減肥定增肥 -- 甜品篇~~

呵呵呵，星期五朝就飛嘞，超級的期待，心已飛得遠遠啦~~

話說我咪肥咗3磅仲未搣得甩既，咁我就諗住努力啲還債啦，但做完運動又食返突，咁唔得架噃。

星期六朝起身，食咗1/3件 double choco cream cheese ring cake @ Mrs. Fields，朱古力再加cream cheese wor，聽個名就知幾肥啦。食飽就hea，唔願做運動，捱到 lunch，好想食泡菜即食麵，但諗起朝早件cake，淥咗個杯麵食就算。食完幾唔情願都開動，stepper同鄭大媽，個塾上操做到大半已經好唔想做，不過最後都捱過晒。夜晚去咗食譚仔，行街，無啦啦買咗頂帽，咁就無咗$800，下次影俾大家睇。行到差唔多9點，咖啡癮起，去咗habitu飲嘢：

嗰杯cappuccino brulee真係好好飲，件hazulnut cheese cake同朋友P share，味道麻麻~~不過好味既代價就係我嗰晚瞓唔得好呀，但真係好想飲吖嘛，由我啦，哈~~

星期日，因為噚晚食多了甜品，好乖咁出盡力咁打，做足.....咗半堂，因為堅無力做足全程，不過都盡力了，啲汗滴水咁，爽~~ 之後去咗UCC食lunch，食咗好多薯仔沙律，我知肥架，但又好想食吖嘛，嗚~~

食飽，行完銅鑼灣，陪朋友P行過灣仔近金鐘睇家品，見會經灣仔，去咗東方小祇園買咗：

芋蝦呀，食過lee間啦、八珍同埋么鳯，lee間我最鍾意，所以今年買佢呀。仲買咗$15齋鴨腎，lee間好好味架 (小t，專登影過你睇呀~~)

去到家品舖，點知無開，咁就過金鐘撘車返屋企，路過見Sift，又無啦啦買咗lee兩舊嘢：

黑嗰件係 salty caramel，好甜但又好好味，白嗰件係 toffee apple，so so la。以前好怕食cupcake，但唔知係咪人老咗，口味轉，覺得有啲cupcake都幾好味喎。仲有呢，奇就奇在我唔係太食得甜，但lee個咁甜我都覺得好味，可能佢夠濃，又有啲鹹味balance返囉。

因為太多雜食啦，我地啲齋鴨腎、cupcake、再加8粒燒賣share食當晚餐囉，唔係，我估我點做運動都還唔晒啲債囉。

倒數：距離台北趕住食之旅仲有5日 (星期五飛，都唔知叫4日定5日，呵呵~~)
距離北海道東京食、敗之旅仲有42日