三傻遊台北 - DAY TWO (11-01-2014) PART THREE

噚日去咗食團年飯，我地book咗8點，酒樓嗰邊7點通知話要改7:30，搞到我同細佬要即刻喺尖東飛的去大角嘴。但去到呢，竟然叫我地坐魚缸隔離加開既枱。喂，係咪咁過份呀，我唔爆你，都唔係我啦，吓話。爆完，佢就話安排安排，最後咪要等到8點先有枱。

問佢攞menu，猛推套餐，我地話唔叫，先肯拎散叫既menu俾我地，嗰張menu得個10零個小菜，其他都係啲海鮮，揀無可揀下，6個大人1個BB，叫咗5個餸加個前菜，啲嘢細碟兼難食，唉，下年都係早啲搞啦。

又講返啲開心嘢：

DAY TWO (11-01-2014) PART THREE 天晴

好啦，飲完珍珠奶茶，就向東區出發啦。

第一站去星野銅鑼燒，買咗兩個綠茶銅鑼燒，同一件類似crepe既甜品，之後就去咗糖村，無特價呀，今次，我同朋友P各買咗盒大既，都係當手信分俾啲朋友仔食下，開心吖嘛。

之後，就出發去搵間賣古董accessory既舖頭，幾年前誤打誤撞搵到既，今次憑記憶搵下啦，點知行咗個幾鐘都搵唔到，決定放棄 (後尾先發現原來喺第二邊囉，失敗~~)

嗰時都8點左右，但都係未肚餓，我就提議去信義誠品，行咗聽日唔駛專登過去嘛。哈哈，去到就不得了嘞，我最愛書店架嘛，各自行動30分鐘，我已經買咗：

仲要衰到唔夠5日已經俾我睇晒 lu，睇晒嗰一刻幾咁失落呀~~

之後就會合埋一齊，再行下啲精品咁啦。原先有諗過返去酒店附近嗰間咖啡弄食late late dinner，但check咗10點last order (嗰陣都已經9點幾)，都係趕唔切啦，唔仆返去 lu。走嗰陣經過間麵包舖，見有canele賣，都買咗個食，ok啦，都係香港間 Le Canele d'Or 最好味。

返到台北車站都10點鬆啲，但其實都唔覺餓，見到爭鮮做緊減價，每人買咗3件咁大把，跟手去咗7-11買蛋，原本仲想買啲薯片、零食嗰啲，但我個鼻已經痛到癲咗，而朋友P又攰到無咩胃口，所以剩係買咗兩包蛋同一枝茶就算。所以呢，我地個晚餐：

 茶裡王 nice nice

 cheap sushi，好味過香港喎

仲有綠茶銅鑼燒，好鬼好味架，買咗一個俾朋友S，先發覺有紅豆，佢唔食紅豆架，都留起一個俾佢先啦

 食完，啲胃口返晒嚟，但無嘢食，惟有開太陽餅

 晏晝仲買咗杯jelly，好味喎

其實仲好想食嘢，但朋友P已經攰到瞓咗，而我地間房得一張匙咭，所以我無得出去再買嘢食呀。只好乖乖的睇下電視啦，睇咗花漾爺爺，好睇個三個小生喎。睇到12點，其實都好眼瞓下，但想等埋朋友S返嚟，攞返啲鳯梨酥執埋落喼，最後等到點幾，瞓嗰陣已經2點 lu，好彩聽日唔駛早~~

話實在，第一次喺台北食咁寒酸既晚餐，但無計，鬼叫我地日頭狂食，而我又病得越來越嚴重咩，泣~~

倒數：距離北海道東京食、敗之旅仲有20日，20日咋，好緊張呀~~要快啲清晒啲感冒先得 (係呀，台北病到返嚟都未真正清晒呀，泣~~)