三傻遊台北 - DAY TWO (11-01-2014) PART TWO

噚日俾個客噴，喂，等等，我無做錯任何嘢俾你噴喎，係咪有病先~~ 我足足嬲咗一個鐘，仲搞到我喺阿sir間房講咗句 x 街。夠嘞，我唔會再嬲，唔值得為你激氣~~

講返我個 Happy trip 先：

DAY TWO (11-01-2014) PART TWO 天晴

我同朋友P出發去買手信，第一站去江記華隆買豬肉紙 (我地搭捷運，去到大橋頭站再行過去)：

係喎，排晒長龍，再睇下張通告，話豬肉紙售完，話聽朝7點前限量發售喎。傻既咩，唔會咁做囉。其實我前年10月去嗰陣都成夜晚7點幾先去到，但仲可以任買。究竟係因為臨近新年，多人訂，定係多咗遊客去買呢，就真係唔知嘞。奉勸一句，如果想買既，最好都係訂貨啦~~嗱，我知香港有得買架，不過貴成倍，我又唔想幫襯囉~~

咁買唔到，又行下囉，因為我睇酒店攞嗰本飲食男女，有介紹話附近開咗啲新舖，幾有趣咁喎好似。行下行下見到第一間：大稻埕259，書話佢啲紅豆湯好有心機煲架喎，但當時我真係飽到上喉嚨，所以真係食唔到咯，不過都買咗啲嘢：

左：春一枝，係山楂條，嗰味又帶有啲烏梅味，我同P都愛吃，但我地估有好多人都唔愛佢囉，所以剩係買咗一包自己食。

右：嗎哪南棗核桃糕，LEE個又係好味，唔太甜，但又幾香南棗同核桃味

LEE間嘢係嗰啲selected shop，朋友P話啲雪條都出名的 (不過我唔記得名嘞)，但真係飽到食唔落。買完又再行下啦，都有行到嗰幾間舖，不過，大部份都仲係啲海味舖、雜貨舖咁囉。其實附近仲有啲舖買手作皮革、衫嗰啲，但因為要經過廸化街嗰年市，嗰日係第一日開，太多人嘞，所以我地都放棄唔去搵嗰啲舖 lu~~

下一站就係要去世家買太陽餅，應該搭2個站捷運去中山國小，但因為我太飽，就提議不如行啦，因為幾年前住lee頭附近，我地成日都咁行。咁朋友P話無所謂，不過呢，佢好後悔囉，因為佢行到腳板痛，慘慘~~

我以前試過其他太陽餅，唔鍾意食。前幾年，住lee間嘢附近，P買咗嚟試，話好好味，猛叫我試，好啦，又試下，咦，又真係幾好味喎。所以，我地之後唔係住附近，都會去買架。我仲買咗盒鳯梨酥，因為有個朋友話想食佳德，佢唔鍾意土鳯梨，咁我又唔會專登去佳德，而lee間又唔差，就買咗一盒俾佢囉。

返到台北車站，經過7-11，我話要去買蛋，因為小t推介架嘛：

 返到酒店一試，又真係好好味喎，諗住買啲返香港

又買埋lee個，上次已經覺得個樽好靚，今次終於買嚟試。emm，我覺得好難飲囉，味其實勉強ok既，但好漿口喎，我頂唔順呀

休息咗一陣，就去新光三越行下。當其時，我個鼻已經好痛，有啲嘢喺入面頂住，發炎咁既feel，我知我今次死梗，實繼續惡化，有諗過會唔會發燒，唔俾入香港境呢。但擔心還擔心，都要繼續玩架，一場嚟到喎~~

去新光三越想飲春水堂，點知俾我見有間手信舖竟然有佳德賣，激死我啦，嗱臨whatsapp問朋友要唔要多盒啦，嗰間嘢仲有糖村賣，有諗過喺度買，但又唔知糖村門市有無做減價，我地夜啲又會去東區，所以都係唔喺度買嘞。行下行下，見有間買肉乾既，記得朋友S話想買肉乾，又幫佢試下先，都幾好味，又即時whatsapp佢話佢知，我又諗下買唔買。然後，又見到twelve cupcakes，有得試食，試咗又幾好味喎，不過又係無幫襯，哈哈。最後去咗春水堂，諗住買杯細既珍珠奶茶，但個店員話中杯有折，咁好啦，買中杯啦。

3分甜，少冰，lee個我鍾意喎，茶味幾香，又少甜，啲珍珠細細粒，唔錯，不過杯嘢好似唔平既，但好味就OK啦。

飲完，病住出發去東區行街街lu~~

今日又出咗街做嘢，見噴我嗰個客，面口都係唔係咁好，但無咁癲囉~~之後同阿sir去咗食泰菜，今日差咗啲，但都ok既~~

好囉，就嚟過年啦，放完年假，好快有得去旅行喇，嘩，好開心呀~~

倒數：距離北海道東京食、敗之旅仲有23日