懶人推介 - i-chef 醬汁

今朝抱住驚驚既心情上磅，wow，我要減既磅數終於去到single digit，仲有9磅，希望lee兩個半月可以減到，送自己一份生日禮物啦。
今日原本帶咗朋友P煮既sundried tomato 雞柳炒通粉既，但朋友M約食lunch，好啦，盒通粉流返聽日食啦 (其實我好期待架，因為我真係好鍾意食sundried tomato)。原先諗住一不做二不休，揀咗Pokka Café，但等咗成20分鐘都未有位，就轉軚去咗夢見屋食啦，今日食香蒜橄欖油煙肉意粉，賣相唔好，所以無影相，味道都唔係好好咁囉，我都係愛佢既茄汁，因為真係好夠酸，不過我好多朋友都嫌太酸囉。
講完啲無聊嘢，想介紹之前係曼谷買既醬汁，真係超方便，仲要係好好味嗰隻。

Lee包係打拋醬，我上次無影相呀，lee張相係出自互聯網既。上次我買咗包露荀去炒去皮雞脾肉配糙米飯，好好味，係咸咗啲，下次可以落多少少菜或瓜去炒 (但一定要配飯食，齋食會咸死)。

上星期日就用咗lee包醬，個味係酸酸地，少少辣辣咁，隻酸係青檸嗰隻。今次係茄子豆角炒去皮雞脾配糙米飯，我仲加咗隻指天椒加辣。都好味，不過同朋友P一到認為打拋醬勝出，好味啲呀。
我諗住搵日去九龍城睇下有無打拋醬賣，入定啲，想食都可以隨時煮囉，hohoho~~
我仲有兩包冬蔭功醬，試完再話俾大家聽好無食啦。

食玩@ 銅鑼灣 Fashion Walk

繼 lee 幾日癲咗咁食咗好多 evil food ( 有太興既星洲炒米同餐蛋麵、大阪王將既拉麵同餃子、傷心酸辣粉、澳門茶餐廳既咖喱排骨飯同 mos burger 個新吉列豬扒包，咁梗係仲食咗少少薯條啦 ) 之後，今日既 lunch 同 dinner 要乖乖的食自己煮的菜菜嘞。今次係用現成的鰹魚汁加 sukiyaki 汁煮的，好好味既呢。聽日又到上磅記錄日，叫做盡下人事啦，唉，我仲有 10 磅要減呀。

上星期四收到個 event invitation ，個 event 係喺銅鑼灣既 Fashion Walk 搞既，主要都係啲商戶提供下啲 discount 呀，仲有啲免費飲飲食食咁囉，希望 draw 吓啲人流去嗰度消費。 Walk-in 既要收 $200 入場費，會捐去 charity ，但收到 invitation ，上網登記就可以 waive 咗，咁我梗係登記啦，唔係話唔想做善事，但我會捐俾自己想捐嗰啲機構囉。咁啱，朋友 P 嗰日要去拎返改咗既衫，咁我梗係問佢一唔一齊去啦， 1 個人去會悶架嘛，佢又 OK ，好嘢，有人陪。

登記完，有個goodie bag 俾我地既，check 吓有啲咩先，係 有唔同商戶既discount coupon，講緊係啲85折呀，買滿$1,000平$100嗰啲，都唔吸引既，咁就仲有一支vitamin water，紅色既，係夏晨嗰支呀 (其實我係耐唔耐先睇衝2，但都知佢係紅色既，啲植入式廣告真係過咗火喎)，朋友P嗰袋就仲有一小包黑麥既cookie，我就無囉，好彩佢都有分俾我食，又係幾好味喎。八卦完，就行去第一個Counter，叫beyond desert，guest係可以喺 cupcake、pop cake、icing cookie同rice cracker pop度楝一款，我地就揀咗icing cookie同rice cracker pop。個樣好似幾靚咁，但真係…難食囉。

跟住就出發去搵我最想試既 LOLA'S ICE POPS (http://lolasicepops.com/)，因為之前都見唔少 press 講過佢啲雪條係全天然，又好足料，都想試下，難得有得免費試喎，hehe。有幾隻味揀，我就揀咗 Pina Colada，朋友P原先想揀Chocolate Fudge，我就多口講咗話，好似果味出名啲喎，佢就本住既然免費，就揀啲特別啲既Lavender Lemon Cream，咁難食都無金錢上既損失嘛，好受好多，又啱喎。唔，我個支呢，好refreshing既菠蘿味，但又食唔到椰子味，都幾好味既(但我食完之後，個喉嚨有痕，我估係佢可能連埋菠蘿芯去搾汁)。朋友P嗰支呢，聞就聞到好香既Lavender味，但食落去，係淡味同無咩味，失望。仲有既係融得好快，食得幾狼狽下。如果問我會唔會俾原價$30再食，我諗唔會囉。不過，如果大家追求天然食品既話，都可以試下。

食完雪條，又去咗 le grand cafe 試食 parma ham同ice coffee囉，emm，兩樣都唔好味囉，仲要接待嗰位小姐好唔耐煩，唔鬼想接待，又好似我地貪咗佢便宜，咁點解你地又要join個event呢？我諗我一定唔會幫襯lee間嘢。跟住見到對面有個counter，玩抛豆袋，咁又玩下啦，結果係兩個都失敗囉，安慰獎係玄米茶一支，哈哈，唔蝕底既我就梗係去換啦，朋友P原本諗住唔換既，因唔like玄米茶，又嫌重，但上到去都換咗，送咗俾我囉。見剩返啲活動都係試下食咁，都唔想去lu，就係max value間大阪王將食個late lunch。見唔係好餓，就叫咗個辣麵豉野菜拉麵 + 餃子再加一個叉燒沙律 share食。

叉燒唔好味，菜就有沙律醬，都好難唔好食 (除咗唔鍾意食沙律醬啦)

餃子一貫水準，但個麵就好詭異囉，所有嘢都好淋，好似俾鹼水溂過咁，我食咗細半碗，朋友P就食咗幾啖就唔食lu。明明上次食都唔係咁架~~~

食飽，再check下有無嘢漏，見irregular choice有free gift，又去8下啦，但佢得返一份，咁朋友P就讓咗俾我，THANKS!!!

臨走，見有個counter 換 apple cider，又去換咗支，朋友P因為飽，諗住唔換 (因為佢好得意架，飲嘢會飽過食嘢)，但我俾佢試咗一啖後，佢覺得幾好味，又換咗一支。哈哈，好耐未試過同佢飲嘢喇，好開心囉。不過唔知做咩，飲完，我塊面紅到關公咁喎，4.5%咋喎，平時同啲朋友飲sake、紅白酒都無咁架喎，仲要之後撞到熟人，嘩，好核酸呀~~

之後，我地就去咗Shopping，又敗咗件衫、1對襪同1條裙，哎呀，我仲要儲錢架。敗完，就去咗pret a manager 食小龍蝦三文治，好味~~

好好味既桃哈多

終於寫完個遊記，完成到一件事都幾開心架喎。咁之後有無咩嘢寫呢，唯有寫下啲日常生活啦，不過，我真係怕會悶親人喎，哈哈。

LEE幾日都有 lunch appointment，所以都無時間寫blog，原本想寫下星期六去咗既一個活動。不過，我而家趕住要做stepper同拉筋，所以寫個快既先。

其實呢，只係想介紹lee個桃哈多俾大家。lee隻日版桃哈多係同屋朋友P喺759阿信屋買。個味係 orange caramel 味，見個包裝好鬼靚下，但又諗緊可能又係甜死嗰隻，所以呢，我都無搶住開來食。等到朋友P開，嗰陣我就忙緊做運動，又見係特大粒嗰隻(我鍾意正常size的，因為之前食過特大粒既好甜)，所以都無理佢啦。點知朋友P話好好味喎，咁我又梗係唔執輸啦。嘩，一食，真係好好味囉，少少酸，橙味同焦糖味又夠香，真係大愛。朋友P第2日就去買多2包，一包留喺屋企，一包俾佢啲同事。係好好味，佢先會咁快去買，同埋請佢啲同事食咋。

 

$15.8，有會員咭有9 折。

你睇下，佢真係好鬼大粒，好味好味。

(唔好意思，唔知點解喺notebook 啲相轉咗，又轉唔返，激死我啦)

曼谷喪食喪打之旅2013 DAY SIX (16/6/2013)

噚日出咗街做嘢，之後流落尖沙咀，諗住返屋企煮菜食，但又諗起好耐無食傷心酸辣粉。唉，唔理喇，我要去傷心一次呀。

傷心酸辣粉中辣、凍檸茶少甜少冰。無叫其他嘢呀，因為之前試過佢其他嘢都唔係好好味，係得個酸辣粉好味。其實之前譚仔三哥有賣酸辣粉，仲好味過lee間，不過佢停售咗好耐lu。

經過LEE幾日既放肆，今朝上磅都好鬼驚吓，好彩都係同上星期四一樣，無重到都執身彩。今日晝晏要乖喇，但聽日同星期一又有lunch局呀，點算好呀？

日式炒野菜，都係參照鬼嫁既食譜，但唔係好啱我口味囉。

曼谷喪食喪打之旅2013 DAY SIX (16/6/2013)

成個旅程既最後一日喇，真係好唔捨得呀。今日係撘13:45既 EK384，ARR 17:35。撘咁既時間，都無得出去玩架啦，咁就約咗9:30起身食下早餐，執下嘢，預10:45 - 11:00出車啦。

都叫做瞓得幾好，不過就俾個太陽照醒，8:00左右起咗身。奇就奇在我瞓最埋邊，離窗邊最遠，但又剩係照醒咗我囉，可能我醒瞓啩。見咁好陽光 (咁多日最好天係今日)，原本想叫醒佢地去游水既，因為拳友E好想係陽光下游一次，但見佢地瞓得咁酣，又點捨得叫佢地起身吖。咁我做咩好呢，咪又係打下機，上下網囉，所以話，張咭一定要買。玩手機玩到咁上下，佢地終於起身喇。拳友E見咁好陽光，真係話想游水，但9:30喇喎，真係好趕囉，所以無人肯陪佢。

今朝既早餐係噚日買既柚子，非常的飽滿，可恨我無影低相吖，仲有芒果同乳酪。食飽飽，又周圍巡下仲有無嘢漏，就落樓叫酒店CALL的士。今次要CALL兩架細喇，因為之前拳友J夫婦係喼中喼來，但而家已經堆滿晒兩個喼，大車無可能載得晒我地。因為早啦，所以都無塞車，11:30左右已經到咗機場，兩架車加埋都係 760 baht。

入到機場，梗係要望下板，睇下個counter係邊啦，嘩，一望，拳友J講咗句"頂" (唔記得exact wording喇，但意思就一定係頂囉)，跟住塊面黑晒，因為我地變咗16:15 先 DEP，delay呀原來。點解拳友J會咁大反應呢，因為佢買咗今晚SJ Concert既飛，仲要最貴既飛，成HK$1,700，俾我都肉痛死啦。佢原本仲諗住大把時間，可以同老公係香港機場食個晚飯先去會合啲朋友睇show，唉，總之仲戥佢慘啦。不過，我真係再次佩服拳友J既EQ，佢真係黑咗面一下，唔係好開心咁啦，但無發脾氣喎，俾著我，塊面一定黑到玄檀咁，仲要發脾氣個隻囉，我真係要學習一下先得。

有排都無得上機，但又唔可能撘返車出市區架，咁入閘先囉，先有嘢食同有嘢行架嘛。入咗去，拳友E同T要去退稅，咁剩嗰啲又諗吓食咩囉。原本想還返一餐日式既俾拳友T既，但都唔知邊間好食，咁拳友T話都係食MANGO TREE啦，起碼識佢。我地就去MANGO TREE 食啦，又係嗰啲蝦餅呀，沙律，但唔准再叫冬蔭公喎 (其實呢，我仲未厭架，雖然日日飲，我覺得我真係傻架囉)。但就俾我叫PAD THAI 同牛丸河囉，好嘢，我終於食到牛丸河囉，我之前已經恨食架啦。啲嘢食都OK好味啦，不過我估出面啲MANGO TREE可能仲好食啲，唔知有無人試過，可以話我知呢？

食飽就行下啦，但睇來睇去同試(食)來試去都係嗰啲嘢，好鬼悶呀。係見到NARAYA，係LEE 度譯做曼谷包囉，咁啲自由行又係度搶買，真係咁鍾意買嘢咩？好似唔買會蝕咁喎。

行行下，又望下個板啦，變咗16:25喎，又遲多10分鐘。唉，早知就游個水啦。其實我地唔知佢有無SMS俾人話delay既呢，因為我地都換晒啲泰國咭，所以唔知係收唔到定佢根本無lee個服務。好辛苦咁捱到16:00，去boarding gate等，咁有個餐盒派下，三文治、水、蛋糕同啲朱古力咁。但最緊要既係我地入到去，仲未見到架機囉，即係無可能16:25飛啦。等、等、等，17:00啲crew先到，17:10左右先見架機，最後係17:45左右先起飛。其實我地都係悶到死啫，最慘都係拳友J，又悶又蝕。上到機食咗個餐，睇咗套side effect，啲critics話唔好睇，但我又覺得ok喎，仲有係個女主角好靚呀。

不過呢，lee程機啲flight attendants 真係唔得囉，我地有諗過係咪我地混入咗啲自由大帝入面 (無錯，我地回程係俾啲自由大帝既團包圍住既)，所以一同受歧視呢。好似佢地派毛巾俾人抹手，抺完要收返，有需要以短跑既速度經過嗎？坐係走廊位既拳友T伸咗兩次手都俾唔返個收巾員!! 跟住派餐，問佢攞white wine，佢話 "no"，吓，啱啱先睇住佢開支酒俾前三排既客咋喎，好，算，我要coke，佢話"pepsi"，就擺咗落我手度，吓？我呆咗囉，以我撘機既經驗，佢無，唔係叫其他attendant補給俾佢既咩，乜會就咁塞啲嘢俾人既咩？唉，都算，落機個下先最經典。話說啲attendants會一人企一邊同啲客講bye bye 架嘛，佢地係就係企打對面，但完全唔理啲乘客，係度傾偈喎。我以為佢地唔pro啦，但人地老公係我地後邊，隔咗幾個鬼佬，佢地一見鬼佬，就pro到爆，笑住同佢地say bye，咁分明係大細超啫。嗰一刻，大家都話要black list lee間公司，但後來經拳友J分析利弊 (無錯，最受害嗰個，你話，佢真係理性得恐怖)，我估如果下次都係得阿聯酋同港航，我都係揀返阿聯酋，sorry呀，港航，Sam哥都幫你唔到呀。

個晚等埋行李，都成11點幾先返到屋企。好彩，拳友J 21:30都去到會場，睇到75分鐘，叫做唔駛蝕晒啦。

偷懶呀~~~

哈哈，lee兩日無寫blog呀，因為有午飯局呀。

星期一出開街做嘢，又遇著朋友P清假，所以約咗佢去食 AL MOLO，我愛的意大利嘢呀。

第一次坐對住個海既位，之前3次都係坐入面的。

其實lee碟嘢已經係第二碟啦，因為攞咗第1碟之後，我已急不及待咁放晒啲嘢入口lu，跟住已經提自已第2碟影啦，但可惜我都係食咗兩啖先記得囉，你看我多貪吃。parma ham 同 rocket 係 enocore 既，我真係堅鍾意lee兩樣嘢呢。

剩係記得係Risotto with italian sausage & ricotta salata，用red wine 煮既，又係貪吃囉，"不"咗一匙先記得影相，仲要搞到佢碟邊污糟晒。我第一次係lee度食risotto，又係好味喎。

最後又係latte作結，佢杯latte都幾苦吓，真係要加糖先飲到。埋單先係$360，$180 一位。

星期二就約咗朋友S啦，又係佢過來同我食元氣喇，約佢5次都有3次係元氣喎，好似。佢今次係過來攞7-11印花，希望佢換中佢啲心水啦。

好多人喎，所以要撘枱，我地2個同3個女的打對面坐，都幾怪咁囉，不過都唔係坐咗好耐，因為朋友S要早啲返去搞啲嘢，咁忙都過來同我食飯，我好開心喎。

2人份~~

用我愛的芝麻豆腐作結，雖然麻醬好肥，但我好LIKE囉。

因為LEE兩餐，我噚晚學完游水，剩係食咗青蘋果同奇異果咋，當盡下人事咁啦。星期四就係每周上磅日，我好驚呀~~

我想對自己好啲呀，所以都落咗啲紫蘇汁，叫做無咁寡啦。(但其實我食完之後，都偷食咗啲零食架，唉，貪吃鬼......)

曼谷喪食喪打之旅2013 DAY FIVE (15/6/2013) (PART II)

噚晚打完拳，去咗食泰菜，係拳友E既生日飯嚟既。因為無炸魚既關係，佢地就叫咗燒烏頭。其實我一直都唔食烏頭架，不過，噚晚試咗，原來都OK喎，咁我又識食多一樣啦。人真係要試多啲先得架，以前唔鍾意既，原來都有機會變鍾意架。好似乳酪，我以前又係唔肯試的，但去完曼谷，試咗又OK喎，而家朝朝當早餐食呀。

DAY FIVE (15/06/2013) (PART II)

因為今日6點要係酒店嗰區做THAI MASSAGE，所以都唔諗住周圍走，食完飯就諗住返去酒店游吓水，跟住去做MASSAGE啦。但我又見咁近Emporium，我就提議去睇下有無超市啦，我仲想睇下有無嘢可以買吓。去到Emporium，都幾舊吓，又無咩指示，咪問下啲staff 有無supermarket囉，跟住佢話 fifth floor 喎 (如果無記錯)。上到去，都係啲高級超市 feel，無咩特別嘢想買返香港lu。咁就買下啲嘢食做宵夜同聽日早餐啦，因為聽日一朝早就要走喇。行過嗰ham 櫃，咁又買吓啲ham啦，仲要俾我見到美味的olive，但原來唔係個個都鍾意食既，得我同人地老公鍾意，但你知佢地幾咁好架啦，都俾我地買呀，yeah!!! 見買得差唔多。我就話想落去行玩具部，因為我見到 Rilakkuma，佢啲 Rilakkuma 靚呀，因為係日本版囉，噢，無理係泰國買貴咗既日版架，唉，好想買到嘢俾朋友S呀。

無嘢買，會合埋啲團友就走啦。咁我地就撘 BTS 返去啦，因為怕塞車呀，我地酒店對出條路係塞車塞到癲架，LEE啲3點左右既時間，我地真係唔夠膽搏呀。返到去就游水啦，今次有人地老公一齊游，指點咗我地幾嘢。咦，我好似有啲開竅喎，所以呢，今年既目標就係學識游水囉，希望我得啦。

游完水，沖過涼。就慢行去Body Tune啦，做身2個鐘，650 baht，要俾咗錢先既。入到房，我覺得都幾舒服，跟住都係洗下腳，師傅來按摩啦。開頭覺得佢無咩力咁，咪同佢講 can be a bit harder 囉，點知死喇，佢一俾力，嘩，痛到我呀，但又無理由又即刻講返 gentle 啲，按多兩下，睇下點啦。都係keep住大力，但又慢慢接受到，咁算啦。(不過呢，佢跪落嚟嗰嘢，真係堅到想喊)。按完，我其實都唔識要俾幾多貼士(係咪好低能呢)，問過啲團友，就決定俾100 baht。我地仲驚唔認得自己嗰師傅，但其實佢地係會排成一行，見我出去，個師傅會出來相認架，我覺得幾搞笑，好似頒獎咁喎。按完摩，佢地又去boots買啲嘢，就要去同事介紹既頌通，都係叫咗酒店幫我地book位既。開頭有諗過想撘 BTS 去Emporium行過去既，但大家都懶行，所以就試下截的士。截咗2架，就話肯載我地啦，仲係計meter既，仲諗緊我地咁好彩啦。點知個司機又問我地係咪去night market，我地咪話唔係，一定要去頌通，跟住佢又好似唔識路咁，咁人地老公咪俾佢睇多次個地址囉。唓，其實佢識去架，不過想扮唔識，但見我地咁堅持，都車咗我地去囉。

去到都差唔多9點，仲要等下咁囉，我地好似book 9 點既。等位既時候可以落單先，咁就叫咗咖喱炒蟹 (ok啦，唔係好夠咖喱味)、串燒 (超好味，想再叫，但太飽啦)、冬蔭公 (好味)、生蝦 (又係好好好味，夠爽同埋佢嗰汁係咁多間最好味既)、鹽燒魚 (又係好好味，個汁又係超正的)、粉絲蝦煲(啲粉絲真係超好味，爭住食呀)，仲有啲炒菜 (好似係咸肉炒白菜，終於唔係通菜，又係好好味喎，嗰啲咸肉炸過，好好食)，同埋咩紅燒豬筋(人地老公叫既，唔係好明既一個餸囉)，後尾仲叫咗個蠔餅 (我就無試啦，因為個樣好似台灣既蚵仔煎，真係無儲夠勇氣試喎)。仲有一個餸唔記得咗lu，應該係叫咗10嘢的，埋單係3,670 baht。

食飽就返酒店啦，截咗幾架都唔肯載我地，我地就問下頌通個姐姐可唔可以幫我地截啦，佢又肯喎，但啲司機都係唔肯載我地囉，話要U turn過對面，好麻煩喎。咁我地又問下行去Emporium點行，點知佢話要行20-30 mins，仲要周圍己經黑掹掹，佢叫我地唔好行。我地唯有叫個姐姐幫我地寫大啲個地址啦，因為我地原本嗰張紙嗰地址係好細的。之後，我地就試下截啦，截咗10分鐘左右，終於有人肯啋我地啦，好似又係攞多啲錢出來叫佢車我地。但喺個10分鐘，我就俾蚊咬咗兩啖啦，好彩有嗰支通鼻棒，我開咗來搽，又好ok喎。

返到酒店，沖過涼，執下行李 (今次行李逹人朋友P無join，無專業意見，好呢hea呀)，又食消夜啦，今晚有我大愛既olive，超開心呢。飲飽食醉，就入房瞓啦。唔知係咪唔捨得，我地3個女仔臨瞓前都傾咗陣偈，我覺得好似細個去camp咁，好好笑。

曼谷喪食喪打之旅2013 DAY FIVE (15/6/2013) (PART I)

lee排好恨食嘢呀，點算呀，我仲有10磅要減架，我好驚呀~~

DAY FIVE (15/06/2013) PART I

今日既第一個節目就係去 Chacrit Muay Thai 打拳喇 (http://www.chacritmuaythaischool.com/index.html)，800 baht 一個鐘既private lesson，LEE間係香港拳館啲同學仔介紹既。咁當然我地係早一日又叫酒店幫我地打去book朝早10點既堂啦。9點幾去到，我就見到個內有惡犬既牌，已經開始驚驚地，周圍望下，又唔見喎。拳友J同個Owner報到咗之後，我地就去換衫啦，但個changing room 真係堅簡陋同污糟囉。換好衫，就嚟咗個快既熱身。跟住就分到一人一個師傅，我就分到阿Owner啦。一開始，嘩，佢個靶堅硬囉，我踢埋去，真係好痛呀，只怪我學藝未精同埋鍛鍊得唔夠，我最唔開心既係，打咗幾嘢，佢就sorry sorry 咁叫暫停，第一次就走咗去招呼啲剛到既學生啦，第二次就去幫啲嚟既人睇位泊車，我真係唔爽囉。打到一半時間，因為太多學生，就剩返兩個師傅俾我地輪流打，仲要唔叫得唔係咁平均囉，我打咗四、五次咋。最後阿owner話夠鐘既時候，我就話not enough，佢先叫個師傅俾我打多一round咋。

除咗打得唔爽之外，我都唔鍾意個 owner 喺休息既時間捉晒啲人去影相，我梗係唔啋佢啦，又拍低我地上堂既情況，我地估佢想擺上網宣傳。需知道我係著得好樣衰去打拳架嘛，我真係好唔想俾人擺上網囉，我真係好嬲喎，塊面黑到呢。打完，就嬲住去沖身啦。嘩，個浴室好跣呀，黏答答咁，我都唔知係咪好在佢黑掹掹，我睇唔到佢幾污糟。但無辦法，一定要沖，因為我地要趕去食brunch呀。(不過，事後討論，我啲拳友都ok lee 間嘢，我估因為之前佢地喺另外一間既師傅實在太懶，太呃錢。同埋呢，之後我地同返拳會同學傾開，佢話佢之前去係無咩人，唔會有我地既情況。拳友J有個朋友之後都有去到，都話得佢一個上堂，咁即係我地唔好彩，遇著多人囉。又平心而論，咁佢真係似教人嗰啲拳會，唔似上次嗰間臨時拉伕咁。Anyway，如果拳友們下次再去lee間，我都會俾多一次機會佢既，但真係想搵個地方沖涼，唔想喺嗰度沖呀)。

跟住我地就撘的士去Crepe & Co. (http://crepesnco.com/) 度食brunch嘞。我要講既係，我真係衰女囉，我既怒火係唔會咁快熄既，我發自己脾氣呀，對住啲可愛既團友，好彩佢地真係好好人，無嬲我呀。認咗衰，都要講下啲嘢食既。我地得拳友J既朋友提醒，我地5個人叫咗3份Share食。

THE Brunch

A fresh Fruit Juice, a Hot Tea or Coffee

A Baker’s Basket of your choice

and our Breakfast Plate too. 

Yoghurt, Cereals or Muesli

a Fruit plate or Fruit Salad

Two Eggs any style with Toast

Your choice of Pancake for Dessert

係好多嘢食囉，同埋都幾好食既，不過就無我鍾意食既Crepe，都係hotcake。我無影到相呀，因為鬧情緒嘛，想睇下有咩食既，可參考以下個blog啦：

http://www.wretch.cc/blog/lohasbigfang/1131361

人地老公其實好好咁幫我地拍低咗我地上堂既實況，佢地睇得好開心，但我就真係係唔想睇囉，我就黑住面打candy crush同食嘢，無睇到啲片。咁對住一個咁乞人憎既團友(即係我)，係人都唔想理啦，係咪先。但佢地真係唔係人囉，佢地仲o氹我呀，知我想crepe，就叫我揀一款，仲話會陪我食，你話吖，佢地份人好到咁，我真係......唉，無地自容囉。仲有，我真係好愛你地呀，可愛既團友們，我下次唔敢喇，你地唔好賴低我呀~~

 

Lee 份就係我叫既crepe。都ok好味既，不過同我喺巴黎既Bastille Market 食既唔同囉，哎呀，我好掛住Paris呀。講返先，餐brunch埋單係2,060 baht，都幾抵食，不過下次會再去的話，我想試下啲crepe囉，想試真啲。 

巴士底的crepe (仲有好好味，但好平既蝦仔呀)

曼谷喪食喪打之旅2013 DAY FOUR (14/06/2013)

噚日臨放工，無端端唔開心，我都唔知點解，又好想食嘢喎，好彩有朋友肯陪我去食飯咋，食茶餐廳，不過有人陪，心情好啲啦。今日打風放咗半日假，我都估到天文台會鼓勵我地勤力啲，所以都有晒心理準備。 

DAY FOUR (14/06/2013)

今日無咩特定嘢做，去行街喎。出發去食個早餐先啦，佢地想食西式，就去咗間叫做SWISS既餐廳，佢係我地去BTS站必經既。咁都係啲煙肉、蛋、多士咁，有橙汁同咖啡，OK啦，唔好食，又唔係難食囉。其實今朝起身，己經成身骨疼，拳友E同T就無咩嘢，因為噚晚有人地老公加按吖嘛，我就梗係即刻相求啦，好在得高人出手，按咗幾嘢，真係鬆返啲，勁呀。人地老公仲話我係3個中最硬既。

食飽，就起程啦。我地首先去咗買林真香合記，雖然個度啲staff都好惡，不過我地都買得好開心下，嘻嘻，你地惡劣既態度係影響唔到我地既心情。買完，我地就去咗香港拳館老闆娘介妱既Erawan Tea Room 訂位食tea。訂完位，我地去咗ISETAN行，佢地買咗好多毛巾呀，我都無執輸，買咗兩條tsumori (佢地話平喎) 同一隻毛巾公仔俾我個姪女。買完毛巾，去睇Wacoal啦又，咁我同人地老公就坐低打下機咁。買完晒，真係無咩錢剩，又無晒啲安全感喇，唯有再去唱錢。今次唔專登去national stadium 嗰間，去Big C 附近既Super Rich 唱，兌3.91，我唱多$1,000。唱完錢，就夠鐘食TEA，個環境呢，就幾好既，但啲嘢食就……唔啱我地口味囉，我地覺得又中伏啦。叫咗2個set加支水，埋單1,500 baht。

食完坐咗陣，我就話不如落樓下間Nara訂埋位啦，上網睇啲blog友話Erawan呢間好食啲 (Nara都係香港拳館老闆娘介紹的，希望唔好再中伏，哈哈)，Central World嗰間無咁好食。落到去訂位，想訂9:00，嚇到個waiter猛叫我地8:30，驚我地阻收工卦，咁就8:30囉。

 

跟住，我地去行下Zen，又買咗毛巾，佢地又睇下Wacoal，我就去玩具部行下啦，見到啲Rilakuma，好平，但細睇好醜囉，原本諗住買俾朋友S，但買唔落手。跟住就去咗Central World，行咗Uniqlo，又買咗個袋，拳友E話LEE個袋香港斷咗貨，咁我梗係唔執輸啦。跟住我地就去咗BIG C，見到MISTER DONUT，我話過我鍾意食佢既波堤，佢地就猛叫我買，我知佢地唔多LIKE，所以我買咗一個咋。今日係最後既shopping chance，我要掃mama麵，最後買咗20個細嘅。之後都係買下零食同酒做宵夜啦。行到7點幾，咩都行晒，所以就早啲去Nara睇下有無位。去到，又問下有無位，個waiter又唔係好想安排位咁，但我地見有一張吉枱，咪問佢嗰張得唔得，好彩佢都肯俾我地。望見附近隔離啲嘢食都好似好好味咁，咁我地就唔理價錢，想食就叫啦。叫到成枱嘢，樣樣都....好味喎，埋單係4,070 baht，下次可以再去囉。

 

Nara對出有間超市仔，我地都唔放過啦，又俾我見到我細個食既蝴蝶糖，雖然大個咗唔係覺得咁好食，但平平地，我又買咗兩盒囉

返到酒店，摷下個袋，頂，我一直帶住張Nara既9折coupon，但頭先俾錢唔記得咗佢囉，都成400 baht 架，泣~~

怨恨自己一輪後，食咗嘢飲咗酒，就乖乖去瞓啦，聽日又要fighting喇~~

今日成團人買既嘢呀 (未計林真香啦梗係)

曼谷喪食喪打之旅2013 DAY THREE (13/6/2013) (PART II)

噚晚參考咗人氣blog友鬼嫁既食譜，煮咗薑燒豬肉飯今日帶飯，我減咗肉既份量，加咗啲蒟蒻，都好好味喎。有興趣既，可以去鬼嫁個blog都睇下，好多食譜，佢真好鬼叻。

DAY THREE (13/06/2013) (PART II)

食完飯，拳友J夫婦就去辦理私事，我地3個女仔就自己搵嘢做啦。咁就唔好咁早閃，行下個商場先囉。行咗個atrium啲攤檔，都係啲濕碎嘢同假既new balance鞋，無咩嘢睇。跟住就去咗行boots。去到，佢地就研究下啲skin care，我就去睇下啲零食啦。咁都俾我執到2盒糖，其實我買lee 2盒糖係因為”仁丹”出既。細個嗰陣，我超愛仁丹，我記得有梅味(我最愛)、檸檬味同薄荷味，不過絕跡咗好多好多年囉 (oh，洩露咗我既年齡添~~)，muji有出過類近的，不過唔係嗰樣嘢囉，唔夠酸呀。
舊時既仁丹 (圖片來自互聯網)：

今次買既仁丹：

完全係兩回事，不過因為係仁丹，同埋佢係透明既，我有透明癖的，wakaka~~我食咗 raspberry mint 個盒，咬落下會爆開，跟住超薄荷，好通鼻，跟住有粒嘢有啲lemon grass既味道，好鍾意。會試埋盒薄荷味，唔知個味會唔會太勁呢。行完，我地就決定試下撘MRT返去。Chamchuri Square 行出去就係Sam Yan 站，下一個站就係近我地酒店既 Si Lom 站。同 BTS 好唔同，MRT 係無咩人撘既，因為 rabbit card 唔通用既關係 (我地估架咋)，就搵晒身上既散錢買token，入閘嘟，出閘入返落部閘機嗰種。
返到酒店，無所事事，我就話最衰落雨，無得游水。跟住拳友E話無行雷閃電，都可以游，咁有人陪，我梗係游啦。泳池既深度係劃一既130M，好嘢，都踩到地，唔係既話，我就無得游啦，因為呢，其實呢，我係唔識游水架。

個泳池係咪好靚呢 (圖片來自互聯網)

我地玩咗個幾鐘，己經攰死，我小腿仲抽筋添，咁就上返去沖涼同等拳友J夫婦回歸啦。佢地好慘呀，辦完事，塞咗成個幾2個鐘的士先返到來，佢地話個司機都塞到瞓著咗，一行得車，佢地就叫醒佢開車。咁我地3個游完水，佢地就塞完車，大家都攰到死，所以就決定係附近既泰菜食啦，書介紹嗰啲呢，咁…我地咪中伏囉。間嘢叫MK，佢分港式邊爐同泰菜，港式邊爐嗰邊FULL晒，但泰菜就無咩人咁囉。我地都係叫蝦餅、生蝦刺身、冬蔭公、青咖喱啲大路嘢。第一個嚟既係蝦餅，嘩，無蝦味既炸蝦餅囉。跟住啲嘢食都食得入口，但只可以話唔難食囉，今餐唔飽都唔想再係度燒錢，食咗 2,600 baht。
食飽飽，拳友E好想去做THAI MASSAGE，咁我地就去車站附近既BODY TUNE啦，點知，FULL到聽日都無位囉。最快係後日既18:00，好啦，照BOOK啦。跟住就出去睇下有無第二間啦，但望落去，間間都怪怪地咁，因為啲按摩師都係男人，不過化晒妝，其實呢，我真係唔MIND佢地著女裝同化妝，佢地有佢地既選擇，但按摩咁貼身就唔係好接受到囉，SORRY~~
無得按之下，咁就行下BOOTS啦又，跟住買埋盒芒果糯米飯就返歸啦。咁回程時，又望下左望下右啦，竟然發現咗一間THAI MASSAGE，嗰樣又幾四正，咁就幫襯啦。拳友E同人地老公就做全身，我地3個就做腳。都OK舒服既，我仲攰到瞓著咗。瞓咗一陣就俾一行10幾個講廣東話既香港/廣州人嘈醒，佢地真係嘈到拆天，剩係討論做咩都嘈咗10分鐘，啲按摩師都望住佢地，擰轉面笑。有3個就做腳，其中一個女仔話俾3倍錢要3個師傅一齊按，吓？我唔明點解要囉，咁當然佢都係講下。後尾聽返拳友E講，其他做身既上到去都好嘈，話去廁所都搞咗好耐。唉，明明好開心既旅程，遇著啲咁既人，都真係有啲掃興。
返到酒店，拳友E話按得麻麻，仲係好緊喎，咁人地老公就出手相助，幫佢同拳友T按咗幾下咁，我就趁空檔去沖過涼咁啦，跟住又係消夜囉，個芒果糯米飯，超好味呢，係成個旅程食過最好味~~今日又打拳、又游水，真係攰到不行，所以我終於瞓得著喇，YEAH!!!

食食食 @ 9 Aug 2013

上星期五去咗澳門公幹，又熱又曬，好在食咗餐好食既lunch咋。諗返起上次病住同成班老細過澳門做嘢，因為落雨，就喺Galaxy 既翠華食。嘩，我真係未食過咁難食既茄牛通囉，我堅佩服佢可以整得咁難食囉。

咁今次得我同阿sir過去，梗係搵定間好食架啦。經過我細閱小t 既blog，同上 openrice 望下啲價錢，我揀咗喺氹仔既唐吉柯德呀 (多謝小t )。行到地堡街既盡頭，我就見到佢啦。入到去，menu入面既嘢食都好似好好味咁，但因為lee餐係公費出差飯，所以只好乖乖的叫set lunch啦 (好抵架，MOP 70 per set plus 10% service charge)。

包同牛油 (包是熱熱的)、蒜蓉青菜湯(好味喎)、Spanish ham with broken egg (ham好好好味，墊底的fried potato，又係好好味)、grilled fish with spaghetti (原本跟tomato rice，不過佢話無喎，但我地係第一枱客囉，有啲失望。但係原來嗰意粉好好味，蒜香，跟住我用嗰個綠色既酸咪咪既香草汁撈啲意粉，又係好好食喎，魚就ok 啦)、結尾就整杯 cappuccino (ok)。

哈哈，除咗啲嘢好食，LEE間嘢都俾咗個第一次我，就係我第一次見人求婚呀，WAKAKA~~話說，我地己經食到尾聲，就亂咁搵啲嘢傾下啦，咁啱我地講緊啲人幾時結婚，我就話細個一代嗰啲又興返早婚，即係27, 28 歲就結，我個代就3X先結。講講下，見之前出咗去個男仔換咗套西裝同埋佢啲朋友一齊入返來 (佢之前係同佢個女朋友兩個，都係便服的，跟住佢就出咗去，我諗佢搵個excuse 出去啦)，跟住就見佢有個朋友喺度拍攝，個男仔就同企係度講咗啲嘢，我又未咁八到去聽佢講咩，個女仔就開始感動到喊，最後個男仔就單膝跪，幫個女仔帶介子，跟住佢地成班朋友就換枱慶祝。哈哈，我呢，都戥佢地開心既，不過，又覺得好搞笑囉，日光光白白求婚，可能就係咁，先估佢唔到囉。我晚飯時，同我地啲朋友講起，佢地好大反應話唔like，好似侷佢咁喎，係囉，我地啲老鬼係唔浪漫架啦，嫁唔出架啦。anyway，在此祝福嗰對後生情侶happy marriage 呀，多謝你地令我個b. trip有啲難忘喎。

睇完嘢，開埋個會，衝住去碼頭都6點2，但最早既普通位係19:45囉，crazy，我仲約咗人添架。好在阿sir都話太夜，就決定撘18:30既豪華位囉。上到船，本住包咗唔食會蝕既心態，就將個餐換咗個杯麵，就係咁，無啦啦又食咗大半個杯麵。好啦，趕完一輪，就去到四姐川菜meet 啲 fd 啦。都係遲咗10分鐘左右，盡咗力啦。4個人可選3個涼菜、4個小菜，再送你一個炒菜。

涼菜：涼拌麵、口水雞、川椒皮蛋

小菜：酸辣土豆絲、辣子雞軟骨、水煮魚、鍋筍炒肉絲(唔辣)、蒜蓉炒油麥菜。

每位$280，免加一、免開瓶費。我覺得都幾好食，會再去囉。

食咁多嘢，好內疚既關係，星期六朝早爬咗起身做咗1個鐘既stepper，先放心咋，我覺得自己好乖同好叻囉~~ 

聽日先繼續曼谷之旅~~

曼谷喪食喪打之旅2013 DAY THREE (13/6/2013) (PART I)

噚晚洗碗嗰陣打爛咗個煲蓋呀，嚇鬼死我，成地都係玻璃碎，仲飛咗啲落我個身同對拖鞋度添呀，泣~~

DAY THREE (13/6/2013) (Part I)

話說噚晚又法國大餐，跟住零食、sake同埋MAMA麵都往咀裡送，最抵死係覺得自己熱氣，臨瞓跟人一齊飲杯夏桑菊，咁就出事啦。食太多，啲胃氣多到瞓唔到呀，典來典去都唔得，聽朝仲要早起去打拳。當然越緊張就越瞓唔到啦，我估我最後瞓咗3個鐘都唔知有無。

8點起身食早餐，我堅無胃口，剩係食咗杯yogurt。其他團友就食麵包同yogurt，人地老公就食mama杯麵，佢既評語係：即食麵既質地好好多。食飽就衝落reception，叫佢幫我地打去問拳館，問下有無堂上。個reception姐姐幫我地同拳館 電話溝通完一輪之後，就話俾我地聽9:00 am有堂，跟住就黃昏之後先有，嗰陣其實已經係8:50，我地仲諗住無得打，但姐姐話佢幫我地call的士過去只需要5分鐘左右，咁我地就叫佢幫我地book 9:00，4個人既private lesson。

間拳館叫做 Petch Yin Dee Muay Thai，係香港拳館嗰老板娘介紹既，佢話環境都ok既，一個鐘private lesson既收費係1000 baht。但我地上到去，咦，唔係好對路喎。啲設備都幾舊吓，都唔緊要，但個格局真係唔似有堂上囉。剩係見到有啲泰仔行來行去，完全無師傅既踪影。咁我地就問下個疑似同酒店reception通電話既後生仔啦，但佢好似唔知發生咩事咁，剩係俾張單張我地睇，我地咪話唔係呀，啱啱打電話過嚟架，玩咗一輪，佢先如夢初醒話幫我地call 師傅，9:30應該無問題。都上到去啦，就換住衫等啦。最後到9:40，4個師傅先到齊，咁就開始上堂。上堂係one on one 形式，熱完身，就教我地啲基本嘢，但見地都好似識識地，就問我地有無打過，咁唯有同佢講其實我地喺香港有打開囉。唔同師傅有唔同教法啦，有2個就剩打拳靶，我同拳友J要打沙包同拳靶。每3分鐘就break 1分鐘，都幾辛苦，可能我唔夠瞓啦。落堂之後，我地決定臭住走，返酒店先沖涼，因為堅唔想喺有小強屍體既沖涼房沖涼囉。臭住咁截的士，但兩架都拒載囉，最後我地就攞住100 baht 同埋地址俾啲司機，先有1個不情不願肯載我地咋 (去個程係4x baht)。我地都有諗過係咪因為我地太臭呢，不過我估都係因為我地酒店出面嗰條街成日塞車都癲，所以啲司機先唔肯去，因為我之前睇啲blogger都有講過下。撘車嗰陣，我地都討論過，佢地一致唔like間嘢，因為佢地啲師傅好懶的，我嗰個已經係好有heart，咁諗落，又係喎，我打得都幾爽的，同埋我攰架。

返到酒店，就仆到去沖涼啦。點解要咁趕呢，因為我book咗去WATER LIBRARY (http://www.mywaterlibrary.com/chamchuri/) 度食法餐，無錯，又係法餐。LEE 一間係我揀架。話說我去完英法之後，我就覺得tripadvisor 都幾中肯，所以今次去曼谷，我都去八下有邊間嘢好食 (http://www.tripadvisor.com/Restaurants-g293916-Bangkok.html)，當時water library 係排第5位既，跟手我就上網睇下有無人講，剩係search到1個blogger大讚，即係話仲未有好多香港人去啦，咁我就決定做白老鼠去試試嘞。我地去係撘的士的，因為酒店call的士超方便，仲要計meter，平過撘MRT添呀。

去到個商場，搵咗一陣，就問下人啦，先搵到。我地就食lunch menu，3 course 990 baht (雖然個blogger 大讚既係signature menu，但要成2,800 baht，又無知好唔好食，就試咗lunch先啦)。

Starter同Main，我地全部都揀咗同款既，甜品就除咗拳友E揀咗Warm Chocolate Brownie 之外，我地都揀咗apple tarte tatin。

mixed berries smoothies，refreshing~~

對上嗰個包超美味的呢，外脆內軟，加埋牛油，wow。個牛角包都美味的，不過我鍾意小圓包多一點

Tartar of US scallop with wasabi and green apple，好鮮甜的呢。

Wagyu Beef cheek, mashed la ratte potato, apple and beetroot，要加150 baht。慢煮，肉軟軟的，味道很夠，薯蓉都好好食呀，連拳友E平時唔食薯蓉的都食晒呢。

Apple tarte tatin with vanilla bean ice cream，一直都好喜歡LEE個甜品，LEE個都好好好味 (雖然其它拳友覺得漏)

拳友E點的 Warm chocolate brownie with caramel espuma and yoghurt ice cream，我無試過，但拳友E話好味的。

其實喺LEE 餐LUNCH 都有個小插曲的，唔知係拳友E叫錯定個Waitress落錯單，無落到個apple tarte tatin，俾咗另一個甜品我地：Passion fruit pudding with raspberry and Gianduja chocolate ice，平時我都會算數的，但我好想食apple tarte tatin呀，所以我話我地唔係叫lee個喎。嗰waitress問咗經理之後，就可以幫我地換，但要等20分鐘。咁我、拳友J 同T都要換，但人地老公就唔換嘞。Waitress 收返個pudding之後，又俾返我地話compliment 喎，咁我地又食埋佢啦。原來嗰pudding都好好味架，酸酸的。埋單係7,450 baht，每位HK$375，我覺得抵喎，因為啲嘢好好味。lee間會再去的。

曼谷喪食喪打之旅2013 DAY TWO (12/6/2013) (PART III)

噚日突然要同阿SIR出街做嘢，做完晒就去咗一直好想試既瑞記咖啡@上環街市食個TEA，試咗樽裝奶茶同西多士。奶茶就OK啦，西多士就大愛，其實就係兩塊薄方包沾啲蛋漿煎香佢，再落煉奶，好簡單，但好好味。

上圖來自OPENRICE CRAZYTIK 的食評，因為同老細出街，唔好意思影相呀。我好乖，食咗3份之1就收咗手，其他就俾咗阿SIR，我都估唔到自己咁叻。

DAY TWO (12/06/2013) PART III
食完GREYHOUND，就行下SIAM CENTR 啦，嘢都幾靚既，但價錢望落都唔平囉，所以我地行咗一陣就去SIAM PARAGON 既超市行下啦。嘩，好鬼大個超市，好鬼開心呀，我真係好鍾意行超市的。個超市裝修得都幾靚，我地就估佢啲嘢會賣貴過BIG C啦 (後尾發現唔係囉)，所以我地都係買咗啲零食同HAM做宵夜咁。又因為我地要試下邊隻MAMA 麵得我地歡心，我地又買咗兩隻唔同味既試下，仲有買咗冬蔭公湯粉。拳友T同人地老公就去搵佢地朋友鍾意食既糖做手信，我見有人推介，梗係跟買啦，就係以下嗰3款 (圖片來自互聯網)：

OK好味。

LEE隻超LIKE，因為好夠酸

好味，不過有啲味道會甜咗少少。係曼谷買平香港好多，大概HK$12左右，香港SOGO賣緊$24。

行到下午4點幾左右，見到個WINE CORNER又係黑掹掹，原來下午2-5都係禁酒既，佢地猛話好彩買咗酒咋。因為買咗好多嘢既關係，我地就決定返去APARTMENT擺低啲嘢先。去到BTS入閘嗰陣，我就俾個閘機夾親，因為佢地為防衝閘，係閂得好快的。成個旅程，我都真係俾佢夾咗幾嘢，尤其是攞住好多嘢既事候。返到SALA DAENG 站，我地跟住指示，行另外一條路返APARTMENT，原來LEE邊旺好多架，好多食肆，又有拳友們鍾愛既BOOTS啦，同埋很多我愛的便利店呢，我同拳友T都係喺站附近既大間7-11先買到咗電話咭咋，我地係SIAM行咗好多間便利店都係 sold out 架，可能游客多啦。不過，LEE條路都係要行20分鐘先返到我地既APARTMENT囉。

返到去，拳友E就幫我地將啲戰利品影相啦，搞下LEE樣，搞下嗰樣，試吓啲冬蔭公湯粉(不過唔夠味)，就出發去SIAM食晚飯。今晚係食拳友T同事介紹既C'EST BON，我睇過下啲食評，都係話抵食囉，所以期望唔會好高。

味道不過不失，唔係話唔好味，但又唔係好味囉。5個人食咗7,076 baht，每人HK$356。

食完就去BIG C行下嘞，我地都係繼續掃零食，有我最愛既魷魚，仲買咗通鼻棒、YOGURT同麵包做早餐，同埋紅酒同白酒各一枝。不過BIG C真係好多香港遊客，買嘢好似搶咁，驚呀。買完就打道回府，宵夜同埋PLAN 行程，仲有就係打CANDY CRUSH。

喺SIAM PARAGON買既嘢食，左下角個隻就係我超愛既魷魚，喺BIG C有細包裝賣，一包有12小包。其實喺香港都有得買既，不過又係貴囉。BIG C買啲嘢無影到呀，如果有影， 一定仲壯觀。哈哈，咁梗係無食晒啦，但仲有煮MAMA麵試食囉。