爸爸的生日飯 @ 名苑 (大角咀)

上星期五晚，去咗遠遠既名苑@大角咀同屋企人食飯慶祝爸爸生日。揀嗰度並唔係因為嗰間嘢出名，只係阿姪女年幾前出世之後，就差唔多所有既飯局都揀係大角咀食，查實都幾悶，但無計啦，湊住隻B又係幾麻煩既。

約咗7:30，都預咗有人遲到，好彩8:00前都到晒。跟住又玩一輪睇菜單，又推來推去，我嗰陣其實已經好鬼肚餓，所以就話叫個6人套餐啦 (我地6個大人加1個阿B)，唔好諗咁多。

先來兩個前菜：素鵝同五香牛"月展" (因為大家好餓既關係，我都影唔切相)，又加一碗海底棷煲雞既湯。前菜都幾好味，個湯不過不失啦。

左上：西芹炒象拔蚌&蚌片 (OK 好味的，不過好少象拔蚌囉)、右上：炸蝦醬骨排 (Lee個好多肥膏，好漏)，下面嗰個瑤柱蝦軟浸菜苗就幾味，因為係我愛既油麥菜，亦好在佢既蝦乾係無味的，因為我好怕蝦乾陣味架。

左上：海蔘鵝掌煲，我利係食鵝掌，都炆得好淋，幾好味。右上：芝麻雞，不過不失啦。中間條蒸魚，個豉油無味既，我又好飽下，所以無食。左下既壽包，ok呀，阿爸開心之餘，阿B又搶住食。右下嗰個杏仁茶蛋白，真係敗筆，勁甜，又無隔清，我真係好掛住聰嫂嗰個囉。

個餐好似係$938，加咗3個白飯同半打壽包，加埋一，埋單$1,200左右，OK啦。

個飯局都幾開心既，見住爸媽望住個孫女留晒口水，冧到死個樣真係好搞笑。不過，每次見佢地又覺得佢地又老咗啲，都好怕佢地身體唔好，但叫佢地生活得健康啲，做定期檢身呢，又死都唔聽。唉，我又要諗下計點呃呃氹氹佢地，等佢地乖乖聽話先得。