急就章之關西自由行 2014 DAY TWO (25 May 2014) PART ONE

lee 排好鬱悶，點可以掃走陰霾呢？知嘞，都係要靠自己吖嘛，好啦，會乖乖咁努力架嘞。

急就章之關西自由行 2014 DAY TWO (25 May 2014) PART ONE

噚晚玩到成點幾先返房沖涼，都搞到成兩點幾先瞓，今朝7點幾就要起身，食噚晚買既飯團做早餐，因為我想啲腸郁下，可以出發前放低啲就 perfect 嘞。到咗9:00，就call齊啲團友喺酒店出發。其實我同P每人都食咗個飯團，加埋噚晚咁夜食嘢，確係有啲飽滯，但我衰呀，見啲團友喺cafe食早餐，本住唔蝕底既心態下，我就叫P同我 share 一份早餐。原本我想飲latte既，但餐只係包普通咖啡，又唔可以補差額，要另叫，好唔抵，咁算啦，飲返普通咖啡啦。

嗱，貪心既後果就係個餐唔好食，但因為又唔想做大嘥鬼，所以都係食剩少少，仲要飽到頂住囉。好啦，食飽就出發，首先要買車票先，為咗唔想每次都要停低買飛，我地就決定買 IC card，不過呢，大阪又確係無東京咁方便，無窗口買咭，而嗰部機又有啲難用，好彩搞咗一陣都搞得掂啫 (但好大壓力囉，因為嗰陣車站都幾繁忙)。忙完一輪，都成 9:47分左右，而我地要搭9:51班車，咁我唔搏啦，問下車站職員邊個月台，哈，好彩好近呀。其實我係跟住阿朋友S推介既 app (navitime) 搵車搭，確係超正，同行團友激讚囉。

好啦，講返去邊先，我地要去恩智站，轉一次車，車程約32分鐘。到站，搵到website教行嗰條路，估計仲有啲時間剩，就行咗一陣超市消磨下時間。行到差唔多，真係要行去嗰度啦，因為預約咗11點，沿途見到啲花同屋，忍唔住影咗：

好嘞，終於到嘞，我地去摘士多啤梨呀。lee個係阿人地老公，即係J先生既願望之一。要預約既，有興趣既可以：士多啤梨，不過開放時間係12月上旬至5月下旬架咋。

佢地係溫室栽種既，所以都好乾淨，所有人都要換拖鞋，同埋大家都好自律，揀咗嗰粒都會剪落嚟既，唔會話摸嚟摸去咁，所以都好放心咁食。開頭我地係唔蝕底咁揀啲大既食，但唔好食囉，仲諗住係咪 lee 隻種唔好味呢。跟住就諗下不如試下嗰啲細細粒，條個凌型嗰啲啦，哎呀，原來lee啲好好味囉，清得嚟好鬼甜呀。諗住同啲團友講啦，但原來阿P同J先生都係差唔多時候發現咗囉，嘩，咁又開始狂食先。連原本J太太(即拳友J)諗住唔再食，試咗lee款之後，要阿J先生搵俾佢食囉。

雖然我地食咗都幾多，但當然係回唔到本啦，佢收費係1,600 YEN，30分鐘任食，但又確係一個幾得意既體驗喎。同埋呢，阿P話出面嗰啲可能會甜啲，但 lee 個咁新鮮既 texture 出面食唔到喎，佢仲形容得有啲詭異，話似 bb 仔既肌膚喎，驚唔驚先？又，原本佢好擔心飽得滯，食唔得多，點知佢好似食得多過我囉，我唓~~哈哈。

急就章之關西自由行 2014 DAY ONE (24 May 2014)

嚟緊幾日既 lunch都好忙，應該寫唔到 blog 呀，等我今日快趣開咗個頭先啦，唔係既話，拖下拖下，又唔願寫。

急就章之關西自由行 2014 DAY ONE (24 May 2014)

今日搭 11:25 機，約咗啲團友 9:15 喺機場食早餐，又因為要就機場巴士時間，成30分鐘先有一班車，咁唯有乖乖地7:30出門口，搭7:45班車。雖則之前嗰晚執行李又一如以往咁，執到半夜三更，但唔知係咪仲係好興奮呢，又唔係好眼瞓喎。

到咗機場先 8:45，但除咗團友E之外，嗰嗰都到陸續到齊嘞。而團友E呢，哈，佢遲到呀，不過9:30左右都到咗啦。咁快手去check in，跟住去嘆早餐。因為團友T係 marco polo club 會員，我地有得優先 check in，正。

快趣 check in 完，就去嘆早餐，如果得我同P呢，通常都會食 popeye 既，不過今次6個人，佢地話翠華或大快活，咁我就揀咗翠華。食咗個沙牛麵跟奶油豬，仲有杯檸茶，又幾好味喎。

去到閘位，又亂影一通，好開心喎。但因為唔知啲團友介唔介意，所以我都係唔po啲相上嚟啦。

  又嚟影下個牌先，開心~~

又係機翼位，夾硬影一張算囉~~

搭親CX，最期待既佢個影院啦梗係，無咩未上影既戲喎，但有 HER 呀，戲院上嗰陣已經想去睇，但又懶無去睇到。嗱，對戲真係好好睇，阿 Scarlett Johansson 憑聲演拎咗啲 best actress 奬，有人話咁都得，但我確實覺得佢好charm喎，沙沙地聲，真係好sexy。Joaquin Phoenix 做得都好好，總言之，對戲好好睇啦，好開心我終於睇得到 "她"啦。

又嚟影下飛機餐，今次啲餐真係堅難食喎：

睇完套戲，填下form，埋咗電話咭，再睇埋Modern Family，終於都 land 啦，WOW~~

過咗關，第一時間去搵巴士站，去lee度：

係呀，去咗outlet呀，咪係好近機場嗰個囉，按此 。機場有 shuttle去，車費 100 yen。不過啲車班次要成30分鐘一班，同埋都好多本地人去，我地 16:50 去到，都要等 17:30班車。去到18:00啦，佢地就租 locker 擺喼，我同 P嗰兩隻因為輕，所以我地兩個都無擺，每人慳返500 yen，開心。之後，就梗係分開行啦，得兩個鐘，要珍惜一分一秒架嘛。

我同P一組，因為好渴又好凍，所以去咗星巴克，買咗杯 green tea latte，想叫佢走糖，咪話no sugar 囉，佢唔多明咁，跟住問返我地係咪no syrup，哈，我地答係呀，原來哥仔，你咁好禮貌之餘，仲英文幾好喎，like呀~~ 話時話，果邊啲 starsbuck 係好飲啲架喎，唔知係咪啲奶好好味呢。

飲完，就急急腳去行街啦，我同P呢，好勁呀，一人買咗......一樣嘢咋，我就買咗條 merci happy price 條 line 既 skirt，P就買咗對 Zucca boot，佢就好啦，上次個trip已經睇中咗，今次嚟買返有7折呀，佢就有 hesitation，我就話買啦，好睇呀，哈，我係魔鬼。其實我地買咁少嘢，係因為2月先係東京血拼完，真係唔想再食咁多錢，又因為已經買咗啲，都唔會有好多新嘢想買。7點幾，我地就無所事事 lu，hea 下 hea 下，等到 8:05 先同啲團友會合返，佢地好多收獲呀。

好啦，未入大阪已經跌咗錢既我地，出發去大阪嘞。搭咗lee架車：

hehe，其實我地賺咗架，lee架車喺機場搭應該要 1,2xx yen架，但我地係 Rinku 站上，喺售票機買咗普通車飛，但見到lee架車埋站，咁又夜又拎住喼，咪諗住check飛時再補車費囉，點知呢，個staff問咗我地係邊度上之後，又無要我地補錢喎，哈，開心again~

雖然到埗都已經天黑，但因為我喺google map行過幾次，酒店個網頁又教得幾詳盡，都幾快搵到間酒店。不過呢，房真係超超細囉。好彩都唔係話太舊同埋都幾乾淨啦。

安頓好，就去道頓堀食牛角。去到都要等一陣位，上到去，有對香港人couple同我地講：唔好食放題呀，啲肉好渣，好難食，叫咗啲嘢又好遲先到。嗰一刻都 feel 到有啲中伏，但都嚟到啦，試下啦。哎，食咗好幾碟，真係好難食囉，牛肉一啲牛味都無，差到呢，其他啲肉都好難食囉。最好既係杯菠蘿酒囉，大失望。

咁唔飽，買咗八爪魚燒做宵夜，買完，團友們仲要去激安之殿堂掃手信同埋今埋食既小食同酒。嘩，多人到呢，都搞咗成個鐘先買完，因為排咗好耐隊俾。返到酒店，成12點幾，啲八爪魚燒凍晒啦，無咁好味lu~~

雖然搞到好夜，點幾先各自回房，但聽朝都要早啲，因為有個地方要準時去到呀~~

急就章之關西自由行 2014 前言

急就章之關西自由行 2014 前言

原定係去曼谷既，5月23日晚機出發，28號下午返既。plan好晒所有行程，點知阿英祿話咁易就被罷免咗，跟住黃衫軍又話要其他人落台，一直都密切留意住個形勢，到軍方話戒嚴，已經有電話到叫我唔好去，最後喺5月22日宣佈政變同宵，個心即灰晒，嗰晚仲有去打拳，啲泰仔師傅就話無問題，有個嚟咗香港耐啲既，就話唔好去住喎。我爸媽就通緝我，猛叫我唔好去啦，但我地個張係團體機票，都要再問下各團友既意見既……

喺夜晚11點幾通過whatsapp決定取消行程，個個都勁唔開心囉，大家都好期等 lee 個一年一度既旅行架嘛。喺度一路搞取消酒店啲嘢，我就話：好想同佢地去旅行，大家就好踴躍咁提議去其他地方啦，首選係首爾，但望過下，又唔見有啲可即時 confirm 既平機票，而我因為成十幾年無去過，搵酒店方面，係零concept。玩咗陣，有個團友就去睇睇 fanfares，有三個地方揀：高雄、大阪、名古屋，咁梗係大阪啦，又咁啱，佢有A-F，6個時段有4個FULL咗，竟然未 FULL 既B時段係：5月24日11:25去，5月29日10:00返，咁仲唔係為咗我地而設咩？

嗱嗱聲check下有無酒店啦。大阪，哈，無問題啦，上 jalan 搵喺難波既酒店，見有一間叫APA 既，位置 OK 啦，double room 就平均 12,200 yen一晚，咁即係每人每晚HK$467，唔平，但又唔算貴囉，加埋機票HK$2,432，每人HK$4,764。嗰一刻，大家既情緒由最低點去到沸點，哈，就咁confirm晒所有既嘢。由取消行程到訂埋大阪既嘢，只係用咗2個幾鐘，仲要係用 whatsapp 溝通喎，好勁囉我地。今次亦都係我第一次咁趕去搞個旅行，因為呢，其實我係嗰啲好早就要 plan 旅行，慢慢編行程嗰啲嚟架。Lee 個第一次確實令我興奮到瞓唔著囉。

星期五返工，當然係無心工作，Ｔ同我都仲搞緊取消曼谷機票同埋酒店啲嘢。講到取消酒店，就不得不讚揚下agoda，其實咁遲先取消，我都預咗要取首晚房租，但 agoda 嗰位哥仔又確係好人，佢主動話幫我試可唔可以 free cancellation 喎，不過因為已經係凌晨，酒店訂房部無人聽，所以會星期五朝再跟進。星期五嗰日我收到 agoda e-mail，叫我 send 個mail俾酒店，咁我就照 send 啦，咁酒店都明白事理，最後都 free cancellation 咗，抵鍚呀，agoda 同酒店。而機票嗰邊呢，機票就無得 cancel 啦，但因為係特價機票，$710，都無咁傷。而家T仲幫我地 follow 緊個 tax 同 fuel charge 既 refund，希望無咁阻滯啦。

好啦，除咗搞取消啲嘢，都要搞個旅行架，問咗啲團友有咩心願，就努力去搵資料同做預約。P 同 E就幫大家去兌錢，我就要放工去拎返 book 咗既 sim card，好忙，好眼瞓，但係好開心囉。

今篇無相睇，好悶呢，希望大家體諒下啦，哈！

北海道東京食、敗之旅 DAY NINE (24-02-2014)

我返嚟嘞，哈，其實上星四已經返咗嚟嘞，但繼續偷懶添，希望我嗰三個讀者唔會因為咁而離我而去啦~~

好嘞，返去東京先：

北海道東京食、敗之旅 DAY NINE (24-02-2014) 

一早起身，見到表哥個whatsapp，話婆婆噚晚危急，但情況穩定咗。個心已經好沉，其實lee幾日喺日本睇住佢地啲whatsapp，已經喊咗好幾次，自責咗好多次，猛問點解自己出發前已經feel到唔對路既時候都唔去睇下婆婆。好後悔，個心好痛，但可以點呢？最後，我選擇逃避。喊完，我同P講我地繼續行程，買未買到既嘢，食未食既牛肉，因為我唔知自己唔搵啲嘢做，我會點。

第一站去咗Tokyu Hands，買飯壺，都揀咗好一陣子，俾晒錢，諗住走嗰陣，俾我瞟到銀聯有5% off，咁我地又硬住頭皮問個cashier可唔可以退款，再用銀聯俾錢，點知佢話有另一個promotion，拎住passport去information desk可以換到張10% off既coupon，咁我地梗係用lee個promotion啦，阿姐姐好好咁幫我地退款 (原來都要搞幾多嘢，要搵個supervisor既人去解釋，攞佢個approval，先退得俾我地)，個姐姐真係超級好人。退完款，去咗information desk攞coupon，諗住既然咁抵，就再睇下有咩囉買，見有四葉妹妹模型，就買咗盒俾細佬，見有個大既仲影咗張相：

跟住又見到porter，想買個袋，但揀唔啱，最後揀咗個散紙包。買完，去咗食牛：

其實嗰一刻我個人極度神不守舍，唔知點handle個情緒，時笑時喊，好彩P喺我旁邊支持我。又唔知係咪情緒不穩，覺得味道OK啦。P就話新宿瀨里奈好味啲，我都覺得係。食完飯，去買埋P想買既鞋，就返酒店執埋啲嘢，出發去機場返香港。

搭緊車途中，表哥佢地whatsapp叫所有人去醫院，我已經做定心理準備，只希望婆婆走得安詳。去到機場，仲有啲時間，去咗食嘢：

 

上到飛機，我同佢地講我要熄電話，落機再聯絡，嗰陣我已經諗趕唔切去見婆婆了~~

好耐無食過JAL既飛機餐：

返到香港，唔太敢開電話，但總要面對，開電話後見佢地話婆婆穩定咗，叫我先返屋企，有咩事再聯絡大家。

遊記完~~

LEE一日心情其實好失控，而家睇返，覺得自己仲可以吃喝玩樂，好不孝，但其實嗰一刻我好想用LEE啲嘢去麻醉自己，根本唔敢去面對。明明知道婆婆身體機能已經退化得好犀利，明明大家都話要有心理準備，但其實都係會唔捨得囉。雖然理性知道婆婆繼續落去受既苦會更大，但真係唔捨得呀~~

25-02-2014 

婆婆對我地好好，俾咗我地一晚充足既睡眠，到早上8點，大家收到醫院電話都趕去了。搭的士途中，已經忍唔住喊了，見到婆婆更不可收拾。婆婆等待到所有人到齊跟她告別後，安詳的走了。

其實我有諗過應唔應該將婆婆的事喺個blog度講，思前想後，決定記錄喺blog入面，想提醒自己唔可以再錯，要好好把握當下，珍惜眼前人。縱然今次俾我見到婆婆最後一面，但我又會諗係咪我令到佢要辛苦多一日呢，可能係我諗多咗，不過，我真心覺得自己做錯了，對不起…..