自煮 - 吉野家風豚肉飯

我而家好眼瞓呀，但又想寫blog喎。哈哈，其實我係唔識喺office瞓覺，對手會好痺既。

噚晚我放咗工，去咗超市買餸，今次試煮新嘢：吉野家風豚肉飯，又係出自鬼嫁既食譜，調味跟足，但材料我就無放咁多豚肉，但加咗半塊蒟蒻去煮，但牛油都跟足5g囉。嘩，一落牛油去個平底鍋，香到呢。因為我無LC用呀，所以啲時間都自己調節咗。

我自己覺得唔太似吉野家既味(可能我改動咗)，但都好好好味，又好香牛油味，lee個可以encore喎。

煮完飯，就乖乖去做stepper同鄭多燕，噚晚狀態好多了，所以我都可以做足晒，跟住搞東搞西，搞到1點先瞓，所以而家咁眼瞓囉...

倒數：距離台北趕住食之旅仲有45日 (噚日send e-mail問馬辣訂位啲嘢，佢叫我去前一個月先訂，因為只係接受一個月內既訂位，已經mark低schedule啦。我堅掛住馬辣呀。)

距離北海道東京食、敗之旅仲有82日。

減肥 - 繼續生病篇

好慘慘，我仲未病好呀，已經睇咗兩次醫生，食咗7日抗生素啦，點解啲菌咁頑強架，仲要俾啲同事問係咪減肥過咗籠，所以病？大佬呀，我減肥減咗5個月啦，係都之前就開始病啦，硬係要關我減肥事既，激死~~

好啦，又講下我lee兩日做過啲咩啦。星期六出咗尖沙咀，去咗iSQUARE食烏冬，都係食咖喱烏冬同牛蒡牛肉烏冬，再加天婦羅魷魚同腐皮山葵壽司，其實次次都係叫lee啲，今次再食，覺得自己真係最鍾意食佢個腐皮山葵壽司。跟住去咗攞衫，係呀，又係上上上個星期去睇，又係無我size，朋友P啲款又咁啱有佢size，有得即刻拎，我就要等，次次都係咁既。今次拎完，無再睇衫就走，因為嗰度好得人驚架，睇親都有嘢想買，但我要儲錢呀，真係要停一停先得。為咗食藥前有嘢食，去咗印尼餐廳買蕉葉檽米雞同 "擦字膠"，兩樣都好好味。夜晚諗唔到食咩，食咗譚仔三哥，咁又一日。

星期日如常去打拳，打完去食pret，真係我Sun既飯堂，而家天氣涼，我地就飲湯加個熱三文治share，今次叫 New York Deli，melted cheese、mustard、酸菜同牛肉，真係好好味囉。係銅鑼灣行咗陣，見仲早，去咗太古坊個Island East Markets，我無咩嘢啱買，剩係買咗件lemon poppy seed cake，都幾好味。仲有一個counter幾吸引，係買burger既，但我己經食咗lunch，無幫襯喎。其他stalls呢，food stall 都係賣cake、cookie、tea、coffee，又有好多stalls係賣有機菜，都幾多人買。仲有啲賣手作既，但有啲都幾流下，同埋都係啱鬼佬口味多啲。所以呢，我地好快就閃咗。夜晚就食咗parma ham rocket salad，都係咁好味。11點零其實都眼瞓架嘞，點知瞓落，覺得自己好唔妥，成晚流汗，成身濕嗰隻，但又唔敢唔蓋被，成晚就係抹汗，出汗，抹汗，完全瞓唔到。

星期一病情好似嚴重咗，因為之前嗰晚無瞓過，好攰好攰。晏晝要同啲老闆出街開會，一齊去咗食澳門茶餐廳，叫咗碗茄腩通，唔好味既。好辛苦咁捱到放工，返到屋企食咗朋友P煮既蕃茄煙肉磨菇意粉，嘩，好味過lunch幾鬼多。

食完pasta，就做stepper啦，一路做一路覺得有啲唔妥，但都做夠 45 mins，跟住做鄭多燕，做咗一半頂唔順，流住汗，但覺得有啲凍，拿拿臨走去沖個熱水涼。睇埋黃子華，就乖乖去瞓啦。瞓到咁上下都feel到又想流汗，好彩後尾都無，一覺瞓到天光，瞓夠狀態好好多。

今日lunch又係蕃茄煙肉pasta，不過係olive同chili，都好好味 (特別鳴謝朋友P臨時拉扶幫我頂咗煮飯，原本噚晚係輪到我煮架)

倒數：距離台北趕住食之旅仲有46日。

距離北海道東京食、敗之旅仲有83日。

生病中 - 慶生 @ BBQ 7080

雖然我病咗，但lee兩日我過得好開心呀，又等我講下lee兩日做過啲咩先。

星期三朋友S過來同我食lunch，我地又去咗食元氣，因為我好想食壽司，不過唔知係咪啲藥好削胃，搞到我成日都好鬼餓。朝早其實已經食咗半條粢飯，lunch前仲食咗塊餅乾，但我去到元氣都食咗成10件壽司再加一份芝麻豆腐，但都唔係好飽，但平時食7-8件壽司已經可以KO我架嘛，我真係好鬼驚病完會肥幾磅。夜晚去咗食粥，炒麵同1/4條油炸鬼。嗰日無做運動呀，真係太攰嘞。

朋友S割愛送俾我既禮物呀，好開心。佢話難得係同好喎，所以送俾我，多謝朋友S。

噚晚去咗打拳，跟住去咗BBQ7080慶生。係呀，病住都去咗食韓燒，我都知唔係幾乖架啦，但因為間嘢都難訂位，我又見好返好多，就去啦。今次都叫咗好多嘢食：有五花腩、豬皮，辣豬腸、牛舌、濟洲豬肉、仲叫咗個海鮮豆腐湯同辛辣麵，不過今次堅唔敢飲酒啦。食飽仲去咗食甜品，食咗少少咁啦。

今次無咩影相啦，因為同上次叫既都差唔多，不過真係幾好食。

今日lunch 係自煮既雞柳牛肝菌甘筍炊飯，今次加咗飯呀，上次唔係好夠食。唔，一樣咁好味囉，又易煮，我都幾愛lee個食譜。

今日我又攞咗sick leave，雖然精神好多了，但有好多鼻涕，把聲又好核突，兼且又無晒藥嘞，所以都係抖多日啦，我好怕拖得耐呀。原本都驚係餐飯惡化咗個病，但醫生話進展都ok (咁我又梗係無主動話俾醫生聽我咁抵死去食韓燒啦)，佢話希望我睇埋今次，食晒啲抗生素，唔駛再去睇佢喎，阿醫生真係幾好。

死啦，我好似肥咗好多呀，唔知係咪因為病食多咗，定係病到有啲水腫，又或者係我親密朋友又要嚟探我，所以重咗呢，我梗係希望係後邊個兩個啦，唔想真肥吖嘛。一陣食完藥要去瞓覺，今晚食生果同做運動，希望還下債，可以力挽狂瀾啦。

倒數：距離台北趕住食之旅仲有50日，今次去3日咋，真係好趕住食架，哈哈。

距離北海道東京食、敗之旅仲有87日。

原來有兩個倒數係好開心既呢。





減肥 - 生病篇

由6月尾開始減肥，都減咗4個幾月，托賴，都無咩話唔舒服。不過，今日我終於打敗仗，泣。話說生日嗰日唱完k，已經覺得自己喉嚨有啲唔舒服，嗰陣仲以為唱完k，喉嚨乾啫。星期六仲係乾乾地，都係諗住天氣乾燥啫。去到星期日晚，連個鼻入面都有啲嘢頂住頂住咁，都知死架嘞。捱到今日，終於攞咗日SL，去睇醫生啦。醫生話我等咗咁多日先去睇，個喉嚨腫晒，要開啲勁啲啲既藥，又因為我有啲氣喘，都係開隻輕既抗生素我食喎 (因為我之前都試過氣管炎，搞咗好耐先好)。唉，都係麻煩啦。

你睇，幾多包藥吖，陰公!!!

原本今日約咗朋友S食壽司架嘛，我想食好耐嘞，而家改咗聽日，我估食咗藥，一陣瞓返飽，應該會好返啲卦，我唔想再延期噃。咁今日lunch食咩好呢，就食原定聽日食既薑燒豚肉炒烏冬，都係跟鬼嫁既食譜，調味同做法參考咗，材料我就用咗烏冬一個。洋葱一個，甘筍一條同豚肉4片，分咗兩餐囉。lee個食譜好在可以用屋企啲leftover，又易煮，味道都好好。

夜晚我都係諗住食青蘋同kiwi，仲有方包，一來唔係好有胃口，二來又唔想再煮或落街買。係諗緊仲做唔做運動啫，個人好似好攰咁。不過呢，我噚日都有乖乖的，我諗晏啲啲可能做少少啦，而家我要去瞓喇。

倒數：距離北海道東京食、敗之旅仲有90日。

慶生 - k lunch、鯉魚門海鮮

Hello，幾日無見，唔知有無人掛住我呢，呵呵。

講返我lee幾日做過啲咩先。上星期五我生日呀，一如過往，我攞咗假，不過我都有喺慶生節目中做咗啲啲公事啦，我都覺得自己超乖。一早起身hea咗一陣就出門口喇，第一個節目係同我爸媽、二姨、三舅母同十姨去唱K-lunch呀。我發覺人大咗，都鍾意同啲親人多啲時間一齊，就算佢地唱啲歌，我唔識，我唱啲歌呢，佢地又唔識，都好愉快咁過咗4個鐘。其實有個地方聚下，傾下偈，食下嘢，簡簡單單都會開心。因為佢地話我同二姨都係11月生日，佢地幾個請我地兩個喎 (其實我想俾架，當中得我一個人做緊嘢賺錢嘛，不過呢，我覺得有時俾佢地請下，佢地會好開心，我諗我係佢地眼中都係小朋友，even佢地其實又知道我已經好大個)。我整咗抹茶牛乳布甸做回禮，好彩佢地都鍾意食啫。我十姨仲整咗個健康蛋糕俾我地，係南瓜茸可可蛋糕喎，my first bday cake，但食落似鬆糕囉 (希望佢睇唔到我lee篇blog啦，haha)，味道都可以架。唱完K，就去咗做咗啲啲公事啦。

似鬆糕既蛋糕，稱不上美味，但份心意堅令我開心囉，多謝十姨

做完公事，就趕去鯉魚門食海鮮，我其實都遲咗5分鐘，但都係最早嗰個到囉，我屋企人既time management 真係好差，好彩今次唔係等咗好耐佢地就到啫。今餐六個大人一個bb食咗：豉油皇大蝦、椒鹽瀨尿蝦、蒜蓉粉絲焗扇貝、蒸瓜子班、椒鹽鮮魷、豉椒炒蜆、炒菜、瑤柱蛋白炒飯，食唔晒呀，真係好飽，但啲嘢又真係好好食，海鮮呢，都係鯉魚門最好味，不過堅貴囉，多謝爸爸請客。最後仲食埋芒果、車厘子同阿嫂同姪女送既蛋糕，飽到我星期六都仲滯住呀。

星期六飽到唔想出街，不過好想食即食麵，所以煮咗個嚟食，跟手仲要吔下零食咁啦。哈，我真係將減肥拋得遠遠了。不過呢，瞓完個晏覺 (無錯，食飽，唔做運動，喺度上網，眼瞓就去咗瞓，懶到不得了)，個心有啲歉，夜晚都係食返個沙律好啲，今次我地單買火箭菜，佢配埋啲 parma ham，真係好夾，我下次都買火箭菜先。食完 hea 到十點幾，先至去執衣櫃，今次狠心咁掉晒啲唔啱著 (鬆) 既褲，返得工嗰啲都照掉，到要著既時候再買囉。朋友P"提醒"我，要 keep住喎，唔係又要洗好多錢買過啲衫褲，仲要係嗰啲我唔鍾意既返工衫。Emm，我會乖乖的 keep 住架喇。

星期日打拳，好彩都夠盡情，脂肪 (少少啦) bye bye，打完去食pret，其實我真係幾鍾意食pret，咁梗係唔係話日日食啦，一星期一至兩餐，我都ok架。食飽，行咗陣，就要返家準備今晚去飲同事結婚嗰餐。ER，我都好戥佢開心，不過老實，擺酒間嘢啲嘢食都幾難食，好多嘢我都食咗一啖就停口，所以都唔會好飽。咁可能都係好事嚟既。

今日有朋友P煮既炒烏冬做 lunch，今日食返啲家常嘢，覺得好好味，口味真係變咗喇。今晚我又回歸減肥既懷抱嘞，原本話過達標就開始keep既，但我又想賺多少少buffer喎，所以計劃有變呀，飲食就無咩變，都係有借有還，係運動，原先諗住一星期做6日減到4日既，而家就今年12月31日前就一星期做5日啦。

倒數：距離北海道東京食、敗之旅仲有92日。

(hehe，而家我有個 pop up idea，搞得成既話，會早過北海道東京食、敗之旅呢，不過而家可以做既只係finger-crossed)

自煮新題目 - 雞肉&牛肝菌炊飯、綠茶布丁

噚晚原本想食個青蘋同kiwi晚餐，點知無晒kiwi賣嘞，咁就唯有食青蘋加啲零食就一餐啦，我買咗lay's salt & vinegar 薯片呀，呵呵。食完就嗱嗱聲試新食譜，第一道係參考 Masa (http://www.masa.tw/) 既食譜：雞肉&舞菇炊飯。我煮咗一杯米，用咗一條甘筍、4條雞柳同屋企有既乾牛肝菌，調味就按比例減咗2/3，即係用咗1/3既分量。啲牛肝菌好香，洗同浸既時候已經好香，放咗入飯煲煮更香，真係好愛佢個味道。

啱啱煮好嗰樣，係咪幾好樣咁呢。

分咗4份，同朋友P各帶兩日。味道都幾好，不過我嫌啲雞柳硬咗啲，唔知係咪我叮得太耐既關係呢。

煮落個飯，就挑戰另一個食譜，我又係跟鬼嫁既：宇治綠茶布丁，不過我買唔到宇治綠茶粉，用咗普通綠茶粉咋。味道呢，好滑，都幾香，最好係佢唔太甜，我好鍾意喎。不過唔知係咪我攪得唔勻，所以有啲沉澱咗，但味道又無咩分別喎 (底同面味道一樣喎)。好，等我星期三晚再整一次，星期五請我媽、姨同舅母試下先。

整完晒啲嘢，洗埋碗都成10點半，都有閃過唔做運動既念頭既，但唔得呀，又食咗macarons，又食pudding，肥死啦，所以都乖乖的做咗stepper同鄭多燕 (不過最後嗰兩組偷懶無做，因為都成12點嘞)。但最抵死係，我見朋友P開完OT返嚟，買咗燒賣，我要咗佢兩粒，跟住又食咗青豆條同薯片，食到個胃有啲頂住，要食胃藥先瞓到，你話我係咪抵死吖。

今晚又要出尖沙咀做嘢，又諗起酸辣粉喇，點解我硬係鍾意食啲咁無益既嘢既啫，真衰。

倒數：距離北海道東京食、敗之旅仲有97日。

達標的禮物 - Pierre Herme

話說我減緊肥既時候 (查實而家仲減緊)，同朋友P講好想食Pierre Herme既 macaron，佢好豪咁講話減到目標就請我食喎，嘩，人生難得真正朋友呀，wakaka。所以呢，當我上星期四一達標就即報喜訊啦喂。哈哈，上星期六就去咗揀我既禮物嘞：

wakaka，好開心呀，有12粒呀，但我好乖架，今次分幾日食，想當年 (其實幾個月前咋嘛)一次過食6粒呀，即係成3碗飯既熱量。so far 試咗9隻味，係唔鍾意蜜柑青瓜 (就係奇先試下，但堅唔鍾意佢好重既青瓜味囉)，其他都好味，當然當中有啲係好好好好味啦。我同朋友P都愛佢既 macaron 多過 Laduree，覺得佢味道多層次啲。所以我試過佢嗰啲後，都無買 Laduree。不過，佢最唔好係要你買box set，至少要7粒，唔係咁flexible囉 (喺 Paris 同 London 都可以散買架)。而家剩返3粒咋，即係得返1粒半，因為我要朋友P同我分肥吖嘛，哈哈。不過每次分開佢地既時候，都會搞到佢到有啲核酸......我對佢地唔住囉，泣

除咗買咗啲咁放縱既禮物之外，我上星期六晏晝就食咗譚仔三哥，因為朋友P想食，作為macaron 既金主，點都要同佢去食啦，夜晚就去咗美麗華食 izumi curry，貪佢無咩人。

叫咗 ceaser salad，夠多醬，菜都ok新鮮，好味但都幾肥，個咖喱飯不過不失啦，我都係鍾意食coco curry多啲。

星期日就要食light啲，lunch食咗pret a manager，dinner就 homemade veggie salad with parma ham 同麻醬凍豆腐，雖然支麻醬係低脂既，味道都ok喎。

今朝就食咗1粒macaron同埋去星巴克換咗我份生日禮物做早餐，lunch就食lee個囉，好味呀，不愧為 pasta expert 呀，朋友P。

我的第二份生日禮物：cappuccino by 星巴克 (我估都應該係最後一份啦，因為我同啲朋友興請食飯，唔興送禮物架~~)

egg pasta with chorizo and olive in tomato sauce，簡單但好味

預告：今晚我試新食譜，聽日話俾大家知成唔成功啦，hehe~~

倒數：距離北海道東京食、敗之旅仲有98日 (雙位數啦，很期待呢~~~)

減肥 - yeah!!!

好嘞，講返噚朝上磅既成績先，離目標磅數係：-0.2磅，無錯，我達標嘞 (但其實兩星期先減到0.6磅呢，好似真係慢咗落嚟)。都開心既，提早咗一個星期得到 lee份生日禮物，不過人都係貪心架，我而家又想瘦多幾磅呀，但身邊啲朋友就話而家都ok喎，唔駛再減，諗下點keep仲好。唔，我會盡最後既努力到14/11，減得幾多得幾多啦，有啲buffer俾自己嘛。

之前講過減肥容易 (知道係一段時間，達標就停)，keep住嗰下難 (沒完沒了架喎)，所以而家都有啲忐忑....但我會努力，希望第日如果轉咗工都可以自煮啦，我堅覺得係體重控制幫到手，人仲健康咗添。同埋會keep住運動囉，由而家一個星期6日減到一星期4日，希望我今次keep到啦。

講返星期三晚啦，我真係去咗譚仔三哥食，仲隨心所慾咁叫咗雞肉乍醬麻辣米線同凍檸茶，大滿足呀，雖則吃完有點點的guilty....

返到屋企仲吃咗半件"擦字膠"同幾粒朱古力，lee隻朱古力又幾好味喎，可以試試。

噚日lunch呢，我同兩個同事去飲茶呀，食咗鳯爪、金錢肚、燒賣、腩仔 (大愛，燒味嚟講，半肥瘦叉第一，佢第二呀)、簿餐、珍珠雞 (好耐無食啦，超幸福，因為呢，其實我超愛糯米架)同埋雷沙煎堆仔。哈哈，最開心係我兩個同事見我就生日，請我飲呀，好鬼開心添。

今日lunch係自煮既芝士辣腸炒薯仔，我用咗上次學既 Arrabbiata sauce 去炒，個sauce好香口，配pasta會襯啲，但配薯仔都好味喎。

都係嗰句：樣很衰，但很美味呀~~

倒數：距離北海道東京食、敗之旅仲有101日

減肥全力減弱中，$$持續減少中，嗚~~

星期一、二都係還債日，早餐都食咗yogart、lunch就食sukiyaki汁煮雜菜雞柳、晚餐就食青蘋同kiwi，好似好乖咁，但其實我食咗好鬼多零食呢，雪糕呀雪糕呀、薯片呀薯片、朱古力呀朱古力，咩解究你地要咁好味先，我真係同你地絕唔到交呀，嗚....

噚晚仲要抽起條筋想食方包，晚餐就加多塊方包啦，又係牛油花生醬同果醬，係減肥後先覺得lee啲咁簡單既嘢係咁好味既，今朝又食咗一塊，但而家講起，又想食添u。今日lunch呢，我就煮咗日式露筍雞柳炒麵，因為支炒麵汁唔夠味，我地買咗支日式豬扒汁去溝，今次夠味好多，咁我估用露筍 (唔用椰菜)都幫到手，因為唔會出咁多水，今次我真係覺得成功呢，好開心~~

我仲想講呢，我配咗副新眼鏡呀，都幾靚仔架，你地話呢，哈哈。我個框同鏡係分開買既，我俾個視光師話lee個框太大，唔係好啱我 (其實佢係從戴上去既合身度出發，我耳仔唔啱位架佢要夾硬較個框嚟就我)，不過我又覺得自己帶咗好好睇呀 (唔知醜中)，人呢，覺得自己好睇，就好多嘢都唔實際架嘞，wakaka

噚晚我仲買咗一份禮物俾自己，我唔知中譯本出咗，好彩見有blogger講10月尾已經出咗，我就即刻去買啦。不過噚晚要洗衫、炒麵同埋做運動都無得閒睇呀，今日我帶咗返工呀，因為今日要出街做嘢，做完嘢撘車嗰程好遠下，可以煲佢lu，期待ing~~

一陣出街做嘢，應該會食埋晚飲先返屋企，好想食譚仔三哥呀，仲要係炸醬喎，但好肥喎，好guilty咁添，我仲約咗同事聽日去飲茶，因為我好掛住啲點心呀。聽朝要上磅嘞，咁我究竟食唔食譚仔三哥好呢？(煩惱中~~)

倒數：距離北海道東京食、敗之旅仲有103日

仲有好多日呀，我已經好想去嘞，點算好呀???

減肥@新東記、J’AIME BIEN PATISSERIE & 韓嘉嵐

我呢，唔乖呀，上星期五同六都食咗好鬼多嘢囉，所以今星期又要還債啦。

講返先，上星期五我去咗新東記打邊爐，今次無影相lu，一嚟因為都係啲火鍋料，無咩特別，二嚟係因為同行啲人會覺得影食物相好低能，影嘢食相都係要同啲好fd既朋友先做得出。嗰晚都係食味菜胡椒豬肚湯，4個女仔叫咗都好多嘢食：安格斯牛、三黃雞半隻 (就係lee個雞同個湯底，令我耐唔耐要上去打邊爐，大推呀~~)、午餐肉 (正呀，好耐無食過)、千層豆腐、鮮腐竹、蠔 (剩係lee個無食)、水餃、三款滑 (鯪魚、蝦、墨魚)、油麥菜、菇拼盤。雖然今次無食佢送既甜品，但我每款都食咗幾件，死得。不過，話時話，我真係堅鍾意打邊爐，所以真係忍唔住口囉，太好味嘞。

星期六朝，起身食咗生果做早餐，就做運動，今次加碼：鄭多燕紅帽子，加45 mins stepper，好攰囉。拉埋筋、hea 下 hea 下，搞到2點，咁唯有食埋lunch先出街啦。同朋友P share咗lee個麵 (好樣衰，因為我搣爛咗，先記得想影相)。上次就食咗卡樂B味，今次係coco curry，又好食喎，佢個麵好QQ架，我同朋友P都大愛。

去食晚飯前，我同朋友P先去咗J’AIME BIEN PATISSERIE 買個tea cake先，因為我地想分半份俾晚飯個老闆中同S (佢請我地食飯慶生)，行得咁遠上到去，不如試埋佢啲cake啦，見上次試咗個caramel cube，都幾好味咁。今次就試咗Strawberry and champagne mousse 同埋Sabrina，仲叫咗杯apple oolong tea (店員推介既)同後加咗個brioche。

個Strawberry and champagne mousse，味道幾好，champagne味幾出，但唔係好夠凍咁，個Sabrina就普通啦，係有唔同層次，但無咩火花喎，每一層既味道都係普普通通咁啦。個apple oolong tea呢，似市面嗰啲果茶啦，係無添加卦，但要收我$28一杯，就真係太貴。食咗兩件cake，朋友P提議試埋個brioche啦，emm，好啦，死就死啦。嗱，lee個brioche要等架，因為佢啲包係half baked之後，有order再焗熟。Wow，lee個就堅好味嘞，外脆內軟，仲要好香牛油味，咁多樣之中，我最愛lee個呀。好，又講埋個tea cake啦，lemon味，lee個食完飯返屋企切咗少少嚟食，wow，lee個又係超得喎，個lemon味好好味，佢用fresh lemon，真係好refreshing，又幾香牛油味，又幾綿下，剩返個啲，我就星期日朝做早餐，隔咗夜都好味喎。我都會再去試下佢啲濃味啲既蛋糕，因為上次個caramel cube係好味既，但淡味既 (e.g. tofu嗰啲)，就唔會點試lu，而brioche同tea cake係會encore 既。不過唔會咁快去食啦，肥架嘛~~

食完個tea，就去咗銅鑼灣，又敗咗$1,200，唔得啦，要慳啲先得。跟住就去咗韓嘉嵐食生日飯，3個女仔叫咗牛肋骨、生菜拼盤、海鮮豆腐湯同海鮮煎餅。佢啲嘢真係好食，尤期係個湯，我食過幾間，覺得lee間係最好味既。食晒啲嘢，唔覺飽，但知再叫又會飽同肥，所以我就提議去飲杯咖啡，又可以傾多一陣。

朋友P同中同S嗰杯都係心心拉花，我嗰杯就勁搞笑，佢地話係女仔，我覺得似個啲港漫既人物(仲要係龍虎門、中華英雄啲，救命，哈哈)

星期日原本都乖乖的，但最後都忍唔住extra食咗兩塊方包，搽咗牛油、花生醬、果醬，原來唔食過真係唔安樂添，夜晚仲食咗雪糕同零食。嗚，我lee兩日都要乖先得，我怕真係臨尾衰呀。

倒數：距離北海道東京食、敗之旅仲有105日

減肥篇 - farewell lunch @ Portal - Work & Play

為咗噚日、今晚同聽晚既飯聚，我星期三晚有乖乖的食kiwi 同青蘋做dinner，不過呢，零食都食咗唔少，哎呀，唔可以咁喎，我又要鞭策下自己先得嘞。

講返噚日餐lunch先，lee餐呢，係farewell朋友E既，佢係我工作上認識既好朋友，縱然我同佢工作上位置可以話對立 (哈，各為其主，正常)，我地私底下可以傾好多嘢，交心嗰隻呢 (咁當然做嘢時公事公辦啦，我倆都好 pro 既)。雖然佢轉咗新工之後，工作上可能無咩嘢交接點，但應該會keep in touch，因為我地真係咩都可以傾一餐，haha~~

由朋友E揀 venue，佢揀咗lee間，buffet 形式 (剛啱先話戒 buffet，點知咁快又破戒添，不過主角揀既，我又唔想reject佢)，我同同事G一齊請佢既。啲嘢食呢，味道ok，主要係啲沙律、冷盤咁呢，我就食咗好多 cream cheese (有pepper同onion，係無食salmon嗰隻味)同埋沙律，熱嘢食就出奇地少，我係食咗塊疑似wellington 牛肉，有幾好味既，甜品又有啲啲，味道正常啦，包一杯飲品 $178 per pax再加一，不過朋友E有8折，埋單都係$470。其實都唔係為咗食嘢，主要都係傾下偈，總之就係好開心既一餐啦。希望朋友E係新公司有更好既發展，最緊要得開心~~

查實仲有2碟無影呀，食咗好多嘢呀，好內疚呀，下星期一定要還債呀~~

噚日食完lee餐，個胃頂住，啲腸又有點怪怪的。搞到我打拳都無咩力，打得有啲失準。雖然係咁，我打完拳都有去食碗剩雲吞同凍檸茶。返到屋企，肚超痛呢，搞肚嗰隻，去咗一次，清晒，但個胃仲有啲頂住，食咗太田胃片先瞓到咋。我覺得係碗酸辣粉，因為佢好油到好辣，而朋友P今朝都有一樣情況，所以我估疑兇係佢。我諗都係要停一停啲咁辣同油既嘢先得。

今日lunch食日式薯仔牛肉，今次啲薯仔，我切得大粒一啲，無咁"融"，又真係好味啲喎。下次整都係切返lee個size先。今晚就去我愛既新東記打邊爐，有啲期待，又有啲驚咁啦~~

上個blog唔記得倒數添：距離北海道東京食、敗之旅，仲有108日，wow~~