曼谷喪食喪打之旅2013 DAY TWO (12/6/2013) Part I

噚日去咗剪頭髮，今次又玩見耳仔嗰隻短 (老老實實，唔關 "夏晨" 事架)，只係近來既生活有啲枯燥，就搵啲嘢改變下。係仲有少少大面既，不過接受到，係今朝起身望到塊鏡唔係好認得自己啫，低能~~
噚日出咗街，離不開食嘢，晏晝食大阪王將餃子+拉麵、下午茶係Glacio@K11 (好食喎，有下次)，夜晚去丸龜製麵食烏冬，其實係為咗件稻荷山葵壽司。三餐都好食，不過內疚囉。諗起今個星期仲有兩晚飯局就.....，幾時可以瘦啲呀~~

DAY TWO (12/6/2013) (Part I)
話說之前嗰一晚漏夜落樓去7-11，除咗酒，就係要買lee張嘢：

但因為我地無咩錢 (我地係機場無唱錢，嗰rate太差嘞，所以啲的士錢呀，買嘢既錢都係拳友J夫婦用上次佢地用剩既錢墊出來先)，只可以買住2張用住先。嗰晚其實就即刻拆咗來試，都玩咗一陣咁啦，無記錯換咗咭，部電話係read唔到張咭，要熄咗機再開過，先會read到同收到msg話用得咁 (我地一張入iphone，一張入samsung)。拳友J兩夫婦共用1張，拳友E就Share hotspot 俾我同拳友T，但用咗一陣，我地就決定唱咗錢之後，各自買一張啦，因為Share出來真係好嘥電，無謂做陀衰家，又唔係貴，299 baht，HK$75就有7日任上網+100 baht 通話喎，lee啲錢唔好慳啦。(話時話，lee張咭堅抵用，上網速度ok之餘，嗰100 baht通話真係用到好耐，我每日都無聊咁搵人講下電話，講到返香港嗰日都仲有剩。)
講返今日先，今日集合時間係10:00，無論我幾咁攰，都無法戰勝生保床，成晚係度碌碌碌咁過，所以呢，今日真係超無精神。

第一站，我地就要去撘BTS 去 National Stadium站唱錢先，無錢喺身真係好無安全感架。又講下，間酒店好多嘢都好，就係離BTS站幾遠下，要行成20分鐘，好在我地好彩，成個trip唔係好熱咋。喺去BTS既途中，有位阿叔見我地睇map就過來搭訕，問我地去邊，我地答Siam，佢就話今日係buddhist day，Siam啲商場要下晝3點先開，又懶好咁介紹我地去個咩鬼local mall，又平又多嘢買喎。佢見我地有啲遲疑，就話自己係休假 police喎。其實我地聽到一半已經知道唔對路，想走，不過佢搶咗我地張地圖，我地要攞返先走得咋。跟住佢都仲係死纏我地，我地就話要去7-11買啲嘢先，佢先無再跟住我地咋。行咗成20幾分鐘，終於到Sala Daeng站。多得拳友T同事借咗3張rabbit 咭 http://www.rabbitcard.com/en (類似octopus card) 俾我地，所以我地買多2張就ok。
到咗National Stadium站，就跟住拳友J去佢地口中最好rate既exchage換錢，又確係高喎，兌3.97，咁我諗住我又唔買Skin care，又唔買underwear，就唱咗HK$3,000，有11,910 baht，都夠玩卦。(我都想share間嘢既地址，但我搵咗好耐都搵唔到有關資料，剩係記得係MBK附近，所以share唔到，唔好意思)。
唱完錢，就去MBK搵早餐，睇咗幾間就揀咗Yum Saap食。我原先都唔知道lee間嘢都幾出名(我返到來search，先知咋)，佢係媽媽麵專門店。今餐無影相，我記得我食酸辣肉碎撈麵，好好食喎，同行既食冬蔭公麵、海鮮炒麵咁啦，再叫咗啲沙律、小食同埋炒菜，飲埋嘢，5個人食咗1,006 baht，我覺得抵囉。

 

食飽就行下咁啦，頭先去搵嘢食嗰時已經見到個買酒既corner，咁佢地就梗係買咗先啦，驚一陣又唔俾買吖嘛。我對酒呢都係無concept既，佢地最後揀咗支2 litre既sake (其實佢地一早已經諗住飲sake，sake樽都帶埋來。) 跟住就買咗1人1隻杯仔飲酒用同埋一包洗衣液，所有嘢呢，就由人地老公揹住成日囉，辛苦晒。

待續...