年尾、新年有咩食 @ 常滿、上海婆婆 & 自煮

嘩，咁就 2014 lu，老土啲都要再祝願大家身體健康同開開心心啦~~

又講 lee 幾日做過啲咩先：

29號個日，係我地拳友既新年聚，因為好想試啲拳友成日講起既雞煲 (4個入面得我一個未試過咋)，我地改咗打晏，落堂就可以去食。嗰間嘢叫常滿，喺荃灣二坡坊。我地一行6人(拳友J叫埋老公、我就叫埋朋友P) 食咗兩隻滋味雞 (小辣)、火鍋料就有：肥牛、牛柳粒、響鈴、水餃、魚皮餃、餐肉、西洋菜、皇帝菜、炸魚皮、橫喉、脆肉鯇、芋頭 x 2、粟米、腐竹，我記得好似係咁多啦，另外我地仲買咗4枝紅酒 (因為嗰度無酒牌既)。

今餐真係食到好癲，唔知點解我一打邊爐就可以食好多嘢，真係幾得人驚 (我亦覺得係lee餐令我肥咗好多)。酒唔係飲咗好多 (半支左右啦)，但足以令我 wing 咗，好彩食飽撘的士咋。lee餐我地食咗4個鐘，傾下傾下，又講下鬼古啦，又講下去泰國打拳，咩都亂傾一餐。lee餐埋單都係 $220 per head (未計酒)，我覺得抵食喎，推介。(不過呢，嗰晚我半夜4點幾熱醒咗，唔知係咪燥得滯加酒醒，覺得好口渴，咁就爬出廳飲水啦，一度飲一度諗起拳友J老公啲鬼古，拿拿臨飲完仆返入房瞓，不過都碌咗好耐先瞓得返。

31號晚，難得有得放早，又加上肥咗幾磅，就去咗拳會上咗堂，拳友J同T都有下場，我就自己食除夕大餐啦，對自己好啲，俾碗翅自己食先：

食完其實都幾飽，但朋友P幫我買咗啲齋雞粒返嚟，又有薯片喺屋企，當然我係照食啦。

1月1日，新既一年，去咗樓下間上海婆婆食，開咗一排都未試過，見有位就試下啦：

排骨擔擔麵，排骨都OK既，但個湯好稀，唔係好夠味，麻麻地啦。個涼拌皮蛋豆腐反而有驚喜，個汁好味，可以再食。個小籠包就好易穿，唔係好得囉。埋單$153，唔貴又唔平囉。

嗰日無出街，喺屋企hea住食咗好多零食呀 (仲話減肥喎)，但有樣嘢就我同朋友P幾口痕點都唔肯食，就係新買個盒 Haggen Dazs Marc de Champagne truffle。嘩，我真係無食過咁難食既 haggen dazs 雪糕，個雪糕味係藥水味，啲朱古力粒，好似啲新年啲人擺全盒好chewy嗰啲朱古力咁，無咩朱古力味，難食到我好想丟咗佢。

將相係網上搵，難食到我連係冰箱攞出嚟影相都唔想。

噚晚同今日餐lunch輪到我煮呀，日式同泰式呀：

日式係親子丼同涼拌茄子，又係跟鬼嫁食譜，有興趣去睇睇啦。泰式係打拋醬(即係香草肉碎嗰隻醬)炒豆角雞粒飯，我託拳友T上次去曼谷買架，佢當手信送俾我囉，多謝，又好好味。食飽，見超市無閂，朋友P話一齊落去買定星期五lunch既餸當散下步喎，但唔知點解買完會去咗haggen dazs囉，wakaka

冧酒提子同焦糖脆餅，係囉，LEE啲先叫做雪糕架嘛~~

倒數：距離台北趕住食之旅仲有9日 (單位數啦，但今日先入紙攞假囉，haha)
距離北海道東京食、敗之旅仲有46日