Eason Life 2013 (7月26日)

嘩，對上一個post 已經係2007年!!! 嗰時真係有心寫完個旅程，畢竟做咗兩個月既backpacker喎，我估我有生之年都未必再有機會lu，嗰陣仲叫後生先頂得住咋。但嗰陣返來無耐就有工返，仲要係workload同壓力都極大既工，所以......

不過呢，無寫都可能因為我既性格既，我又唔係好鍾意人地八卦我啲嘢(睇人啦)，但其實我又好鍾意將自己既諗法同人分享。咪就係嗰啲唔敢露又想露嗰啲人囉。

好啦，見而家份工比較悠閒，就又試下寫啦~~

近排又要減肥啦，所以都無咩出去食嘢 (需知道我最鍾意就係食嘢同去旅行，所以....唉....)。唯一可以講下既就係上星期五(7月26日)去咗睇 Eason Life 2013。

今次睇$380，多得朋友啲同事唔睇，原價轉讓，開先見優先訂票係建行，都諗住無得睇，所以多謝你~~

8:20到場，等到8:45開場。Eason一身casual 衫出場，唱"今天只做一件事"，聲無事，好聽。跟住就係一連串勵志歌：花花世界、Life goes on、每一個明天，美满人生，開始覺得有啲唔對路喎，好似傳福音咁既，同行朋友仲絶，話似"同舟之情"feel，笑咗。Welcome to the Future之後，就來輕快既歌，除咗"碌咭"之外，都ok既，真心唔鍾意"碌咭"lee首歌，但我又聽過Eason唱live唱咗3次，唉......聽到去"沙龍"，真係開心返晒來，啲觀眾情緒開始高漲，high到唔俾Eason講嘢，不過佢開心既，見佢笑到個口梗咗，哈哈。最後encore係"與我常在"，都好~~

今次係開場唔係好投入到之外，其實都好好睇。不過可能係我問題啫，我問過睇過既朋友都話覺得無嘢，係我自己迷戀有啲陰暗既Eason啫，諗起06年 moving on 佢第一首就係"白玫瑰"，嘩，不得了。其實好恨再聽live既"活著多好"，不過無唱到吖~~