三傻遊台北 - DAY ONE (10-1-2014) PART TWO

噚日好開心呀，又有好嘢食，不過，等我寫完個遊記先講啦。

DAY ONE (10-01-2014) PART TWO 天陰至晴 

食完個餐，睇咗套半 Modern Family，就話要land嘞。落機都成12點，急急腳出境，點知多人到呢，是但揀咗一條龍排啦，好慢囉。排到差唔多到，前面嗰幾位香港女子，喺lee個時候叫咗個朋友過嚟，好，我忍你。但我又見佢地周圍望，想搵佢其他fd咁既款，我就忍唔住用"正常"聲線同P講：唔係呀，叫咗一個，仲想叫其他呀，喂，我都趕時間喎。跟住我見排我前面嗰個有啲尷尬，就無再叫其他人過嚟。

排咗 35 分鐘先過咗關，行李都出埋，就仆到出去買電話咭，因為朋友S千叮萬囑叫我地即刻買咭，因為佢會通知有無等埋我地。一出我就左轉，但我搵唔到啲電訊商喎，又話好多人，實見到，但我左望右望都見唔到。又唔見有指示，傻傻的走咗落下一層，但又只見啲巴士 counter，朋友P唯有幫我問人啦，個staff 話喺上一層。剛啱想上返去既時候，就同朋友S相遇，就由佢帶我返上去買啦。我買咗中遠，NTD300 : 3日無限上網同NTD100通話，俾個passport個staff 睇，佢填完份表，俾我簽名，然後入咭，等埋佢set up就用得。上網速度都好快，仲快我喺香港用one2free，咁平買過方便，堅抵。嗱，唔想好似我咁周圍中既話，記得一出右轉，就見到好大班人喺買咭架嘞。

買完咭，就去搭車出酒店，搭13:10班車。今次我地book咗福泰桔子-館前店，決定搭飛狗，佢話去到酒店門口吖嘛，NTD140 per pax。搭咗45分鐘左右，司機就趕晒我地落車等接駁車喎，佢口行行話6-7分鐘就到。頂，呃鬼，等咗成10分鐘左右都唔見，有個姐姐喺office走出嚟，打咗個電話問幾時到，見阿姐姐愕然咗一嘢，就同我地講話要等多10分鐘。嘩，嗰度咩都無得行，又大風，都不知幾陰功。我嗰下即刻決定以後唔會搭飛狗，好激氣呀~~

就係一個咁既地方，我上google map check先知係近行天宮既。

最後，等多10零分鐘，架專車終於嚟到，都好快咁送咗我地去酒店附近，但唔係門口喎，不過都好近既。嗱嗱聲check in，攞埋箱微熱山丘鳯梨酥 (之前係香港上網訂既)，上房放低行李，去個toilet，拆埋箱就出發嘞，但都成3點嘞。咁趕都要拆箱，係因為我地無時間去食嘢，even買嘢食，所以每人派咗一個鳯梨酥頂住先啦。

咁趕咪就係要去動物園睇佢地囉：

lee 隻係阿爸團團，剩係影到佢個pat。但唔好意思，我嚟係最想睇你個仔，所以唔再留低慢慢影/睇你。

排呀排，終於見到你嘞，圓仔。噢，你好乖乖呀，到我地排到入去既時候，你啱啱瞓醒呀，咁我地梗係狂影啦，好難得咁俾我影到張正面呀，呵呵。

你真係好得意呀，小小的，我都好想抱抱你呀。

唔知阿媽媽圓圓，係因為生完開心得滯，定抑或見風頭被搶，全程係側面跳嚟跳去，爬上爬落：

個熊貓館真係好多人睇，所以啲staff都猛趕啲人行，因為後面仲有好多人等住睇，所以我地影咗幾張相後，都乖乖的離開啦。