講返我lee幾日做過啲咩先。上星期五我生日呀，一如過往，我攞咗假，不過我都有喺慶生節目中做咗啲啲公事啦，我都覺得自己超乖。一早起身hea咗一陣就出門口喇，第一個節目係同我爸媽、二姨、三舅母同十姨去唱K-lunch呀。我發覺人大咗，都鍾意同啲親人多啲時間一齊，就算佢地唱啲歌，我唔識，我唱啲歌呢，佢地又唔識，都好愉快咁過咗4個鐘。其實有個地方聚下，傾下偈，食下嘢，簡簡單單都會開心。因為佢地話我同二姨都係11月生日，佢地幾個請我地兩個喎 (其實我想俾架，當中得我一個人做緊嘢賺錢嘛，不過呢，我覺得有時俾佢地請下，佢地會好開心，我諗我係佢地眼中都係小朋友，even佢地其實又知道我已經好大個)。我整咗抹茶牛乳布甸做回禮，好彩佢地都鍾意食啫。我十姨仲整咗個健康蛋糕俾我地，係南瓜茸可可蛋糕喎，my first bday cake，但食落似鬆糕囉 (希望佢睇唔到我lee篇blog啦，haha)，味道都可以架。唱完K，就去咗做咗啲啲公事啦。
似鬆糕既蛋糕，稱不上美味，但份心意堅令我開心囉，多謝十姨
做完公事，就趕去鯉魚門食海鮮，我其實都遲咗5分鐘，但都係最早嗰個到囉，我屋企人既time management 真係好差，好彩今次唔係等咗好耐佢地就到啫。今餐六個大人一個bb食咗：豉油皇大蝦、椒鹽瀨尿蝦、蒜蓉粉絲焗扇貝、蒸瓜子班、椒鹽鮮魷、豉椒炒蜆、炒菜、瑤柱蛋白炒飯，食唔晒呀，真係好飽，但啲嘢又真係好好食，海鮮呢，都係鯉魚門最好味，不過堅貴囉，多謝爸爸請客。最後仲食埋芒果、車厘子同阿嫂同姪女送既蛋糕，飽到我星期六都仲滯住呀。
星期六飽到唔想出街，不過好想食即食麵，所以煮咗個嚟食，跟手仲要吔下零食咁啦。哈，我真係將減肥拋得遠遠了。不過呢，瞓完個晏覺 (無錯，食飽，唔做運動，喺度上網，眼瞓就去咗瞓，懶到不得了)，個心有啲歉，夜晚都係食返個沙律好啲，今次我地單買火箭菜，佢配埋啲 parma ham，真係好夾，我下次都買火箭菜先。食完 hea 到十點幾，先至去執衣櫃，今次狠心咁掉晒啲唔啱著 (鬆) 既褲，返得工嗰啲都照掉，到要著既時候再買囉。朋友P"提醒"我，要 keep住喎，唔係又要洗好多錢買過啲衫褲，仲要係嗰啲我唔鍾意既返工衫。Emm，我會乖乖的 keep 住架喇。
星期日打拳，好彩都夠盡情，脂肪 (少少啦) bye bye，打完去食pret，其實我真係幾鍾意食pret，咁梗係唔係話日日食啦，一星期一至兩餐，我都ok架。食飽，行咗陣，就要返家準備今晚去飲同事結婚嗰餐。ER，我都好戥佢開心，不過老實，擺酒間嘢啲嘢食都幾難食，好多嘢我都食咗一啖就停口，所以都唔會好飽。咁可能都係好事嚟既。
今日有朋友P煮既炒烏冬做 lunch，今日食返啲家常嘢，覺得好好味，口味真係變咗喇。今晚我又回歸減肥既懷抱嘞，原本話過達標就開始keep既，但我又想賺多少少buffer喎，所以計劃有變呀，飲食就無咩變，都係有借有還，係運動，原先諗住一星期做6日減到4日既，而家就今年12月31日前就一星期做5日啦。
倒數：距離北海道東京食、敗之旅仲有92日。
(hehe，而家我有個 pop up idea，搞得成既話，會早過北海道東京食、敗之旅呢，不過而家可以做既只係finger-crossed)
我!!我呀~~我有掛你呀~~生日快樂呀~~~~~
回覆刪除下你地又幾好喎~~~同爸媽一齊唱k我真係未試過~~~~好新鮮~~
無錯~~我都覺得鯉魚門d海鮮好正~~~~
咦~~好緊張喎~~~唔知成唔成呢~~~希望你去得成啦~
哎呀，好開心呀，有你掛住我，多謝呀，仲有多謝你既"生日快樂"呀，我嗰日過得都真係幾快樂。
刪除哈哈，我媽超鍾意唱k架，我之前放假想陪下佢，問佢想飲茶定唱k，佢一定揀唱k架，好搞鬼。
係啦，都係鯉魚門好味啲，不過真的幾貴下。
仲未知呀，等緊消息，希望係好架啦。