今晚撘阿聯酋EK385，A380喎，第一次撘都有啲期待。飛22:10，咁就放工先去機場啦，唔好嘥日假吖嘛。返到公司當然係無心機做嘢，就同拳友J apps下仲有啲咩要準備下咁，其餘2個拳友，1個就忙工作忙到死，另1個就忙執喼。等等等~~~~~終於7點啦，可以落樓等佢地架的士過來pick 我啦，開心呀~~撘咗一個鐘左右，終於到咗機場，等齊人就check in 先啦。其實今晚我係plan咗食阿鴻小吃既，因為我未食過，但又唔想去北角店排隊。check 完 in 其實都得返一個鐘左右，咁就梗係仆到去T2 搵間嘢啦。但其實由T1去T2又真係幾遠囉，喺咁趕既時間下，就憑直覺搵啦，咁當然係....搵唔到啦。到知道嗰位置之後，得返7個字，咁算啦，求其喺 foodcourt 食啦，嗚~~~ 喺foodcourt 望完一輪，真係唔知食咩好，可能心有不甘啩。揀來揀去，剩係想食水煮牛肉麵。嗰一刻我真係有掙扎過，雖然我食得辣，但其實辣會刺激腸道喎，最後當然慾望戰勝啦，同行既人一見我個餐，都問：你唔怕疴咩???咁人地食唔到阿鴻小吃，剩係揀到lee樣咋，唔理啦，豁出去~~
食完就急急腳走啦，當時有一位拳友仲未提款呀，T1嗰個就維修中， 而T2呢，就無佢想要既櫃員機喎，咁佢咪無錢洗~~哈哈!!!咁我地唔會咁衰既，其中一位拳友就出手相助，提幾千蚊借過佢先啦。之後，就連行帶跑咁去過關入閘啦。第1次喺T2入，原來好少人架喎，好快過咗，但仲要撘兩程無人駕駛先去到我地嗰閘口喎。
終於到咗閘口啦，都上得七七八八喇，咁等埋拳友E買埋本雜誌就上機啦。上到機，啲位好寬敞下喎，比起我3月去英法撘既CATHAY 機，真係舒適好多萬倍囉。不過，戲我就覺得唔夠多，可能我3月嗰次真係睇得太多啦(來回睇咗8套，因為太辛苦瞓唔到)。都唔記得咗睇咗啲咩，食下飛機餐，飲咗少少拳友J分俾我地既白酒 (無錯，我地3個女仔要餐嗰刻好純情，叫咗可樂同蘋果汁，係佢地兩公婆先叫酒咋，佢地仲笑我地添，因為其餘2位女仔其實都好酒架，我就……同佢地一齊先飲囉)
大慨0:10左右，到咗曼谷啦，排隊過關啦，又真係見到當地啲關員攞住支通鼻嘢喺度索喎，我睇人地啲blog話lee 支嘢好hit 架，話成日見到啲sales呀，恰眼瞓就攞出來索，哈哈，我一定要買啲返去。就係lee 支：
(又確實好好用喎，又平，喺Big C買6支就81 baht，圍係hk$4 一支，喺7-11就20 baht一支，都係hk$5。不過，我唔係攞來索，因為佢可以扭開，搽啲蚊咬既地方啦，拳友E話敏感都得喎)
排喺我前面係個鬼佬，佢好似好熱情咁想到個關員溝通，但個關員就猛指住地下嗰腳印位叫佢企好，搞到到我嗰時都有啲緊張咁，企得好中嗰位架。過晒關，攞完行李，就去撘的士啦。啲counter寫就寫meter taxi，但其實唔係計meter囉。咁夜梗係一架車過好啦，所以就要求7人的士，講好價700 baht，就塞晒啲人同行李上車。上車無耐，我見到拳友J老公坐嗰個位(司機隔離) 有條George呀，我都真係驚驚地，話晒困喺架車度，困獸鬥喎，咁黑，佢一閃真係唔知閃咗去邊。我有諗過唔講架，費事引起恐慌啦，不過我又怕人地老公唔知，一個大動作，嚇到George亂閃呀，所以我都講咗出來。原來，人地老公都見到，所以佢盡量唔郁唔講嘢。點知，我地有個拳友勁怕George架，佢仲話好想落車。好不辛苦就捱到我地酒店嗰區，咁我地有google map行過，所以認得，一直望就一直安慰嗰位拳友啦。又好在我地之前”行過”，又一直望住啫，因為個司機夠膽死行過龍呀，我地即刻喝住佢啦，都過咗好幾個街口，但因為要去到好前面先有得U-turn，個司機竟然就咁倒車囉，好在已經成半夜2點，無咩車咋，真係俾佢嚇死。
好快就check 完 in，叫酒店啲staff 由廳度搬返張extra bed 入客房，都成2點幾3點啦。好應該要瞓啦，但我班拳友又真係傻架，仲話要落去7-11買酒飲，唯有捨命陪君子啦。行咗都幾遠下，先搵到間細細間既7-11，揀好零食同啤酒就去俾錢，點知個cashier抽起啲啤酒，話no after midnight喎，原來0:00後係唔俾賣酒架~~
返到酒店，食下啲零食，商量咗一陣聽日既行程，沖下涼，都半夜4點幾啦，要瞓啦真係~~
沒有留言:
張貼留言