北海道東京食、敗之旅 DAY FOUR (19-02-2014) PART ONE

噚晚好乖咁跳咗鄭大媽，好似個肚細返少少，但磅數就仲未回落，真係要再努力一下先得

北海道東京食、敗之旅 DAY FOUR (19-02-2014) PART ONE

瞓醒又check 下 whatsapp，見表哥話婆婆精神好啲，搵到張醫院牀俾婆婆返家用，準備好牀同天氣暖返就安排出院。

今日都早起身，因為想食早餐前浸多次溫泉，一朝早對住個海真係好舒服。浸完跟住就去食個自助早餐：

見到窗外有兩隻鳥

其實個早餐係好多嘢食架，我好似攞咗3、4次，樣樣都想試，堅食到好飽

返到房，又影多次個境先：

check out 咗，就去搭返6號巴士出函館JR車站，因為我今次住Smile Hotel，唔，係好平，4,200 yen 一間房，但唔太推介，好舊，唔太得，我覺得俾多少少錢住 LOISIR HOTEL會好啲。

去到酒店，未有得check in，咁擺低咗啲行李，買咗咗巿電一日券就去玩啦。首先係去 lee 度：

五郭陵，其實無咩特別嘢睇，但我地係度喺度影咗啲自拍雪景相，好靚呀，幾開心架~~

相影完，片拍完，就出返去，諗下上唔上個塔同埋買下手信。咁經過一個位，有啲矮欄杆，下面係個河嚟既，咁P就話大家要小心啲，唔好唔小心跣咗落河，咁我又再望一望個欄杆，正講緊唔會過到一個人既時候，就跣腳向前仆，真係正面仆咗落啲半融既雪度，嗰一刻我應該瞇埋咗眼，因為我記憶係漆黑一片，然後 feel 到啲牙勁痛，我應該啲牙撞咗落啲雪度，我嗰刻真好驚，因為無咗啲牙，我都唔知點算好!!!!

到我可以坐返起身既時候，我就揞住我個嘴，我聽到P好驚咁猛問我有無事，佢摸下我啲手腳，然後叫我放開手俾佢睇下個嘴，但嗰刻我真係好驚，又feel 到好多血湧出嚟，咁我就好驚咁話我留牙血，佢就幫我睇下，話唔係牙血，係個嘴唇咬爆咗，啲牙無崩到，又無血。佢扶咗我起身，話行返入個塔買手信既地方坐下。入到去，坐低飲咗啖水，我仲係六神無主，P就叫我摸下啲牙有無鬆，我好驚好驚咁摸下，又好似無。P話咁暫時無事，但佢知有啲人會撞壞咗牙齦，咁啲牙會灰咗，即係死咗，就要杜牙齦。等返到香港，洗牙既時候俾牙醫檢查一下囉。抖咗陣，就去咗toilet洗傷口，除咗個唇，仲擦損咗個下唇對落。搞完一輪，P就問我仲上唔上個塔，我個刻仲愁緊啲牙唔知會點，所以話唔上嘞 (但而家有一點點後悔囉~~)，咁買埋啲燒芝士 (LEE度平過車站)，再買咗啲魷魚同埋燻蛋就走 lu~~

喺度好想同P講多謝同唔好意思呀，多謝我咁驚嗰陣，你陪我身邊安慰我，又幫我檢查有無受傷，唔好意思喺我都無問你其實想唔想上個塔添~~

北海道東京食、敗之旅 DAY THREE (18-02-2014) PART TWO

噚晚又有得食媽咪包既餃子，好味。之後挑戰鄭大媽既塾上操，好耐無做，好彩都頂得住無咩甩。但之後，我又食朱古力，脆脆同埋雪糕，所以呢，我都仲未搣甩返啲肥肉，我要加油呀~~

北海道東京食、敗之旅 DAY THREE (18-02-2014) PART TWO

好嘞，終於夠鐘食飯嘞：

唔係喺房食，但都有間房俾我地既~~

菜單，好鬼豐富

先嚟啲食前酒、前菜嗰啲，隠約記得個酒係蜜瓜味同茘枝味，啲前菜都幾好味咁~~

跟住就食魚生同蟹腳，ok好味~~

跟住係沙律同白湯雞鍋，我好鍾意lee個鍋架。搞到好想喺香港試下個啲湯包，唔知有無咁好味呢

燒魚同薯仔，好味 

我地揀咗蟹飲同釜飯，都好好味呢~~

甜品時間

其實好飽，但都出去拎咗少少嘢食，唔蝕抵

返到房，已經鋪好床舖

我地仲摷咗佢啲浴衣嚟玩著，影下相，好低能~~ 玩完，浸下溫泉同嚟多個 happy hour，就瞓覺 lu~~

北海道東京食、敗之旅 DAY THREE (18-02-2014) PART ONE

朋友S星期五嚟同我 LUNCH，因為我要俾兩樣綠色嘢佢，分別喺東京同倫敦坐機過嚟既。哈，雖然朋友S無露出雀躍既表情，但我知佢好開心既，哈!!! 同埋我要多謝S聽我講咗屋企既事，個結都打開得8899了~~

北海道東京食、敗之旅 DAY THREE (18-02-2014) PART THREE

噚晚表哥 update 婆婆精神好多了，今朝就話醫院想婆婆出院，但因為天氣凍，所以想拖住先。舅母同阿姨都叫我唔好擔心，好好享受個旅程~~

今日要搭10:50既 JR 去函館嘞，其實第一日已經買車票，但都係買唔到連位，不過都係隔條走廊啫。所以我地呢，一早就落去食早餐，跟住拿臨搞埋check out，喺酒店買咗少少手信後，就出發去車站啦。

酒店早餐有湯咖喱，但唔好味既，同噚日嗰餐爭好遠

今次我地都早咗好多到車站，因為呢，其實我係個驚青鬼嚟架，成日好怕miss咗啲車、飛機呀，所以都成日預多咗時間，好在同行的P唔會怪我啫 (even 今次要佢食寒風)。行埋啲手信舖，買埋lunch，都未夠鐘，咁就搵個位圍住個暖爐坐住等啦。見個顯示牌話車到咗，就嗱臨上去月台，上車。

我同P 隔離都係大叔，P隔離個位仲要咳到甩肺，但都唔帶口罩嗰啲衰佬，咁唯有我地自己帶罩啦。隔咗陣，終於等到阿大叔去廁所，即刻啲嘢出嚟食啦，梗係：

原本諗住買吉列豬扒三文治架，但見到LEE個有幾款，就買咗LEE個，都幾好味，但原來無豬扒，得薯餅，有少少失望。另外嗰個又係吉列薯餅三文治，唔，LEE 個麻麻地，有少少中伏~~

食完，瞓下，玩下電話，終於捱晒全程，yeah!!!但去到，見住架巴士走添，下一架要半個鐘後。咁唯有入返車站行下，又買下嘢食啦。

今次都係住 lee 間：湯の川プリンスホテル渚亭 ( http://nagisatei.info/ )

搭6號巴士，落車俾錢，但無散錢，咁就唯有入一千円唱散，但原來真係會好散架，我又心急喎，搞到啲錢跌晒添，後尾執返都少咗250 yen，即係HK$19，肉痛又核突呀~~ 下次我會唔心急，同埋呢，唔等埋站先唱錢，我之後幾日見啲日本人都係行緊車既時間唱既。我呢，為咗lee 250 yen，耿耿於懷咗一陣，仲俾朋友S同P話我唔抵呀，耿咁耐~~

check-in 完，入到房，無咩嘢做，落咗樓買酒，返房 happy hour：

 喺香港都想試，但見細細包賣成10幾蚊，唔捨得，見lee度賣100円，即買，又真係幾好味喎。

左上角塊朱古力餅，好味，之後都有買多2片返香港，燒芝士，送酒一流，好正。仲有隻燻蛋，黃係流心既，又係好得。左下角嗰兩塊係酒店送既，唔記得係咩lu，但好似ok好味既。

lee個梅酒好味，配埋個芝士，好得囉。

happy hour完，仲未夠鐘食飯，影下相，跟住就浸下個溫泉先：

浸完，好熱呀，嘆埋杯雪糕，士多啤梨味，唔太得~~

今晚同媽咪 & 細佬去食上海嘢，好耐無3個去食晚飯，期待中~~

北海道東京食、敗之旅 DAY TWO (17-02-2014) PART TWO

好嘢，朋友P出完trip返嚟，屋企有返啲人氣，即刻暖返啲。佢仲買咗好多朱古力返嚟呀，好大引誘架嘛，咁唯有正餐食輕啲啦，wakaka~~

北海道東京食、敗之旅 DAY TWO (17-02-2014) PART TWO

好啦，睇完草泥馬，搭返JR去札榥，但唔知係咪大雪，臨到站時，架車停咗，跟住有一大段日文 announcement，最後都停咗成20分鐘左右 (但車程其實只係23分鐘咋)。

一返到札榥，就轉地鐵去食 lunch，今日食好期待既 soup curry。我係睇啲blogger介紹：

http://www.suage.info/

一出地鐵站，又刮大風啦，啲雪狂打埋嚟，我地都係匿返入地鐵站等好啲啲。見啲風減弱咗，就嗱嗱臨行啦，又係開住個 map 咁行，今次都搵得算快。去到要等位，不過5分鐘左右就有位，有英文 menu，我地叫咗：

一個係雞腿，我地揀咗steamed，但應該炸好味啲，另外嗰個原本想叫牛，點知睇漏咗個英文字，嚟到先知叫咗牛腸，好在我地兩個都食牛腸既啫。另外，佢有啲 90 yen topping 可以加，咁我地一份就加咗燒年糕，另一份就加咗 cheese on rice。lee個湯咖喱比起我地前年食嗰個稀啲同無咁油，真係可以當湯飲，我覺得都幾好味。

食飽飽，攞返頭先係惠庭買既嘢食出嚟影下相先：

左邊嗰舊係黑椒芝士呀，我地之後等車已經忍唔住食咗嘞，好好味，北海道啲芝士真係好食。右邊嗰個係南瓜 pudding 就係嗰晚既宵夜，又係好好味，我堅 like 北海道啲南瓜，好香好甜。噢，講起都想食。

影完相，就繼續去行下街啦，去咗狸小路，都無嘢睇既，啲嘢又貴，睇咗一陣即撇。跟住就去咗 Parco 行咗個圈，都係無收穫。臨返去札榥前，經過間百貨 (哈，我真係唔記得係邊間)，見有個好大既 food market，就走咗入去行，試食咗啲啫喱，好好味，P原本好想買，但又真係好大包，佢最後都無買到 (唔知係咪我衰多口，又話都幾貴呢，不過啲果味真係好濃，又真係好好味既)。唯一既收穫係：

今次我好似傻咗咁，好想食士多啤梨呀，買咗 lee 個草莓煉奶大福。返到酒店，即試啦，唔，個煉奶太甜，好彩我地 share 食咋。仲食咗個三文治，lee個拳友T介紹既：

老實，我覺得個包唔係話好軟熟，但個蛋沙律真係無得輸，點解會咁好味既先。之後都有買其他味，但嗰啲就算罷啦，但LEE個要試下喎，我覺得~~

食完嘢，又起程啦，經過大丸，又入去大丸行超市先，見到之前個舊同事話好鍾意食既芝士，今次買俾自己試下先，仲買咗盒士多啤梨同個甜餅。行多陣街，就去食飯啦：

miso 豚肉飯，鍾意miso應該都會鍾意，綠茶latte好味，略甜咗少少啦

grilled tuna 飯，配個酸酸既汁，light得嚟又好味，推介

佢都係嗰啲喺 cashier 俾咗錢，拎個牌埋位，佢就會送嚟，水就自己斟，casual 啲都幾舒服。啲嘢有好食。

http://www.nanaha.com/en/shop/

食飽都8點左右，都周圍行下啦，咁都俾我地一人買到一頂帽，我地真係買嘢精。

返到酒店，食咗杯雪糕先：

今晚係玫瑰，好姣囉個包裝。唔，lee個好甜吓，有啲似出面個啲 rose jam囉，我地都係 like 櫻花味多啲啫。

沖完涼，又食：

lee個同我好鍾意食嗰個餅同一牌子，佢話係咩souffle，咁又揀咗士多啤梨味試下啦，唔，普通，都真係好普通。

 士多啤梨呀，仲要係減價嗰啲喎，但都幾好味架，圍記港紙 3x，我覺得好抵囉。

仲有就係喺惠庭站買嗰個南瓜pudding，真係好味呀，真心推介

成日唔知點解去旅行可以食到咁多嘢，平時食多少少都滯住咁，但去到旅行，又可以開胃到咁，神奇~~

北海道東京食、敗之旅 DAY TWO (17-02-2014) PART ONE

噚日無飯帶，朋友S過嚟同我 lunch，食咗辛辣麵，好開心囉，呵呵。lee排好濕，成日都想食辣嘢添~~今晚又唔知搵咩食好~~

北海道東京食、敗之旅 DAY TWO (17-02-2014) PART ONE

一早起身見阿姨話其實唔太係太差，只係醫生想攞定指示，叫我唔好咁擔心。唔，但都係會擔心囉。不過我都無咩嘢可以做到，咁就繼續我地既行程啦。

今朝好早起身落樓食早餐，因為今日要趕9:25班 JR去一個叫做惠庭既地方去睇好可愛既草泥馬~~

http://www.ecorinvillage.com/index.html

車程大約係23分鐘，即係我地可以搭到10點班免費 shuttle。喺惠庭車站都有指示係邊度出，但出到去就無指示嘞，周圖望都唔見有疑似既車，又好大雪下，咁唯有入個待車所等等啦。等咗3幾分鐘都唔見有啲咩動靜，見有個日本妹妹喺度，又過去問下佢啦，不過我地好似嚇親佢，佢帶咗我地去個notice board望個時刻表 (其實我都有......)，我問 : wait here，佢就點頭。但我真係唔知架車會泊係邊度等人上車囉。咁我 keep 住周圍望啦，終於望見架車啦，咁就嗱嗱臨 say thank you，行去上車啦，不過嗰陣都好大雪，心急但都要小心慢行。今程車得我地兩個咋，P就喺車拎到啲 leaflet，10幾分鐘左右，架車就停咗，咁我地就落車啦，但睇落又唔似我睇人地啲 blog 既樣既，但都試下開門，又開唔到。見我地咁低能，司機叔叔就冒住大雪落嚟睇下我地做咩啦，好彩P醒喎，又俾佢睇下張 leaflet，阿叔叔就好nice咁話：next station，咁就快快上返車。架車行多幾分鐘就到嘞，阿叔叔仲好好咁指示我地要入去間嘢買飛。入到去，見啲姨姨喺度篤羊毛，佢地喺度有草泥馬啲毛整啲嘢賣，另外仲有體驗班既。但我地今次諗住睇草泥馬only，所以P又再show嗰張leaflet，個姨姨就好勤快咁賣張兩張入場券俾我地，500 yen each。佢叫我地等一下，再call 對講機。搞完一輪，佢就開門指住一個方向話 : green building，但查實我地真係睇唔清楚嗰度有啲咩，佢地見我地勁無助既眼神，其中一個姨姨就好型咁著返件褸，帶我地行，雖然都係幾分鐘路程，但好大雪架嘛，啲姨姨真係好好，佢職責應該唔包帶路架嘛~~

去到，就有個英文幾流利既女仔接我地，佢猛同姨姨講唔該，我地都有猛講架。跟住個個姐姐就帶我地入咗個類似馬廐既地方，我估係因為太大雪，所以啲動物要喺度避雪。一入度去，其實係有兩隻羊仔歡迎我地架，但我好無情咁將我既注意力好快咁飄到佢地身上 (P仲搞笑，佢直情睇唔到嗰兩隻羊)，噢，我覺得自己好衰囉，哈

 見到嘛，左上角有隻羊羊仲係咁望住我地架，但我地都無理佢，你地叫我做冷血鬼啦~~

佢係好得意同靚仔架，我地有餵佢啦，姐姐就叫我地摸佢條頸，唉呀，好厚架佢啲毛，好好摸呀。同埋佢好乖架，所以姐姐都係叫我地摸下佢。

佢呢，哨牙仔嚟架，無咁靚仔，同埋佢好貪食架，個口明明有草，仲要搶住我地手嗰啲呀。

玩咗差唔多半個鐘，就去影埋草泥馬啲親戚啦

我同P都同草泥馬影咗好多相，啲人話BB/小朋友同動物都可以令人忘記煩惱，替人打氣加油，我信架，因為我同P喺嗰度影嗰啲相都真係笑得好開心，多謝你呀，草泥馬，錫錫~~

因為仲有半個鐘先有車，我地又入返個買飛嗰度坐，啲姨姨真係好好，已經 set 好個暖爐陣俾我地取暖，我地真心覺得warm。坐暖咗，又去八卦有咩買先，最後買咗：

好似都係1,000 yen each，我嘗試過整個草泥馬架，但好似唔係好掂，等P得閒先同佢一齊整先。我地好想買啲嘢，當係支持下個牧場~~

hea多陣，見到架車啦，但個姨姨仲叫我地等等，無著褸就衝咗出去同司機傾咗一陣，嘩，佢真係好犀利。跟住佢返入嚟，叫我地再等一陣，架車夠鐘就會駛近啲。噢，佢地真係太太太好人嘞。

搭車返出去時，喺架車度影架，係咪真係好大雪呢：

我呢，有機會好想夏天再去lee度，睇下花，探下啲動物。到時人暖啲，又喺戶外，free 啲，我應該無偏心得咁犀利架嘞，羊仔，等我呀~~

北海道東京食、敗之旅 DAY ONE (16-02-2014) PART TWO

近排好沉迷朋友S介紹既 TSUM TSUM 呀，成日掛住玩添，但我真係好想快啲抽到大眼仔同三眼仔呀~~

北海道東京食、敗之旅 DAY ONE (16-02-2014) PART TWO

上到JR，即刻換電話咭，將咭我喺香港租既，2G咭，$30 per day，係有時會load得慢啲啲，不過真心覺得夠用，會推介俾啲朋友。入咗咭，跟返張 set up guide，好易跟。之後幫P搞埋，佢嗰部係 iphone，要上返佢個網頁搵instruction，不過都好易。換好晒，就收到表哥既whatsapp，話入咗院既婆婆情況唔穩定，婆婆原本只係入院做小手術，但留院期間有啲問題。我見到個whatsapp，嗰下真係覺得自己好不孝，因為婆婆其實入院一星期了，我聽到佢入院時，都有擔心佢年紀大...... 點解我咁衰，無喺出發前去探佢，自己作病唔去探係咪只係一個藉口呢？唉，我真係好自責……所以我喺車度忍唔住喊。

到咗札幌站，都要收拾心情搵咗酒店先，原本以為前年先住過，應該識搵，但唔知係咪上次我同P都病到傻傻地，唔識路。又諗住有得上網，無做定功課。撞咗兩次，都搵唔到路，咁唯有企埋一邊，上酒店個website，睇下佢點教人去啦。睇完，識路就好易去，去到check-in，心情仲係有啲忐忑，個staff俾咗key card 我，同我double confirm 無早餐，我哦咗一聲就行開，但諗諗下，唔係好對路，同P講咗聲，佢話記得好似包早餐架喎，我嗰陣真係好亂，唔太肯定，張voucher又俾佢收咗，即刻開返個e-mail睇，係包早餐架，咪走過去問佢攞返早餐券囉，學P話齋，自己唔去食一回事，唔俾我地應得既就唔得。

上到房，再check 下whatsapp，見無咩新update，啲親戚叫我放心，佢地會睇住架啦，都飛咗就安心玩啦。收拾咗心情之後，就照原定計劃去食蟹。我地lee一間：

http://tabelog.com/hokkaido/A0101/A010103/1000248/

其實前年都去過，但都係完全唔記得點行囉。咁又拎咗張print out 地圖，開埋 google map，再睇埋車站入面個地圖，都叫做無驚無險搵到。不過行去嗰陣有時好大風，啲雪打埋塊面度，真係好鬼凍同痛，我地都要行一行，抖一抖咁捱過去。

上到去，繼續係無圖，又溝通唔到，想load返個website出嚟，又唔知點解load唔到，我剩係識指咗嗰套餐，但唔識講我揀毛蟹喎，喺徬徨之際，P出手了，喺佢部電話寫毛蟹，嗰後生姐姐認得個毛字，就明白了，謝謝P。原本仲想試埋喜知次，但佢地話無貨喎，唔知係咪因為網走大雪既關係呢，殘念~~

  

 前菜，最鍾意右面嗰篤，應該係啲醃咗既貝類

 蟹燒賣，我鍾意LEE個，佢入面應該係啲蟹肉同蛋白，出面脆，入面軟軟滑滑的，點啲蟹醋，好好味。

 毛蟹，好多年前食過，麻麻地鍾意，今次再試，又覺得佢好甜，好有蟹味，好味~~

牛油焗薯仔真係好甜，我鍾意。佢地會叫我地配啲酒盜魷魚，都OK既，但我都係鍾意剩食薯仔多啲

去到LEE個位，阿姨姨走過嚟問我地嘢，我大概聽到佢講雜炊，我估佢問我要釜飯定係要雜炊，咁我即話要雜炊啦，嚟食都係為咗佢咋，啲蟹粥加咗紫蘇同埋雞蛋，真係好好好好味，不枉我地咁大雪都要摸上嚟。

食飽都8點左右，附近都無嘢好行，咁就搭返去札幌站附近行下啦。行到9點，啲舖都真係閂晒lu，又去咗Lawson買咗雪糕同埋pudding，就返酒店。

 去旅行前，朋友S話HD有啲30週年出既雪糕，叫我試下，今日就試櫻花，鹹鹹地既，幾得意，可以試下

  LEE個pudding 好味喎，夠滑夠味，個焦糖又好正，推介

食完晒嘢，沖完涼，就同阿姨、舅母whatsapp問下情況，佢地叫我唔好太擔心，醫生都係想攞定指示，但我都忍唔住大喊咗出嚟，幸好P好體諒，無多餘既安慰，只係拍拍膞頭，由我喊。嗰晚瞓得唔太好，因為心情未平復，個鼻又喊到塞咗~~