北海道東京食、敗之旅 DAY EIGHT (23-02-2014) PART TWO

我都係想去個旅行散下心啫，點解要咁多麻煩嘢先。唉......

煩還煩，都要埋尾先：

北海道東京食、敗之旅 DAY EIGHT (23-02-2014) PART TWO

行完 Farmer's Market，嗱嗱臨出發有樂町0101買嘢，因為都幾晏下嘞。但臨搭車前，我地巡晒咁多間藥房，因為想買 scholl 嗰隻壓力 legging，又咁好彩俾我地搵到，即掃。我聽啲朋友講香港買緊 HK$3XX，嗰邊賣 2940 yen，即係HK$223。如果好似我咁有腳腫既煩惱，大力推介試下，真係好work，質地唔焗又似普通legging，好得。

之後梗係血拼0101啦，買下買下又買到差唔多八點先肯收手啦。但都仲有嘢要聽日喺新宿買，點解既，點解去親東京都要咁癲先，衰~~

P話搭咁耐車嚟到，周圍望下有無嘢行啦，但因為都八點，其實好多舖都收咗，最後都係得3coins 有得行，但睇落又唔係樣樣都抵既，最後無收獲就走啦。

今晚晚餐就係試 Freshness Burger，因為我呢，好想試下佢地個classic cheese burger，之前睇到話日本有個burger 選舉，lee個包攞第二，加上我個hair stylist極度推介，而香港有分店嗰陣我都無試過，咁就過去日本試下囉。

好啦，我地揀咗新宿其中一間分店，研究咗一輪飲啲咩之後，就埋counter啦，嗰陣已見有個staff好似避避地咁，叫咗個後生女嚟serve我，咁我就ORDER啦，點知個女仔一面惶恐，手忙腳亂咁搵咗張英文MENU俾我。咁我就指俾佢睇，哈，佢竟然要攞返個日文MENU對返個位，先知我想叫啲咩。errr，唔知係咪我太挑剔呢，我真心覺得啲staff英文唔好，都起碼記住啲嘢食既英文名稱囉，唔識聽，起碼都要識睇啩。

  

好，講返個包先，佢又真係幾好味喎，啲菜同蕃茄都好新鮮，塊漢堡扒又確係好juicy，又好有牛味，加埋半融既cheese，值得試囉。

原本想飲lemonade既，但見到mojito ginger ale，又覺得好得意咁，按此就叫咗。好薑，個味幾好同幾清新既，但堅係甜，如果可以少甜就好囉。

有興趣，可以望下：按此

Share咗個包，其實都未飽，又去便利店睇下有咩食買先，最後買咗：

 鍾意搵到士多啤梨味嘞，好好食。推介。

lee個chili tomato杯麵好有茄味，又辣辣地，追住嚟食呀。之前都係香港見過，不過賣得貴無試。點知咁好味喎，試過返到嚟搵下有無得賣，但無囉，好想食多次呀。

個pudding真係麻麻地，如果鍾意食pudding既話，真心推介之前po 過嗰個"極"：睇我啦

今日買咗既戰利品：

睇返張相先記得我地喺涉谷PARCO都買到嘢喎原來，就係第二行嗰4對絲襪嘞，好靚但係好鬼死貴囉，但我地都一人買咗兩對，因為真係太靚啦。

臨瞓前，睇到表哥個post，話婆婆精神都幾好，但已經食唔到嘢，又要抽痰，聽朝應該會插胃喉，心痛~~

報時：距離曼谷食、打、煮之旅2014仲有2日~~好緊張呀，希望今日佢地開完個會之後，有好消息啦，因為我爸已經想阻止我去嘞!!!

北海道東京食、敗之旅 DAY EIGHT (23-02-2014) PART ONE

唉，困擾既事未明朗，仲要個曼谷行有啲唔明朗，好唔開心呀，可以點呢我？

唔開心還唔開心，都要繼續寫埋個遊記，唔想連LEE樣都爛尾。

北海道東京食、敗之旅 DAY EIGHT (23-02-2014) PART ONE

今日行程依然緊湊，好忙囉。第一個 mission 係：行新宿既百貨公司，睇下有無嘢啱買，嗱，都話我地係購物狂架啦。不過呢，行晒都無咩嘢買到，咁我地就响伊勢丹既 pierre herme買啲cake嘆下先啦，因為不設堂食，原本諗住返酒店食既，不過最後決定去酒店附近既starbucks買杯嘢，嘆cake：

我唔記得自己叫咗 latte 定 cappuccino 喇，總之勁好飲啦，個奶香到呢，好味過香港囉，好想再飲呀。P飲咗 green tea latte 少甜，佢話勁好飲喎。

 今次得到個粉黃色袋，上次係粉紅，香港好似次次都係粉藍色。

hehe，今次揀咗 caramel 味既千層穌同 lemon tart。個千層穌好甜，但係好好味。佢係嗰隻實得得，最classic嗰隻，真係唔講得笑，好甜好漏，但食半件又真係好好味。而嗰 lemon tart真係極品，酸得嚟好清新，係我食過最好味既 lemon tart，點解可以咁好味既先？我真係好鬼掛住囉。我真心覺得佢係喺果味既控制就得好好，會保留返啲生果既味道，唔會假咗，好叻囉。

食完，就去涉谷嘞，去咗 Parco 睇下有無嘢買。P原本睇中咗隻錶，有得退稅，但最後都無買到，哈，不過佢返到嚟有掛住過一下。行多陣，都無咩收獲，因為佢唔係個個 counter都退稅既，我就提議晏啲去返有樂町買啦，可以有discount又有得退稅，P都話好。咁就去下一站先：

Farmer's market @ UNU ，按此 

行咗好幾檔，但因為我地已經食咗cake同飲咗咖啡，真係好飽下，所以剩係買咗個燒芝士，幾好味喎，可以試下。

其實我地試咗好多嘢食，有果 jam啦，有蘋果啦 (食咗一個好好味既蘋果，但最後一個都俾人買咗，飲恨了~~)，咩都有啲咁啦。最後我地買咗蘋果乾。

鍾意行market既，真係唔好錯過，真心推介。另外，如果真係去lee度行既話，最好早啲去啦，因為我地兩點幾去到，好多嘢已經賣晒，又好多餐車都賣咗啲熱賣餐咁。

報時：距離曼谷食、打、煮之旅2014仲有5日 (但啲人又話27/5有機會有事發生，唓，咁點呀，人地28號先返香港呀，灰呀~~)

北海道東京食、敗之旅 DAY SEVEN (22-02-2014) PART THREE

噚日發生咗啲事，好down，而家個人有啲迷惘，希望快啲可以脫離lee個迷惘期啦。

今日又乖乖咁寫下blog啦，返東京嘞又：

北海道東京食、敗之旅 DAY SEVEN (22-02-2014) PART THREE

買完仙貝，我地就要諗下去邊先。咁我又見搭半藏門線可以去到涉谷，咁就去涉谷行個圈先啦。去到涉谷其實都7點，第一時間殺落IamI，睇下有無嘢買，係就係有啲有樂町0101無既，但無得退稅喎，就真係要諗下先。

行完都7點幾，無咩嘢可以行lu，咁就去西武既pierre herme買下macaron食啦，因為pierre herme第一個開店地方就係日本，所以點都要去朝聖下，網址。哈，去到pierre herme，見佢有cake賣，咁梗係買cake啦，香港無架。買咗佢個signature dessert：Ispahan

上次迷迷懵懵唔夠瞓之下喺巴黎 Lafayette 食過一次，埋單先知佢收我 12 euros，嘩，貴到呢 (應該因為喺嗰度食先咁貴囉，平時好似賣6 euros 咁上下。Lee 度賣 800 yen 左右啦，無記錯既話。

淡淡的玫瑰，唔係嗰啲香精味，有raspberry中和返荔枝味，但主角都係個荔枝。以甜品嚟講，好精緻同埋味道有層次既，但我地唔係荔枝fans，所以都係覺得試埋今次就夠嘞，可以試下佢其他既cake。

食完個 Ispahan，8點幾，咁就快行0101望下有無嘢買先，都係無嘢啱賣。咁就行到9點，要食個晚飯嘞，我地今晚食 tapas & tapas，我地好鍾意 lee 間西日 cafe 架，按我。

 啲staff英文都係麻麻地，不過有英文餐牌，可以問佢地攞。

沙律菜好新鮮，汁也好吃，嗰杯好似係cassie soda，有啲酒精成份既，好飲。

lee 個 pasta 係季節限定既，用唔同顏色既蔬菜同sausage煮既pasta，清清地，但又好好味。好想自己跟煮。

個 pizza 好似係 buffalo mozerella cheese同 basil，佢好得意咁跟個 maple syrup，我地有試下落，幾趣怪啦，不過唔落好味啲囉。

放兩隻 bear 出嚟抖下氣先。

食飽飽就打道回府嘞，但當然又係唔可以俾佢停啦，返到酒店繼續：

lee個味都唔錯

繼續同酒精 & 士多啤梨做朋友

 lee個餅又出場喇，就知我真係幾迷戀佢啦。

臨瞓，為今日既戰利品影張相先：

今日係手信日，大部份都係手信嚟既，至於個包椎茸呢，就係P喺上野話好抵，可以返嚟煮飯用，所以就買咗。返嚟，煮過都幾好味。

報時：距離曼谷食、打、煮之旅2014仲有9日 (但啲人話聽日係關鍵，好擔心呀~~)

北海道東京食、敗之旅 DAY SEVEN (22-02-2014) PART TWO

懶咗好多日，一嚟因為有 lunch appointment，二嚟係因為發生咗好多唔太開心既事......希望晴天快啲出返嚟啦，希望在明天，我信~~

北海道東京食、敗之旅 DAY SEVEN (22-02-2014) PART TWO

今日既第2站係：上野。我地呢，好想買我地個髮型師上次送俾我地嗰包仙貝，佢口行行話上野有得賣，但無講邊間舖，咁我地就估係二木之果子啦。

就係lee包嘢嘞，鍾意食日式豬扒汁既人都應該會大愛架。

去到上野，真係唔識路嘞，今次，行咗幾轉先搵到。唓，我地行晒兩間都無嗰個仙貝賣既，唉呀，俾人呃呀。但一場嚟到，都買咗一大包零食手信走。見到0101，又入去望下有無嘢買，係無架，啲嘢好成熟，大家唔駛嘥時間。搞搞下都成3、4點，肚餓，食咗：

 係呀，我地食kebab，辣辣地，幾好味。

 之後，見好多人排隊，又跟排先，揀咗紅豆。但之後見人食custard，好似好味啲

佢特別在有好多邊位，脆既，味道ok啦~~

   

臨走又行下啲藥房，買咗阿姨臨時搭買既龍角散、仲買咗兩支防曬，就要出發去下一站：skytree，新景點，點都要去八下既。想影個tower，但影得好樣衰呢。

入到個mall，第一件事就係：食雪糕&買綠茶卷

  

辻利，我地係喺京都祗園識佢架，試過佢啲綠茶卷，超美味，嗰陣買咗啲返嚟做手信，嗰嗰都讚呢，開心到我呀。今次買少少，兩包，一包S request既，另一包俾自己食既，梗係。

個雪糕好好味囉，杯drink都唔錯，大推。

行下個mall先，唔，其實都無咩特別嘢睇，縱然有我like既牌子，但lee度無銀聯5% off之餘，仲無得退稅，所以我地都唔願喺度買嘢。

最後，就去搵二木之果子，睇下lee度有無仙貝買啦，oh no，都係無既。不過，唔知係咪我既錯覺呢，lee間分店既價錢好似貴過上野喎。臨走，行咗入間似 citysuper 既 supermarket 北野ace，行咗一圈，見無仙貝買，咪諗住走囉，經過cashier既時候，

P同我講：喂，有呀

我問：有咩

佢話：你望下個女仔買緊呀

係喎，原來佢買緊我地搵咗成日既仙貝呀，咁即刻走返入去搵啦，叻叻既P見到，但得返兩包。因為我地想買嚟做手信，又問下個staff有無多啲，但佢話無囉。咁得兩包點分配好呢？P就話一包自己食就一定架啦，咁另一包就俾S啦。好彩S後尾話我知佢勁like咋。

臨走，影個夜晚既先，仲樣衰，哈！

 報時：距離曼谷食、打、煮之旅2014仲有11日 (但而家好驚無得去，擔心ing)

北海道東京食、敗之旅 DAY SEVEN (22-02-2014) PART ONE

聽日又放假，好開心，因為我極需要假期俾我 relax 一下，因為呢，lee排都有啲唔開心嘢發生 (不過小事嚟啫)，希望快啲平復返

又返去東京先：

北海道東京食、敗之旅 DAY SEVEN (22-02-2014) PART ONE

今朝收到表哥 whatsapp，婆婆要入老人院，因為佢食唔到嘢，要插胃喉，會安排 lee 兩日出院。睇到個msg，好心痛，但無辦法......

好啦，行程繼續，今日都好忙，因為都幾多地方去，第一站：築地。我地之前都嚟過3次，3次都係朝早7點到，因為要排壽司大。記得第1次食真係好感動，嗰海鰻真係好味到震，第2同3次都覺得好好味，但真係無咗第1次既感動。不過呢，今次真係無能力再排，上次排咗差唔多3個鐘真係極限。

咁今次就 hea hea 的行下就算，我地喺築地巿場站出，一出就係巿場入口，咁就行咗巿場，再行場外巿場啦。第一次 weekend 10點幾到，比起我地上次嗰3次多人好多，間間食肆都有條長龍，有啲驚呀。行到大定，又試下玉子先：

唉，post出嚟，其實係想話俾大家聽呢，lee條玉子唔好食呀。唔知點解，有啲蛋腥味，怪怪的。後尾見場外有啲舖好似仲好味咁，不過我地無再試啦。

食完蛋，就出去場外行，噢，啲士多啤梨、冬菇、菜呀、生果都靚到不得了，令人衝動想買，但真係無福消受呀。齋睇唔買之後，就搵嘢食啦，我地見lee間迴轉都幾多人就決定食中 lee間。好彩，入到去都有位，但都 full 咗9成幾。

 第一碟，我咗熟蝦，係，我認我傻咗，但我真係好想知究竟日本既熟蝦會唔會好食啲，哈，答案係：唔會囉，同香港元係差唔多。

跟住lee碟係叫落order俾師傅既，好似係手指指俾睇既，赤身、中拖羅同大拖羅，中拖羅最得我心~~

lee碟拎既，係啲秋葵撈咗唔知啲咩，幾得意，又幾好味。

 叫既，海鰻，雖然佢無壽司大咁鬼好味，但都好味，最衰無encore

金目鯛，都係叫既，又係正，好味~~ 

最後，叫咗碟比目，麻麻地，無咩魚味，但質地好搞笑

上面已經係兩個人既分量，埋單2千幾円。P話壽司大精緻好多，認同，但真係無力排。其實我覺得lee間都唔差，但又唔會話覺得勁好味咁囉。走既事候，見到有條龍排緊，好彩我地早啫。下次真係要編去試舊同事E極力推介既美登利先~~

臨出發去下一站之前，經過個蕃薯車，香到忍唔住買咗：

lee個真係勁甜勁好味，諗返起都好想食，唔記得400 yen 定 500 yen，有啲貴，但真係好好味，尤期冬天食個熱辣辣既蕃薯，享受也~~

報時：距離曼谷食、打、煮之旅 2014 仲有18日，好開心呀~~

北海道東京食、敗之旅 DAY SIX (21-02-2014) PART THREE

嘩，我又懶咗好多日嘞，因為lee幾日都有啲lunch meeting，所以真係無時間寫。

好嘞，去返東京先：

北海道東京食、敗之旅 DAY SIX (21-02-2014) PART THREE

原定今日去完廸士尼呢，我地會去東京站行既，因為有好多新既嘢睇 (畢竟我地都係5-6年無嚟)，但我之前咪話我對購物既火喺前一晚已經燃燒起嚟既，所以呢，得到P既同意之後，我地就殺落有樂町0101嘞。揀0101係因為銀聯咭/悠遊咭有折，但又點解我會揀有樂町呢 (原本都唔想講架，不過呢，我估唔多人睇我個BLOG，所以無所謂啦)，主要係因為佢得好少香港人同大陸人去，東京又得LEE間店有我地愛既bulle de savon同埋佢同集團既牌子既counter，lee個集團自己唔搞duty free，所以呢，我地其實係一定會嚟lee間0101掃架，退埋稅，都爭成10%架。

好啦，咁都要去東京轉車既，話說我地剩係喺4點幾share咗條churro，其實好餓吓，但又真係好想留返啲時間買嘢，我認我係購物狂，所以呢，喺東京站見到有間靚靚地既bakery，就衝咗入去買包食，都有幾款好似幾吸引咁，哈哈，不過我已經唔記得咗最後買咗邊款lu，剩係記得麻麻地咋~~

去到0101，P第一時間俾間selected shop吸引咗，佢係買嗰啲小電器、保溫杯，但好型嗰啲呢，好多嘢都好靚，但因為香港同日本電壓唔同，所以都係得個睇字，但都好開心。

之後，又見到啲減價毛巾仔，想揀啲做手信，但都唔靚，最後無買。再行下，又見到VW啲襪，嘩，快手揀咗幾對，揀完問個staff係咪悠遊咭有折，佢帶咗我地埋咗一個counter搞，即時就做埋折。跟住就殺上去買衫，第一間就衝咗入frapbois，嘩，跌咗好多錢呀，俾錢時，我地問佢悠遊咭有無折，佢唔知係咩，跟手就問佢銀聯，佢就知，佢就叫我地上8/F (確實層樓，其實我唔記得嘞，哈) 俾錢，跟住攞返張單嚟拎貨。

作為一個講求效率既顧客，我地梗係睇埋其他啲counter，一次過找數啦。下一站就係mercibeaucoup，唉，梗係繼續失守啦，試衫試到火紅火綠，時間就一分一秒咁溜走，見都7點幾就問個staff收幾點，因為要預時間退稅吖嘛，佢答我地9點，yeah，即係可以再行埋bulle de savon啦。

揀完晒嘢，都8點幾，即上8/F俾錢啦，嗰度其實係會做埋 tax refund既，好方便喎，唔駛兩頭撲。因為都幾晏，所以都無人排隊，我地拎咗張銀聯咭出嚟，P問佢可唔可以俾cash，佢又話得喎，即係就咁show張銀聯咭出嚟就有折，咁我地就 pay cash 啦 (我地去旅行都鍾意俾現金，因為預咗幾多錢去駛就駛幾多，無咁易洗突)。 佢收完晒錢，我地就問係咪可以做埋tax refund ，佢話係，就幫我地做埋。嗱，長氣我都要講埋，因為幫我個staff真係好好好好，話說我地係G/F買咗啲襪既，P已經提過我要拎埋出嚟退稅，我其實都牢牢記住，無奈去到退稅嗰嘢，我真係唔記得咗，到佢填埋份form，佢keep個張都拎走咗，黏埋上去先記得，我即刻勁唔好意思咁say sorry，問佢可唔可以做埋，嘩，佢一啲黑面都無，仲猛話ok，然係拎返佢keep嗰張出嚟，慢慢就返位搞埋嗰張單，所以一定要喺度讚佢~~

好悶呢，咁長既字，哈，我地兩個幾鐘買咗：

最抵係右上角嗰件tee，減會嘢，HK$100左右，開心呀~~ 其實因為係第一日shopping，己經有啲忍手，因為怕之後會見到更鍾意既嘢，又無錢買。

跟住就返新宿食嘢，返到去其實都9點幾，咁就去P最鍾意嗰間啦：

我地去到都幾full下，啲staff叫我地去坐啲單丁位，但我地拎住好多袋嘢，見有枱客就走，就等咗一陣囉。其實佢啲嘢都叫又平又抵又幾好食既，P仲係佢忠實 fans。話時話，我覺得函館嗰個好味啲，但佢覺得lee個好味啲喎，唔，口味唔同囉。

食飽，唔願返酒店，又去行下藥房同便利店，又買咗：

見係蕉味，有點卻步架，但P話拼死無大害，就試下啦。咦，又OK喎，幾好味

我同P都係綠茶既朋友，見佢幾吸引，又平平地，買咗，但因為之後太多嘢食，所以我地最後帶咗佢返香港先食佢，好味喎

畏哥話婆婆精神好咗，識得周圍望下，但都係唔係好食到嘢，如果再食唔到，就要插胃喉，好擔心~~

報時：距離曼谷食、打、煮之旅2014仲有22日