北海道東京食、敗之旅 DAY SIX (21-02-2014) PART TWO

今日好開心呢，同咗S食 lunch，去咗添好運，兩個人食咗咁多呀，癲咗：

好，繼續東京行：

北海道東京食、敗之旅 DAY SIX (21-02-2014) PART TWO

我地從原宿出發，去東京站轉lee條線，睇到lee度應該估到我去邊啦，無錯，我係去廸~士~尼~

咁究竟去land定sea好呢？同幾個朋友傾開，佢地都叫我去sea，唔好去land，因為香港都有land啦，而且sea係新啲既。聽落有道理，但再問最大分別係啲咩既時候，啲朋友就話sea啲遊戲係刺激啲，聽到LEE度就易決定啦，一定係去land啦，老人家唔可以咁刺激架嘛。況且我都10幾年無去過，而P仲係未去過添，應該唔會悶啩~~

搭車既時候已經見啲人一家大細拖住啲喼入園，已經feel到會有幾多人，但都無法啦。去到售票處大約11點半左右，唔算多人，買埋飛就衝入去玩啦，yeah~~

第一時間其實我係想去搵thunder mountain攞fast pass既，但望住個map，我都唔太識得行，路痴係無得救架喇。盲中中咁去咗Toontown，多人到得人驚。跟住繼續行，就去到Tomorrowland，見到Space Mountain多人到痴咗，fast pass都攞到5點，哈，好彩我地唔玩既啫，因為我同P之前係香港玩過，最後尾個下真係快到得人驚，P話過唔會再玩，佢話性命攸關喎。再行入啲，見到LEE個，香港無既，我想玩呀，排40分鐘左右，唔算耐啫，咁就排啦~~

其實lee個係低能game，坐住張椅，拎住支電筒照啲monster，即係好似巴斯光年嗰個game咁，但因為佢啲decoration又確實幾得意，而我又like Monster Inc，所以我係覺得好玩既。排緊既時候，我仲同S玩緊Line，佢見到話好想玩呀，S，咁你快啲去啦~~

玩完出返嚟，見佢話LEE個係新既，35分鐘，排啦又。其實呢…我係無睇過star war架，但對佢啲角色都有少少concept 既：

Lee個係嗰啲3D影院，又確係幾刺激既，我成日都覺得明明只係張櫈有限度搖擺，但配合埋套3D片，又真係會產生離心力，又會令人覺得咁刺激，覺得人呢，真係易被呃既啫。其實玩lee個時我覺得好搞笑，因為好多日本人叫得好驚，我仲忍唔住大笑咗，同P講話好搞笑，點知佢話佢都好驚，哎呀，原來我笑埋自己個friend，衰呀我~~

之後，我地就去Haunted Mansion拎fast pass。咁等緊既時間就玩P想玩嗰啲先，佢呢，想玩啲好可愛既小飛象同埋木馬嘞，P，你好cute呢。

排緊小飛象既時候，就開始巡遊嘞，唔執輸既我又影下相先。

  lee張係專登影俾你睇架，有嗰隻鼠呀。

之後去咗玩木馬，唯一一個唔洗排既遊戲，之後仲玩多咗一次，但我都係坐唔到最外圍既大木馬。

夠鐘去玩Haunted Mansion，以前覺得幾得意，但今次有少少悶~~

之後就去玩Thunder Mountain，Lee個要排60分鐘，當我猶豫緊既時候，P話想玩就玩埋啦，一場嚟到，想玩就陪我排喎。咁梗係好啦，排到腳都軟，加上前後都有啲細路郁身郁勢，煩到死，堅唔耐煩囉。

終於可以上車既時候，真係開心到震，因為好攰呀。哈，Lee個roller coaster真係啱我玩，有少少驚，但好開心，P就慘啲，原來佢堅驚，全程一隻手扶實個把手，一隻手遮住塊面，我仲以為佢玩添，點知佢真驚。咁落到車，我就講返啲好笑嘢俾佢定下驚啦。話說我地後面有個日本細路排隊嗰陣成日扭嚟扭去，幾討厭下，但佢之後同佢爸爸坐我地後面，佢爸爸全程有KEEP住問佢：大丈夫？

第一次答：大丈夫 (自信mode)

跟住玩到半路時：大丈夫 (聲音顫抖中)

再衝多兩次後：大丈夫 (哽咽中)

差唔多最後：大丈夫，xxxxxxx (直情想喊，個抽日文雖然我聽唔懂，但我估係話玩完未呀，玩完未呀…)

玩完落車，佢就好開心咁同佢爸爸傾偈，雖然我聽唔明，但我估佢係覺得自己好叻，完成咗件大事，爸爸又好proud of佢，所以佢好開心，一路行返出去既時候，兩父子都笑得好開心，oh，lee一刻，我覺得佢都係唔係好討厭啫。

玩完Thunder Mountain，5點左右，P問我仲有無嘢想玩，我話睇下Buzz Lightyear’s Astro Blaster多唔多人排啦，點知話要排50分鐘，算罷啦。咁就走啦，嗰陣都有啲肚餓，但又唔知吔咩好，最後買咗lee條嘢share食，係咪好慳呢，哈！

行行下，見到Pirates of Caribbean，排5分鐘，本住唔蝕底既心態就玩埋佢啦，哈，又係啲悶悶遊戲囉，開頭暗暗地都覺得阿Jack好似，但去到光啲既位就唔似嘞~~

走嘞，影多兩張相先，我諗我好耐都唔會再嚟 lee 度 lu，因為真係好攰呀~~

又係人生交叉點時間，我有兩個地方想去，究竟揀邊度好呢？

報時：距離曼谷食、打、煮之旅2014仲有29日~~

北海道東京食、敗之旅 DAY SIX (21-02-2014) PART ONE

又偷懶咗好多日添，lee排個人好懶呀，唔願寫blog呢，有啲想繼續懶落去添...。不過我暫時都唔會俾自己放棄個blog既，因為呢，我再唔寫下嘢，真係驚遲啲字都唔識寫，又怕發生過既事會好快唔記得 (而家已經成日唔記得嘢)，仲有仲有，我知有3個朋友仔會睇我lee個blog，所以我唔會放棄既~~

等我講下復活節做過啲咩先，其實咪係無咩嘢做過囉，哈。頭兩日做咗宅女，喺屋企hea，打機、上網睇漫畫、睇返之前錄落既Julie & Julia，戲入面既Julie都ok，但之後wiki咗真人，感覺幾差下，講返套戲，都ok既，不過好大可能係因為我鍾意睇有關烹飪既嘢啦。仲有睇咗幾集Michael J Fox Show，lee套sitcom其實都幾無聊，但我都幾佩服Michael 佢有Parkinson disease都繼續演戲，所以都支持下。之後兩日就去咗打拳、食下飯、行下街，成個假期剩係買咗一件衫，要俾個叻自己先。

好嘞，言歸正傳，去返東京先：

北海道東京食、敗之旅 DAY SIX (21-02-2014) PART ONE

今日行程好緊湊，因為今日去嗰兩個地方呢，閒日應該會少人啲，而我又只剩返今日係閒日既 full day，所以要編埋一齊，一早就要出發嘞。

係呀，lee間係長龍店呀 https://bills-jp.net/，開8:30。我地9點鬆啲啲到咗，唔駛等位，但都已經9成幾滿，入埋我地個兩、三枱，全滿，開始要排隊。我地叫咗佢嗰兩個名物，再另叫咗杯 latte 同 chamomile tea，飲品先上：

杯 latte (580 yen) 好 creamy，啱我

P話個 tea (680 yen) 都幾好。

等等等，個full aussie breakfast (1,700 yen) 嚟嘞：

個樣好得咁，即試下個炒蛋同多士(名物之一)，errrr，我同P都講咗句：澳牛好食啲囉。反而其他嘢都幾好味既，最正係啲蘑菇，但又唔會覺得好味到想再食咁囉。。

都隔咗幾耐下，第二個名物終於嚟嘞：ricotta hotcakes, fresh banana and honeycomb butter (1,350 yen)：

個樣都係繼續好得，個味呢，lee個就堅值得試，個 hotcakes 好 fluffy，唔似平時食嗰啲，個 honeycomb butter 又好好味，又唔會太漏~~

講堅，未試過既可以嚟食下個 hotcake，真心覺得好味，但問我會唔會再嚟，又未必，因為應該唔想為個 hotcake 排隊，如果我下次想食，都會早啲，唔會排囉。另外，就係覺得都幾貴下，埋單 4,310 yen，即係HK$328，但個蛋同多士唔夠澳牛好味喎，所以都覺得幾貴下，雖然話之後我地飽到唔駛食lunch~~

 其實decoration ok 架，幾舒服，不過就算唔趕時間，見咁多人排隊，都唔好意思坐得耐。

最後放阿 bear 出嚟影張相先，到此一遊~~

好啦，食飽就要趕下場，下篇話你知去邊，哈。俾多兩張原宿街頭照你睇又點話 (但手機真係搞唔掂個背光問題囉...)

報時：距離曼谷食、打、煮之旅2014仲有32日，好期待~~

北海道東京食、敗之旅 DAY FIVE (20-02-2014) PART THREE

上星期六去咗買泳衣，唉，唔掂呀，凸腩腿粗呀，我真係要加油啦。雖則話唔多好睇，都撞鬼咁買咗兩套，一定要加把勁，練吓啲腹肌同甩走個嗰兩個call機先。

噚日S過嚟同我食飯，派手信俾我同P，係白丸，正，好期待!!! 原來佢今次係自己一個去旅行呀。喂，你好型既啫~~

北海道東京食、敗之旅 DAY FIVE (20-02-2014) PART THREE

我地今晚既晚餐係食烤肉：

http://tabelog.com/tokyo/A1304/A130401/13025600/

原本我搵咗第二間架，係啲台灣人好鍾意去既，但因為嗰間喺 tabelog 分數唔太高，我又開始怯怯地，咁就係tabelog再搵下啦。另外，又諗起舟車勞頓，會攰既關係，所以就鎖定咗喺新宿地區。咁睇咗幾間，用我連皮毛都講唔上既日文程度，就揀咗lee間。

我地開住google map嚟搵間舖，沿途經過一啲小型超巿，又入去睇下啲士多啤梨同零食先，不過齋睇無買，因為啲士多啤梨又唔係好靚，而啲零食又貴過函館嗰間好多。行咗15分鐘左右，係迷咗少少路既情況下，終於搵到間嘢啦。佢下底係間大超市，好似好吸引咁，24小時營業，我地諗住食完先行啦。

上到去，間嘢勁細，全full，無位。好彩個姐姐識講英文，佢話8:45有枱，咁當時8:00，無問題啦，跟住佢同個疑似店長講咗兩句，就話唔好意思要9:00先有位，我地都係答無問題，哈，佢好似嚇咗一跳，跟住就幫我留咗名，佢仲想我留電話號碼，不過我地答佢話無日本電話，佢好好人話無問題。

咁仲有一個鐘，就行下超市先，哈，好嘢，買到士多啤梨今晚消夜。行完仲有時間，行返去附近間0101 look look 先，嘩，唔睇尤自可，一睇就燃起我把火，好~多~嘢~想~買呀。但無奈啲時間真係太緊逼，唯有睇住啲款先，嚟緊兩日先同佢死過，哈~~ 跟住仲上咗個10蚊店既舖頭行，行下行下，都夠鐘食飯lu，咁又碌返過去先。

去到有位，姐姐俾咗個menu我地睇，我好順手咁就攤開個餐牌同P一齊睇啦，但個餐牌呢，係無圖既，英文梗係無啦，因為間嘢真係好local。跟住就有以下既對話：

P：其實你唔駛俾我睇個menu，我唔會識睇

J (面懞中)：哦，咁我試下睇啦

P (望下左望下右)：啲台灣人又會識嚟食既，完全唔覺有遊客喎 (所有既客都係日本人，仲要食煙飲酒，吹水吹得幾大聲，有朋友，有公事，有情侶)

J (唔知點解心怯)：errrr，原本諗住去嗰間先係，lee間我係 tabelog 搵既，啲人comment話平得嚟，質素 ok 嘛

P (有啲唔自在)：哦，咁你叫啦，我無 concept 喎

J：其實呢……我都唔會睇得明個MENU，我都係睇人啲COMMENT跟叫，你唔介意架呵

P (笑咗)：哈，咁都得，OK，你發辦啦

我地叫咗：

首先嚟過沙律，因為見隔離個枱好似幾好食咁，不過我叫到姐姐嚟問既時候，隔離已經食完，咁唯有用英文問佢邊隻SALAD有菜囉。好彩佢英文都幾好，所以無叫錯。

希少部位盛り合，2,500 YEN，右上角嗰款呢，無咩油出，又好似燒極唔熟咁，但食落超濃牛味又唔韌，我地一致認為LEE個係全餐最好味既。底個一大塊既都好味，油但牛味都幾濃。左上嗰個就超油，個姐姐叫我地略燒，跟住點WASABI同豉油食，我估佢因為夠肥，覺得似刺身卦，味都OK既，食法又有啲新奇，但真係太油嘞。

 日本而家好興食既カルビ，950 YEN，唔知點解覺得似肥叉，鍾意食肥叉既應該大愛囉，哈

一定要print coupon，我地就揀咗ハラミ，味道都唔錯既，最緊要free架嘛，哈。

 最後加碟牛舌，都幾好味，但如果係塩燒會更正囉。

埋單6千幾 yen，HK$500兩個人分，仲想點，哈。不過真係一次 trip 預一餐食烤肉好了，因為真係幾油架，哈哈。

食飽，仲去咗行下藥房、便利店，先到捨得返酒店。我問P下次仲去唔去食，佢話無所謂，你識叫咪得囉，哈，好彩~~

WAKAKA，等我出返個報時先：

報時：距離曼谷食、打、煮之旅仲有38日~

北海道東京食、敗之旅 DAY FIVE (20-02-2014) PART TWO

星期五嘞，咁又一week，好開心呀，所以今朝又奬自己嘆 mos 早餐，今晚仲有得出街食同行街街，so happy~~

北海道東京食、敗之旅 DAY FIVE (20-02-2014) PART TWO

終於到咗機場嘞，函館機場真係好細囉，我仲以為會大啲啲既，錯晒。check-in 完，都要巡下個機場既，首先嚟杯軟雪糕先啦：

有兩間都有雪糕賣，揀咗美鈴咖啡店，一貫的奶味香濃，以前會怕怕，但而家好like，我越嚟越鍾意奶，仲要係 whole fat milk，救命，好肥架嘛。

俾多大家睇下，我隻手係咪都幾靚呢，唔知醜

跟住就行下啲手信舖啦又，我又買多盒薯條3兄弟，哈，但返到嚟發覺買極都唔夠派囉。仲買咗盒拉麵啦，糖啦，haskapp jewellery 嗰個餅啦，hea 行，坐下又扭埋蛋，先等到入閘上機。

上到機，嘩，好多bb囉，有啲怯。點知真係中咗，最惡劣嗰兩個就係正正坐係後面。未起飛已經蘊釀緊，起飛咗就爆喊，煩都算，仲要佢激動個陣，啲鼻水噴到上嚟，跟住個BB仲嘔添，咁P即用啲雜誌封實椅同椅之間條縫啦 (雖然知個BB父母應該會唔好受，但我地又真係堅怕啲嘔吐物喎，所以......無法啦)。當我個心仲係度驚極啲嘔味會唔會引發到我都嘔既時候，阿空服走過嚟問我地要唔要換位，咁梗係好啦，好在架機唔滿咋。調前咗幾行，好好多，但無咗窗口位嘞。lee啲相係未調位前影既，唔知點解會影啲咁娘既相呢，哈：

 

我都明啲BB辛苦，先至喊，但我都係怕怕佢地，你當我係自私鬼啦。不過，都有好多小朋友乖乖的瞓咗覺，佢地瞓覺既樣又真係幾可愛既~~

到咗東京羽田，想搵個 monorail 既 package 買啦，點知問極啲staff都唔知道係咩，仲要好怕同我地講英文，玩完一輪先自己諗到應該我地係domestic flight既terminal，所以係無得買既 (個package係俾遊客既)。咁死死氣買飛，今次有個中國人staff幫我地，買完飛，見有suica咭買，咁又買埋囉。不過呢，咁仲中伏啦，因為monorail 既 suica 咭只可以係monorail既站先可以退架，所以個兩張咭就跟咗我地返香港啦，退唔返啲按金呀，泣~~

逼完一輪JR (我地撞啱佢地放工時間，又拎住隻中喼，仲要放肥咗架個隻，幾論盡，又怕落唔到車，好在我地住新宿多人一齊落咋)，終於到新宿嘞，嘩，快快趣搵南口去酒店先，出到去，第一下驚唔識路，因為都4、5年無嚟東京，唓，原來唔駛驚，望多眼，我已經認得路嘞，好開心呀，東京，我地返嚟嘞，連啖空氣都熟悉過人既，衰鬼~~

check-in完，去搵食，下篇再講，哈~~

北海道東京食、敗之旅 DAY FIVE (20-02-2014) PART ONE

今朝俾自己歎咗個麥記早餐，佢杯即磨又確係幾好飲既，仲要勁提神。Lunch 有媽咪既愛心西洋菜餃子，好味，下次返去又要讚下佢先得。

北海道東京食、敗之旅 DAY FIVE (20-02-2014) PART ONE

今朝又要早起，因為有重頭節目：函館朝市呀。前年都有嚟，但又病啦，又晏啦，好多檔都閂晒，係食咗個好好味既一文字塩拉麵 (不過之後S去嗰陣，佢已經close咗朝市間分店 lu)，都無咩點行。所以呢，今次原本都有啲期待既，不過呢，行落其實唔係太多嘢啱睇，行下 hea下，就去搵下嘢食好過。P好想試 lee 度啲魚生飯，咁就睇下邊間合眼緣囉，坦白講，其實我對刺身並不狂熱，而且都係鍾意食魚，反而對海膽呀 (因為好難搵到好食，係之前喺壽司大食過覺得好味) 、三文魚子、貝類都係麻麻地，所以都有啲難揀。反覆咁巡咗幾次舖之後，就揀咗間似連鎖店既舖，叫咗lee啲share 食：

蟹肉、魚子、海膽，樣樣都ok好味，同埋真係好大碗~~

我以食太多魚生油膩既理由，揀咗lee個天婦羅飯，哈，我都覺得嗰理由有啲勉強，但我真心覺得好味。

食飽先得嗰10點幾，但要hea到點幾先搭去機場，咁又周圍行下，見到佢地，又影下：

之後去咗 muji，見有個土鍋，做緊半價，好鍾意，但真係無辦法托佢返嚟。行完 muji，又睇下衫，但sorry，真係揀唔落同唔想睇。咁去行下超市啦，反而好開心，啲嘢好平，但得個睇字啦，因為好飽，一陣又要搭飛機，唔會亂買啲零食，不過行下都開心。話唔買零食，但都有啲嘢買到既：

唔好理上面嗰2塊餅 (之後喺車站補買既)，下底個3包係喺間超巿買既，有得試食架，1000 yen 3包，我地買咗啲做手信，lee 3 包就自己食既，大推包腰果，真係好好味。雖然我應該短期唔會再去函館，但我下次去日本都會搵下有無啲類近既嘢，因為堅好味呀真係~~

hea 住行都仲好早，咁又去車站貢貢，又去車站買吓嘢食，坐喺嗰度食埋當lunch囉：

罐酒噚晚剩既，包豚舌係車站買既，都幾好味，個mochi係超巿買既，ok啦。

悶悶的又影下相

之後又周圍行下，但真係無嘢好行。終於捱到搭車去機場嘞，沿途影既相：