食，都每樣食剩半碟，又唔係話好飽，係覺得有啲漏咁。所以呢，我地就打包咗，分咗兩份 for 今日 lunch囉。係咪好慳，好唔浪費呢？不過呢，今日返叮，見啲叉燒出油出得好犀利，個盒洗咗幾次先洗乾淨，出面啲嘢食真係好油呢，耐唔耐食下好了。

噚晚返到屋企有做stepper同鄭多燕架，不過做完又食返塊panash既提子合桃曲奇、1/6件Mrs. Fields 既 blueberry cream cheese ring cake、幾粒choco pearl 同幾塊薯片囉，我呢，真係好為食既啫。

倒數：距離台北趕住食之旅仲有39日

距離北海道東京食、敗之旅仲有76日

明明係生日月喎，點解???

話說11月係我既生日月，上半個月都過得好開心架喎，生日嗰日仲有啲好好既親人請唱K同食海鮮架。點解過咗個生日就急轉直下先？ :-(

俾我呻下幾慘：生日之後，我唔小心患上氣管炎，已經唔算拖咗好耐先去睇架啦，醫生亦唔敢怠慢，即開抗生素過我食，點解過咗兩個星期都仲未清得晒架？而家啲菌真係好惡呀，我前後睇咗兩次西醫 (7日抗生素)，再加一次中醫，total 睇咗我$500呀 (西醫已經係panel doc，不過公司既 insurance plan 真係好cheap囉，睇panel都要補幾十蚊)。最衰既係，因為咁耐都無病好，housemate 朋友P終於頂唔住我啲惡菌，俾我傳染咗，我堅係內疚呀。

LEE個醫師開啲藥真係好好好難飲，不過我上次啲痰未清都係佢幫到我，咁唯有再睇佢啦。3日6劑，我都乖乖咁飲晒 (雖然好幾次真係好想唔飲...)

病住都慘架啦，點知上星期四沖涼嗰個熱水爐突然就長休嘞 (雖然其實佢之前都通知(壞)咗好幾次)，咁我地嗰晚煲水沖涼啦，係咁凍既天氣下，真係......好啦，星期五晚朋友P趕到去煤氣公司落order，叫佢星期六嚟裝，諗住都係捱多一晚煲水啦。點知呢，師傅上到嚟一睇，話個浴屏擋住，唔夠位裝，仲要無一個爐啱裝喎。吓，咁點算呀？我又無可能拆咗成個cubical架，但我又唔可以無熱水shower喎。我個刻真係呆咗，咁同我舅父(佢幫我間屋裝修)商量，決定拆咗個浴屏，轉浴簾囉。好彩我舅父都好鍚我既，星期日就上嚟幫我拆，而家諗咗第二個辦法，總之夠位裝新熱水爐，之後舅父會幫我執返好啦。今日晏晝會裝嘞，希望一切順利啦，finger crossed (亦都要多謝朋友P喺佢忙既時候攞半日假等安裝，我呢，一早敗晒啲假 lu)。

12月嘞，我諗啲衰運會走架嘞，呵？

上星期五，病住都去咗打邊爐，今次同S公司啲舊同事，又係去新東記 (哈哈，係呀，我唔覺悶呀，次次都去LEE間，hehe)，係除咗我食舊千層豆腐，俾啲湯刺激到我氣管狂咳之外，跟住個樣好樣衰之外，成餐都食得好開心呢。我地仲約埋今個月尾去大澳食雞添，期待中，呵呵!!!

佢啲餐肉、三黃雞同味菜胡椒豬肚湯好好味，大推呀。

今日lunch有朋友P煮既炒烏冬，又係好好味。唔知聽日有咩lunch食呢？

倒數：距離台北趕住食之旅仲有40日
距離北海道東京食、敗之旅仲有77日

自煮 - 吉野家風豚肉飯

我而家好眼瞓呀，但又想寫blog喎。哈哈，其實我係唔識喺office瞓覺，對手會好痺既。

噚晚我放咗工，去咗超市買餸，今次試煮新嘢：吉野家風豚肉飯，又係出自鬼嫁既食譜，調味跟足，但材料我就無放咁多豚肉，但加咗半塊蒟蒻去煮，但牛油都跟足5g囉。嘩，一落牛油去個平底鍋，香到呢。因為我無LC用呀，所以啲時間都自己調節咗。

我自己覺得唔太似吉野家既味(可能我改動咗)，但都好好好味，又好香牛油味，lee個可以encore喎。

煮完飯，就乖乖去做stepper同鄭多燕，噚晚狀態好多了，所以我都可以做足晒，跟住搞東搞西，搞到1點先瞓，所以而家咁眼瞓囉...

倒數：距離台北趕住食之旅仲有45日 (噚日send e-mail問馬辣訂位啲嘢，佢叫我去前一個月先訂，因為只係接受一個月內既訂位，已經mark低schedule啦。我堅掛住馬辣呀。)

距離北海道東京食、敗之旅仲有82日。

減肥 - 繼續生病篇

好慘慘，我仲未病好呀，已經睇咗兩次醫生，食咗7日抗生素啦，點解啲菌咁頑強架，仲要俾啲同事問係咪減肥過咗籠，所以病？大佬呀，我減肥減咗5個月啦，係都之前就開始病啦，硬係要關我減肥事既，激死~~

好啦，又講下我lee兩日做過啲咩啦。星期六出咗尖沙咀，去咗iSQUARE食烏冬，都係食咖喱烏冬同牛蒡牛肉烏冬，再加天婦羅魷魚同腐皮山葵壽司，其實次次都係叫lee啲，今次再食，覺得自己真係最鍾意食佢個腐皮山葵壽司。跟住去咗攞衫，係呀，又係上上上個星期去睇，又係無我size，朋友P啲款又咁啱有佢size，有得即刻拎，我就要等，次次都係咁既。今次拎完，無再睇衫就走，因為嗰度好得人驚架，睇親都有嘢想買，但我要儲錢呀，真係要停一停先得。為咗食藥前有嘢食，去咗印尼餐廳買蕉葉檽米雞同 "擦字膠"，兩樣都好好味。夜晚諗唔到食咩，食咗譚仔三哥，咁又一日。

星期日如常去打拳，打完去食pret，真係我Sun既飯堂，而家天氣涼，我地就飲湯加個熱三文治share，今次叫 New York Deli，melted cheese、mustard、酸菜同牛肉，真係好好味囉。係銅鑼灣行咗陣，見仲早，去咗太古坊個Island East Markets，我無咩嘢啱買，剩係買咗件lemon poppy seed cake，都幾好味。仲有一個counter幾吸引，係買burger既，但我己經食咗lunch，無幫襯喎。其他stalls呢，food stall 都係賣cake、cookie、tea、coffee，又有好多stalls係賣有機菜，都幾多人買。仲有啲賣手作既，但有啲都幾流下，同埋都係啱鬼佬口味多啲。所以呢，我地好快就閃咗。夜晚就食咗parma ham rocket salad，都係咁好味。11點零其實都眼瞓架嘞，點知瞓落，覺得自己好唔妥，成晚流汗，成身濕嗰隻，但又唔敢唔蓋被，成晚就係抹汗，出汗，抹汗，完全瞓唔到。

星期一病情好似嚴重咗，因為之前嗰晚無瞓過，好攰好攰。晏晝要同啲老闆出街開會，一齊去咗食澳門茶餐廳，叫咗碗茄腩通，唔好味既。好辛苦咁捱到放工，返到屋企食咗朋友P煮既蕃茄煙肉磨菇意粉，嘩，好味過lunch幾鬼多。

食完pasta，就做stepper啦，一路做一路覺得有啲唔妥，但都做夠 45 mins，跟住做鄭多燕，做咗一半頂唔順，流住汗，但覺得有啲凍，拿拿臨走去沖個熱水涼。睇埋黃子華，就乖乖去瞓啦。瞓到咁上下都feel到又想流汗，好彩後尾都無，一覺瞓到天光，瞓夠狀態好好多。

今日lunch又係蕃茄煙肉pasta，不過係olive同chili，都好好味 (特別鳴謝朋友P臨時拉扶幫我頂咗煮飯，原本噚晚係輪到我煮架)

倒數：距離台北趕住食之旅仲有46日。

距離北海道東京食、敗之旅仲有83日。

生病中 - 慶生 @ BBQ 7080

雖然我病咗，但lee兩日我過得好開心呀，又等我講下lee兩日做過啲咩先。

星期三朋友S過來同我食lunch，我地又去咗食元氣，因為我好想食壽司，不過唔知係咪啲藥好削胃，搞到我成日都好鬼餓。朝早其實已經食咗半條粢飯，lunch前仲食咗塊餅乾，但我去到元氣都食咗成10件壽司再加一份芝麻豆腐，但都唔係好飽，但平時食7-8件壽司已經可以KO我架嘛，我真係好鬼驚病完會肥幾磅。夜晚去咗食粥，炒麵同1/4條油炸鬼。嗰日無做運動呀，真係太攰嘞。

朋友S割愛送俾我既禮物呀，好開心。佢話難得係同好喎，所以送俾我，多謝朋友S。

噚晚去咗打拳，跟住去咗BBQ7080慶生。係呀，病住都去咗食韓燒，我都知唔係幾乖架啦，但因為間嘢都難訂位，我又見好返好多，就去啦。今次都叫咗好多嘢食：有五花腩、豬皮，辣豬腸、牛舌、濟洲豬肉、仲叫咗個海鮮豆腐湯同辛辣麵，不過今次堅唔敢飲酒啦。食飽仲去咗食甜品，食咗少少咁啦。

今次無咩影相啦，因為同上次叫既都差唔多，不過真係幾好食。

今日lunch 係自煮既雞柳牛肝菌甘筍炊飯，今次加咗飯呀，上次唔係好夠食。唔，一樣咁好味囉，又易煮，我都幾愛lee個食譜。

今日我又攞咗sick leave，雖然精神好多了，但有好多鼻涕，把聲又好核突，兼且又無晒藥嘞，所以都係抖多日啦，我好怕拖得耐呀。原本都驚係餐飯惡化咗個病，但醫生話進展都ok (咁我又梗係無主動話俾醫生聽我咁抵死去食韓燒啦)，佢話希望我睇埋今次，食晒啲抗生素，唔駛再去睇佢喎，阿醫生真係幾好。

死啦，我好似肥咗好多呀，唔知係咪因為病食多咗，定係病到有啲水腫，又或者係我親密朋友又要嚟探我，所以重咗呢，我梗係希望係後邊個兩個啦，唔想真肥吖嘛。一陣食完藥要去瞓覺，今晚食生果同做運動，希望還下債，可以力挽狂瀾啦。

倒數：距離台北趕住食之旅仲有50日，今次去3日咋，真係好趕住食架，哈哈。

距離北海道東京食、敗之旅仲有87日。

原來有兩個倒數係好開心既呢。





減肥 - 生病篇

由6月尾開始減肥，都減咗4個幾月，托賴，都無咩話唔舒服。不過，今日我終於打敗仗，泣。話說生日嗰日唱完k，已經覺得自己喉嚨有啲唔舒服，嗰陣仲以為唱完k，喉嚨乾啫。星期六仲係乾乾地，都係諗住天氣乾燥啫。去到星期日晚，連個鼻入面都有啲嘢頂住頂住咁，都知死架嘞。捱到今日，終於攞咗日SL，去睇醫生啦。醫生話我等咗咁多日先去睇，個喉嚨腫晒，要開啲勁啲啲既藥，又因為我有啲氣喘，都係開隻輕既抗生素我食喎 (因為我之前都試過氣管炎，搞咗好耐先好)。唉，都係麻煩啦。

你睇，幾多包藥吖，陰公!!!

原本今日約咗朋友S食壽司架嘛，我想食好耐嘞，而家改咗聽日，我估食咗藥，一陣瞓返飽，應該會好返啲卦，我唔想再延期噃。咁今日lunch食咩好呢，就食原定聽日食既薑燒豚肉炒烏冬，都係跟鬼嫁既食譜，調味同做法參考咗，材料我就用咗烏冬一個。洋葱一個，甘筍一條同豚肉4片，分咗兩餐囉。lee個食譜好在可以用屋企啲leftover，又易煮，味道都好好。

夜晚我都係諗住食青蘋同kiwi，仲有方包，一來唔係好有胃口，二來又唔想再煮或落街買。係諗緊仲做唔做運動啫，個人好似好攰咁。不過呢，我噚日都有乖乖的，我諗晏啲啲可能做少少啦，而家我要去瞓喇。

倒數：距離北海道東京食、敗之旅仲有90日。

慶生 - k lunch、鯉魚門海鮮

Hello，幾日無見，唔知有無人掛住我呢，呵呵。

講返我lee幾日做過啲咩先。上星期五我生日呀，一如過往，我攞咗假，不過我都有喺慶生節目中做咗啲啲公事啦，我都覺得自己超乖。一早起身hea咗一陣就出門口喇，第一個節目係同我爸媽、二姨、三舅母同十姨去唱K-lunch呀。我發覺人大咗，都鍾意同啲親人多啲時間一齊，就算佢地唱啲歌，我唔識，我唱啲歌呢，佢地又唔識，都好愉快咁過咗4個鐘。其實有個地方聚下，傾下偈，食下嘢，簡簡單單都會開心。因為佢地話我同二姨都係11月生日，佢地幾個請我地兩個喎 (其實我想俾架，當中得我一個人做緊嘢賺錢嘛，不過呢，我覺得有時俾佢地請下，佢地會好開心，我諗我係佢地眼中都係小朋友，even佢地其實又知道我已經好大個)。我整咗抹茶牛乳布甸做回禮，好彩佢地都鍾意食啫。我十姨仲整咗個健康蛋糕俾我地，係南瓜茸可可蛋糕喎，my first bday cake，但食落似鬆糕囉 (希望佢睇唔到我lee篇blog啦，haha)，味道都可以架。唱完K，就去咗做咗啲啲公事啦。

似鬆糕既蛋糕，稱不上美味，但份心意堅令我開心囉，多謝十姨

做完公事，就趕去鯉魚門食海鮮，我其實都遲咗5分鐘，但都係最早嗰個到囉，我屋企人既time management 真係好差，好彩今次唔係等咗好耐佢地就到啫。今餐六個大人一個bb食咗：豉油皇大蝦、椒鹽瀨尿蝦、蒜蓉粉絲焗扇貝、蒸瓜子班、椒鹽鮮魷、豉椒炒蜆、炒菜、瑤柱蛋白炒飯，食唔晒呀，真係好飽，但啲嘢又真係好好食，海鮮呢，都係鯉魚門最好味，不過堅貴囉，多謝爸爸請客。最後仲食埋芒果、車厘子同阿嫂同姪女送既蛋糕，飽到我星期六都仲滯住呀。

星期六飽到唔想出街，不過好想食即食麵，所以煮咗個嚟食，跟手仲要吔下零食咁啦。哈，我真係將減肥拋得遠遠了。不過呢，瞓完個晏覺 (無錯，食飽，唔做運動，喺度上網，眼瞓就去咗瞓，懶到不得了)，個心有啲歉，夜晚都係食返個沙律好啲，今次我地單買火箭菜，佢配埋啲 parma ham，真係好夾，我下次都買火箭菜先。食完 hea 到十點幾，先至去執衣櫃，今次狠心咁掉晒啲唔啱著 (鬆) 既褲，返得工嗰啲都照掉，到要著既時候再買囉。朋友P"提醒"我，要 keep住喎，唔係又要洗好多錢買過啲衫褲，仲要係嗰啲我唔鍾意既返工衫。Emm，我會乖乖的 keep 住架喇。

星期日打拳，好彩都夠盡情，脂肪 (少少啦) bye bye，打完去食pret，其實我真係幾鍾意食pret，咁梗係唔係話日日食啦，一星期一至兩餐，我都ok架。食飽，行咗陣，就要返家準備今晚去飲同事結婚嗰餐。ER，我都好戥佢開心，不過老實，擺酒間嘢啲嘢食都幾難食，好多嘢我都食咗一啖就停口，所以都唔會好飽。咁可能都係好事嚟既。

今日有朋友P煮既炒烏冬做 lunch，今日食返啲家常嘢，覺得好好味，口味真係變咗喇。今晚我又回歸減肥既懷抱嘞，原本話過達標就開始keep既，但我又想賺多少少buffer喎，所以計劃有變呀，飲食就無咩變，都係有借有還，係運動，原先諗住一星期做6日減到4日既，而家就今年12月31日前就一星期做5日啦。

倒數：距離北海道東京食、敗之旅仲有92日。

(hehe，而家我有個 pop up idea，搞得成既話，會早過北海道東京食、敗之旅呢，不過而家可以做既只係finger-crossed)

自煮新題目 - 雞肉&牛肝菌炊飯、綠茶布丁

噚晚原本想食個青蘋同kiwi晚餐，點知無晒kiwi賣嘞，咁就唯有食青蘋加啲零食就一餐啦，我買咗lay's salt & vinegar 薯片呀，呵呵。食完就嗱嗱聲試新食譜，第一道係參考 Masa (http://www.masa.tw/) 既食譜：雞肉&舞菇炊飯。我煮咗一杯米，用咗一條甘筍、4條雞柳同屋企有既乾牛肝菌，調味就按比例減咗2/3，即係用咗1/3既分量。啲牛肝菌好香，洗同浸既時候已經好香，放咗入飯煲煮更香，真係好愛佢個味道。

啱啱煮好嗰樣，係咪幾好樣咁呢。

分咗4份，同朋友P各帶兩日。味道都幾好，不過我嫌啲雞柳硬咗啲，唔知係咪我叮得太耐既關係呢。

煮落個飯，就挑戰另一個食譜，我又係跟鬼嫁既：宇治綠茶布丁，不過我買唔到宇治綠茶粉，用咗普通綠茶粉咋。味道呢，好滑，都幾香，最好係佢唔太甜，我好鍾意喎。不過唔知係咪我攪得唔勻，所以有啲沉澱咗，但味道又無咩分別喎 (底同面味道一樣喎)。好，等我星期三晚再整一次，星期五請我媽、姨同舅母試下先。

整完晒啲嘢，洗埋碗都成10點半，都有閃過唔做運動既念頭既，但唔得呀，又食咗macarons，又食pudding，肥死啦，所以都乖乖的做咗stepper同鄭多燕 (不過最後嗰兩組偷懶無做，因為都成12點嘞)。但最抵死係，我見朋友P開完OT返嚟，買咗燒賣，我要咗佢兩粒，跟住又食咗青豆條同薯片，食到個胃有啲頂住，要食胃藥先瞓到，你話我係咪抵死吖。

今晚又要出尖沙咀做嘢，又諗起酸辣粉喇，點解我硬係鍾意食啲咁無益既嘢既啫，真衰。

倒數：距離北海道東京食、敗之旅仲有97日。

達標的禮物 - Pierre Herme

話說我減緊肥既時候 (查實而家仲減緊)，同朋友P講好想食Pierre Herme既 macaron，佢好豪咁講話減到目標就請我食喎，嘩，人生難得真正朋友呀，wakaka。所以呢，當我上星期四一達標就即報喜訊啦喂。哈哈，上星期六就去咗揀我既禮物嘞：

wakaka，好開心呀，有12粒呀，但我好乖架，今次分幾日食，想當年 (其實幾個月前咋嘛)一次過食6粒呀，即係成3碗飯既熱量。so far 試咗9隻味，係唔鍾意蜜柑青瓜 (就係奇先試下，但堅唔鍾意佢好重既青瓜味囉)，其他都好味，當然當中有啲係好好好好味啦。我同朋友P都愛佢既 macaron 多過 Laduree，覺得佢味道多層次啲。所以我試過佢嗰啲後，都無買 Laduree。不過，佢最唔好係要你買box set，至少要7粒，唔係咁flexible囉 (喺 Paris 同 London 都可以散買架)。而家剩返3粒咋，即係得返1粒半，因為我要朋友P同我分肥吖嘛，哈哈。不過每次分開佢地既時候，都會搞到佢到有啲核酸......我對佢地唔住囉，泣

除咗買咗啲咁放縱既禮物之外，我上星期六晏晝就食咗譚仔三哥，因為朋友P想食，作為macaron 既金主，點都要同佢去食啦，夜晚就去咗美麗華食 izumi curry，貪佢無咩人。

叫咗 ceaser salad，夠多醬，菜都ok新鮮，好味但都幾肥，個咖喱飯不過不失啦，我都係鍾意食coco curry多啲。

星期日就要食light啲，lunch食咗pret a manager，dinner就 homemade veggie salad with parma ham 同麻醬凍豆腐，雖然支麻醬係低脂既，味道都ok喎。

今朝就食咗1粒macaron同埋去星巴克換咗我份生日禮物做早餐，lunch就食lee個囉，好味呀，不愧為 pasta expert 呀，朋友P。

我的第二份生日禮物：cappuccino by 星巴克 (我估都應該係最後一份啦，因為我同啲朋友興請食飯，唔興送禮物架~~)

egg pasta with chorizo and olive in tomato sauce，簡單但好味

預告：今晚我試新食譜，聽日話俾大家知成唔成功啦，hehe~~

倒數：距離北海道東京食、敗之旅仲有98日 (雙位數啦，很期待呢~~~)