喪打喪食芭提雅、曼谷之旅 2015-05-26 第四天 (天晴酷熱)

Lee 排唔係好妥，成日覺得好鬼攰，個天又黑到想塌咁，喺公司又悶到發瘟。喺咁既情況下，有咩可以救到我呢，轉工又唔見有機，咁即係迫我去轉旅行啫。哈，又好在俾我氹到有人陪我癲喎，噚日book晒嘞，日子就係 2/9 -6/9/2015，去邊呢就報時先講啦，yo!!!

2015-05-26 Day Four @ 曼谷 Part One

今朝早唔到起身嘞，因為真係好攰。9點團友門起晒身食早餐，早餐係餐蛋冬蔭公媽媽麵，係咪好正呢。因為上年團友J爸爸話想食餐蛋麵，但餐肉喺曼谷實在賣得太貴嘞，我地阻止咗佢，所以呢，今年我就帶埋罐餐肉俾佢煮俾我地食啦，哈~~~

食飽飽，我地就出發去 Starsbuck 叉電，我叫咗杯tall 既 cappuccino，幫P叫咗杯 tall 既 green tea latte，不過我估個cashier聽錯咗，俾咗杯grande/ venti佢，但又神奇地，P又飲得晒，需知道佢平時飲唔到咁多嘢架嘛，仲要之前食咗餐蛋麵……

好似香港麥記，好多人喺度歎冷氣，有個肥哥哥仲瞓得好鬼甜添。歎完咖啡，我地就出發去T21，我又係去咗3年曼谷都未去過T21，因為聽拳友J 媽媽話無咩嘢好行，似葵涌廣場，所以我地又唔會專登去。不過呢，因為今次我見鬼嫁推介 Madam Saranair，好想試，而佢又好近T21，咁我地咪順便去行下囉。唔，我覺得唔似葵涌廣場喎，似葵芳新都會多啲。我呢，其實都有嘢睇中架，就係個Starsbuck既 tumbler嘞。但佢賣得好貴呀，因為係imported啩，圍起港紙要成$400，太唔抵啦，但我真係未係香港見過lee個款囉。我唔死心，上網 check，日本賣緊 3,620 yen，即係$2xx啫，所以$400，我係唔會買既。(後續：我問咗個代購，佢報價$350，我都係覺得太貴，跟住我又試下問下S，佢未咁快去日本，但竟然幫我搵到朋友去嗰邊買，而最後只係$254咋，我真係錫晒S呀，幫我慳好多，*3*)

我買唔成嘢，就輪到拳友J夫婦同拳友E有收獲，哈，就係H & M嘞，係咪好搞笑呢。阿拳友J媽媽話佢平時唔行街，所以旅行見到啱就買，咁又係，聽佢成日話忙，都係做運動同埋約朋友食飯，好少話去行街買衫。拳友E呢，哈，擺到明就係鍾意買嘢啦。P都有試下啲帽既，我同拳友T就喺度吹吹水，無大太興趣。

買完嘢，就過去Madam Saranair，拳友H & J 都過嚟 join我地，佢地食埋嘢，就去機場搭機返香港嘞。我地又癲咗咁叫：

我剩係記得個粉絲蝦煲樣好, 但唔夠味之外, 樣樣都 above average，最抵死係食得癲飲得癲, 都好似每人 $1xx。大推！！！

報時：曼谷體驗之2人自由行2015仲有41日
哈~~係呀，5月先去完，9月又去嘞，只因為香港多咗9月3日lee 日假，拳友T又講起安運有啲曼谷package唔貴。係囉，咁就撩起咗我旅行癮囉，嗱，賴得梗係賴架啦。不過又點解2人自由行呢，其實T講完，拳友J就搵咗男朋友去，拳友H就搵咗一大班朋友去，咁我同P係日本同曼谷之間選擇，最後捨日取泰，因為去日本使費太大嘞 (無錯，我係會忍唔到手，狂買嘢既)，而且曼谷呢，我實在有太多地方無去過嘞，我都真係想去一次JJ Market，而同各團友們去既話，佢地又無咩興趣，所以我同P就諗住去一次2人行，去體驗一下囉。

不過呢，因為有一日會同拳友 J & H 叠住，所以我都約咗佢地打一場同埋食飯，始終，過到去，有啲唔打唔舒服呢。

喪打喪食芭提雅、曼谷之旅 2015-05-25 第三天 (天晴酷熱)

好眼瞓呀，因為我同 P 噚晩開咗枝 wine，一人飲咗半枝下，唔願瞓，傾偈傾到半夜兩點先瞓, 而家眼瞓到呢......

不過都介紹下，拳友J 媽媽介紹，好香番石榴味，喺 Enoteca 買既，記住要買 $210 嗰枝, 唔好買$160 嗰枝， 因為真係爭好遠架！

2015-05-25 Day Three @ 芭提雅 & 曼谷

今朝6點起身，因為要同P游水。係囉，晨咁早係因為陽光無咁勁喎，好好好，早啲游完，我又可以過隔離打拳。

咁早，計埋我地兩個，得4個人，正啦，P就扶住個欄浸下水，因為佢好怕水架。我就練下踢水咁啦，因為唔識游嘛。游咗 45 分鐘左右，就要返房沖過涼食早餐，因為要過隔離打拳嘛。

今日俾我遇返個後生仔，開心，仲打咗 5 rounds，好過噚日多多聲。

打完，攰爆，但唔好俾佢停，返去沖過涼，再戰泳池，但去泳池前，同件濕泳衣糾纏咗好耐，下次一定要帶多套，P見陽光太猛，話喺房休息好過。好開心咁亂游完，好肚餓，傻既我地再食多轉早餐。

上面嗰條人影係我嚟架, 拳友 J 就嘆緊個水泡 :-)

食完，返水又沖過涼，check out 搵晏食，因為食咗早餐，條街又熱又曬之下，走咗去隔離Tesco，原本想行下先食嘢，因為我地食多咗round早餐嘛，個實Q發傻叫我地 keep bags，但我地嗰啲係跟身袋咋喎，仲要其他客唔駛，咁算罷啦，唔鬼行。行返出去，見有food court，咁就喺度食啦，好嘢，第一次喺泰國食food court。之前成日想試，但團友們又無興趣，今次有得試啦，yeah!!!

我同P行完，揀咗牛丸河同豬手飯，Oh，好美味既豬手飯，仲要好平，平到唔記得幾錢lu，其實我都幾鍾意食food court，當然要環境要衛生啦。

食完，等車嚟接我地過曼谷，跟住就係長期戰鬥，因為我地喺架又逼又熱既車度坐咗3個幾鐘，曼谷既交通實在差得恐怖，我仲瞓到chok親條頸，勁痛。

路程係先去我地酒店放低行李，跟住車我地去national stadium附近睇拳嘢同唱錢，再送埋拳友H & J去佢地間酒店。我自己買咗個護腳，幫V買咗對拳套，因為佢話用拳館嗰啲實在太臭嘞，我明呀，我都試過借，真係臭到非筆墨可以形容。

V 揀咗黑色

買完，去唱錢，YEAH!!! 終於唱到4.3，喺芭提雅唱4.15咋。唱完，團友J爸爸熱到要買衫換，買完去食啲嘢先啦，雖然一陣去食buffet。

拳友J媽媽話想介紹我地食咖央多士，但唔記得位置，又唔得咩名，哈，剩係記得係吳君如每次到泰國都食既。各團友就按 lee 條線索上網搵啦，終於P最快搵到間嘢嗰名 Mont Nom Sod。唔，原來又真係幾好味架喎，啲麵包暖暖的，嗰醬又唔太甜~~

食完，行下 boot，又去搭 bts，去 Marriot 食buffet 呀。點解咁詭異要喺曼谷食 buffet 呢，咪因為見人喺 fb post lee 個 web，Eatigo，有discount 呀，我揀咗 8:00 pm，有 40% off呀。嘢食就無影，選擇唔算多，但水準OK，尤其係啲凍蝦，好爽好好味，埋單每人大約$170港紙，抵食啦。

我仲鬼鬼崇崇咁叫酒店安排一下，幫拳友J慶生，原本一早同個staff講好咗，我見食到咁上下時，去搵個staff時，又唔見佢，佢又無交低俾佢同事知，咁我唯有又講多一次啦。之後佢地就拎咗兩件 buffet 枱既 cheese cake，插咗枝 candle，唱住生日歌咁行埋嚟。Er……我見拳友J 猛話搞啲咁既嘢，我好似整蠱咗佢多過感動佢囉…….

食飽飽, 我地返去 apartment, 好開心今次分到套房, yeah!!! 臨瞓前，我痛到真係要向團友 J 爸爸求救, 好彩佢幫我鬆到條筋咋，唔係都唔知會痛幾耐！

喪打喪食芭提雅、曼谷之旅 2015-05-24 第二天 Part Three (天晴酷熱)

我呢，唔知點解學親嘢都係咁，無論個頭開得好唔好，學到一半都會比初學時更差，次次都會遇到迷惘期，好討厭呀，我想今年學識佢呀，得唔得呢？

近排個人好腌悶，都唔知可以做啲咩去紓緩下，解下lee個悶局呢？

2015-05-24 Day Two @ 芭提雅 Part Three

打完拳，按完摩，真係攰到無朋友，原定想去Rimpa Lapin，但大家都好攰啦，去嗰度又山長水遠喎，星期六、日又無得訂位，都驚去到無位，所以呢，我地都係決定喺返附近搵嘢食算啦。

我地按完，拳友H、J & T都未做完 Spa，咁我地就去超巿行下，睇下有咩嘢買返香港同埋買酒同嘢食今晚開 party。點解咁有興緻開 party呢？事緣上 cooking class 之前，我地影咗好多白痴相，拳友 E想 post 上 fb，想 tag 返晒啲人，咁就 add 埋拳友 H & J 啦，一 add 就發現拳友 J 原來聽日生日，我就提議今晚開個 poolside birthday party 賀一賀佢啦，嗱，我係咪好細心呢？

拳友們狂 shop 之際，我同P都好克制，係呀，我地真係無咩嘢啱買，零食又食唔到咁多，不過換轉喺日本，個情況就完全相反囉，我諗，哈。

買到鬼咁多袋後，就去搵嘢食，行晒兩條街，都無咩 idea，最後揀咗間德國嘢。

 炒雜菜係應該 x 咗 2 既

炸！！！

好嚡的牛肉沙律, 不過汁好味

烚豬手, P 最愛, 但返到酒店睇相, 豬手變咗狗頭, 驚嚇！！！

必叫的腸

大受團友喜愛既烤豬手, 我愛恰也愛烤

唔記得咩豬扒, 味道唔出色, 薯仔也比相象中無咁好食

唔知咩 rib, 唔識欣賞, 但團友們激讚蒜蓉包

我大愛的咖喱腸, 汁是喼汁溝咖喱溝茄汁, 很對味。8年前德國食過, 愛上！

唔記得咩 mocktail, 甜到叫咗支啤, 放棄咗佢。個個都有叫嘢飲, 我仲同 P share 咗個洋葱湯

叫咗咁多嘢食，係咪好驚嚇呢，不過最驚都係，埋單每人先港幣百幾蚊，真係好抵食。食飽飽，行過見有 gelato 買，樣幾好，唔似會肚痛，買咗杯同 P share，雜莓味，清新好味，不過其他團友零興趣。

返到酒店，放低啲嘢，抖抖，大概10點，就出去開我地個 poolside party，哈哈，不過 lee 個party 係黑暗中進行既，因為泳池9點就收工，池邊好少燈咋，但我地有酒啦，零食啦，咩都傾一餐之下，到咗11 點，就同拳友J 講 happy birthday，點解11點呢，係因為我地實在太攰啦，而泰國又慢香港一個鐘，咁即係香港已經到12點啦，咁咪啱數囉。

開完個 poolside，快趣返房沖涼瞓覺，因為聽朝晨咁早又要起身嘞~~~

喪打喪食芭提雅、曼谷之旅 2015-05-24 第二天 (天晴酷熱)

近嚟好多事發生，都唔太知自己做緊咩，唔係忙，只係太多事發生啫。都要用啲時間整頓下，希望個人可以定返啲先得。

2015-05-24 Day Two @ 芭提雅 Part Two

回程途中，拳友H中途落車要去Big C買嘢喎，佢話一定要買既緊要嘢，咁我地中途放低咗佢之後，就返酒店抖下，就去我地既重頭節目 – 打泰拳嘞，唔知點解每次話俾人聽都好似好surprised 咁，難道我真係咁唔似會去打拳既？唓，其實都係興趣班啫嘛，又唔係比賽，真係咁難以置信咩，哈。

我地hea到2點幾，換好晒衫，就行過去Fairtex，5 分鐘路程左右啦。出發前，我地都有問拳友H究竟買咩咁緊要，佢有啲遲疑咁答咗我地，wakaka，真係估唔到既答案，我地因為lee樣嘢笑咗好耐，係咩就唔講嘞，但我堅覺得拳友H好可愛囉，哈哈﹗

行到Fairtex，黑掹掹咁，仲以為無開添，但見佢度門開咗，又望到入面有人，就入去啦。因為上次拳友J媽媽有打過，我地就跟佢直接入拳館啦，點知埋到去，佢話要收ticket，原來要去reception desk 買咗 ticket 先既。唔，我覺得我地香港人真係好心急囉，因為我地真心覺得佢寫6張 tickets 寫咗好耐，而要填既嘢只係拳友H嗰名同埋日期，但6張寫咗5分鐘。

好啦，交咗 tickets 俾師傅，我地就綁手帶，拳友J媽媽得到某位師傅既青睞，幫佢綁手帶，但我唔羡慕喎，因為阿師傅呢，佢有腳趾夾位條手帶，令條手帶無咁縐，errr，我真係接受唔到囉。綁好晒手帶，就熱身啦，都係跳繩，拉下筋咁啦。跟住就等啲師傅執我地嘞，我跟住個後生既，都幾好打，係慢啲同routine啲，但都ok既，而我係同拳友J媽媽同拳友E一個Ring既。

Lee 個係第一 round,  後生師傅。肥嘟嘟嗰個係我 (不過而家瘦返少少, 同埋 Lee round 打得唔太好)

點知到第二round，有個老啲既師傅叫咗我個隔離Ring，同Ring有兩個鬼佬，打到嘭嘭聲嗰啲呢，個師傅話後生果個今晚有比賽，而家要收工，叫我同佢打，咁都無辦法啦，照打囉。點知呢，佢成日襲擊我，打我肚腩同個頭都算，唔好下下攬過嚟得唔得，我明埋身係其中一項，但我都係興趣班 level，開心下啫，唔好用咁大汗既身體黏埋嚟，ok？雖然我有表達不滿，有時行鬼咗去，但佢嗰3 round都有攬埋嚟囉，雖然我知道佢一定唔係搏懵，我真係接受唔到囉，怒~~~

終於捱完嗰3 round，做埋cool down就走得。雖然我滿腔怒火，但行到出去，有拳嘢賣，我都有入去shopping，我買咗3條手帶，有1條係送俾朋友V既，佢好鍾意喎，開心。不過事後，朋友P話我地知，我地6個原來好臭架，佢一齊入咗間shop (超細既shop，250 呎唔知有無)，話越聞越強烈，所以行咗去角落，避開我地喎，哈哈，唔怪得啲staff唔想啋我地啦。(不過我真係唔覺得因為我地臭，佢先唔理我地囉，佢地堅係有性格架，hea 下 hea 下咁架)

送俾 V 的小禮物

返到酒店，沖個涼，就去咗做 thai massage，去咗 Savana，唔，我同拳友E覺得按得麻麻地，唔及上次 Body Tune 按得咁好，而朋友P就係初體驗，佢話除咗佢壓住佢個肺，佢以為會抖唔到氣之外，都唔係太難受喎，哈，佢真係好正。

喪打喪食芭提雅、曼谷之旅 2015-05-24 第二天 (天晴酷熱)

偷懶咗好多日添，原本仲應承咗人會勤力啲 (心虛中)。近期有新嘢玩，我學游水呀，星期二係第一堂，噚晚就去咗練習，不過唔知點解呢，噚晚游得比星期二差，有啲挫敗添，希望下星期二上堂唔會咁啦。

上次搭飛機睇咗一集三時三餐 漁村篇，又幾好睇喎，而家晚晚返去追，好忙呀，哈!!!

2015-05-24 Day Two @ 芭提雅 Part One

上次喺曼谷上過個 cooking class Sompong Thai Cooking School，覺得好好玩。今次去芭提雅，又搵下啲class上吓啦，等啲唔打拳既團友有啲嘢玩下，上咗 Trip Advisor搵咗間評價第一位既：Happy Home Thai Cooking School，佢話每人可以喺佢個 menu 揀4款dishes，咁我地8個人，就揀8款啦。上網報咗名之後，會有e-mail confirm，因為我地有8個人，可以有10% discount，cooking class fee = 1,250 baht + pick up fee = 50 baht，discount後每人1,170 baht，我收到佢既confirmation後，覆咗佢地我地揀咗啲咩dishes，佢就覆返我話嗰日同個chef講。

好啦，佢話個chef會係8:30-8:45 喺酒店lobby pick up我地，咁我地就一早去食早餐，唔，啲嘢食 ok 啦，真係唔可以話好食，但又唔難食囉。最好食係個奄列，最好玩係個hotcake機，哈哈。

8:45 見個chef到咗，我上前相認後，佢叫我地上架 tuk tuk，個50 baht 包pick up 同埋market visit既。搭車途中，見有 money exchange，但 rate唔係幾好，得4.15，(團友H & J醒，喺機場Super Rich兌咗錢，rate極靚，有4.3，我地到埗，有問過佢地個rate，但我地上咗車，先收到佢回覆，而我地見落咗機都晏，而身上又有啲錢，所以就無去兌，直接去搭車去芭提雅。但原來俾埋車費、食完餐飯，我地幾個都無錢嘞~~~)，所以都心郁想兌錢。過咗擋exchange，大約5 mins 就到咗間cooking school。errr......同曼谷嗰間，啲設施爭太遠嘞，無冷氣唔奇，但爐頭得5個，曼谷嗰間係一人一個架嘛，已經覺得有啲唔對路。到阿chef問我煮啲咩，我答佢揀咗8個dishes，開返個e-mail佢睇，佢又老花，咁我講俾佢聽，佢又唔用紙寫低，聽完，佢話自己去買餸，咦，我地extra俾50 baht，唔係包market visit既咩。我問佢，佢就問返我，你地想去咩，咁啲團友見咁熱，都話唔去嘞，佢就自己開架綿羊仔去買餸。頭先咪話見有檔 money exchange既，團友J媽媽同J爸爸就話想兌錢，佢地出去睇下喎。咁我地6個就留喺間cooking school啦，無所事事，咁玩咩呢，又係玩自拍既時候，哈哈，影咗好多低能相呢。有我fb既朋友應該會見到啦，好開心呀，但又好悲慘的，原來lee part已經係我地喺lee度最開心既moment……

Chef 買完餸返嚟，做咗啲準備，就話上堂嘞，我地答佢話等埋J媽媽同J爸爸先。等到佢地返嚟，Chef就叫我地分兩組，一組人煮青咖喱雞，另一組人就煮咖喱麵。

我同P都揀咗咖喱麵，同J媽媽 & J爸爸一組。因為我地張枱好細，阿chef拎出咗一個爐頭，我地嗰組就返得一個爐，其實個麵幾得意既，一半係淥，一半係炸，我唔知係lee度留留地定點，阿chef成日唔係滾油炸嘢架喎，但炸出嚟又唔係成口油，脆但又唔係好夠脆咁既texture。

Anyway，我地既成品：

另一組的青咖喱：

兩款都又唔係好食，但又唔難食既，總係有啲溫吞吞既感覺咁囉。

跟住兩組都係煮冬蔭公，又係切下，佢講落啲咩，我地就跟咁囉，其實都係用冬蔭公醬加椰奶咁囉，又無話用蝦頭煲個湯喎，煮出嚟，水汪汪咁~~~

再嚟就係炒 pad thai，lee 個真係算罷啦，食咗兩啖，算~~

跟住就整青木瓜沙律，lee個無理由難食卦。

再嚟就係豬頸肉沙律，其實我係order咗碎豬肉沙律同炭燒豬頸肉既，唔知點解佢幫我變咗豬頸肉法律，佢就話你想change，唉，講俾佢聽嗰陣又唔寫低，算數啦，因為大家都好想快啲撇，一路煮，一路話是但啦，都唔食架啦，快啲煮好，因為咁，我都唔想同佢糾纒。但我好懷疑嗰啲唔係豬頸肉囉，嚡到呢，不過個味都ok既。

阿chef話lee個係last dishes，我話爭咗個mango sticky rice喎，佢話有講咩，我話有呀，跟住佢嗱嗱臨去買現成芒果同糯米，叫我地切咗個芒果，再撈埋啲糯米飯同椰漿就算，嘩，好求其，同喺曼谷煮嗰個真係爭好遠。曼谷個靚miss煮嗰個係我食過最好味架。

快快食完, 叫佢幫我地搵車, 坐返頭先架 tuk tuk, 今程收 200 baht. 唯一覺得佢好服務既係中途幫我地去買椰青同埋可樂囉, 不過極不推介去 lee 間 cooking school。仲有團友話返到去, 采唔舒服, 唉......

睇返曼谷煮嗰啲:

想試 cooking class, 去曼谷嗰間啦, pro 勁多, 好玩好多, 都係1,000 baht,  真係帶埋你去街市, 真心覺得正, 仲有冷氣。

喪打喪食芭提雅、曼谷之旅 2015-05-23 第一天 Part 2 (天晴酷熱)

前晚同 P 喺樓下太興食晚飯，食咗高卡既星洲炒米、柚子蜜桃豬扒 (個味其實係西檸雞)，真係想唔肥都難。見自己咁既身世，返到屋企 hea咗陣，都乖乖咁跳咗part 鄭大媽，希望幫到下啦。

噚晚就約咗朋友S食日式邊爐喎，佢有問我要唔要減肥，唉，睇怕減肥lee家嘢都纏住我一世架嘞，食咗先囉，之後還返囉唯有。

2015-05-23 Day One @ 芭提雅 Part TWO

架車係由拳友T book既，司機會喺gate 3等。咦，未行到就見到有個牌寫住拳友T個名& family喎，但我覺得怪怪地，因為個牌寫住咩咩 residence，但同行既團友們已經湧咗埋去，個司機哥哥見我地咁多人，有啲窒窒地，同我地講three person喎，哈哈，搞錯晒啦我地，唔係接我地架。繼續行去gate 3，終於見到對couple拎住個牌寫住拳友T個名呀，今次啱嘞，即刻衝埋去相認啦。佢地好nice呀，個笑容無得頂，一相認就幫我地推行李車，帶我地去停車場。途中，我地見到7-11同family mart，因為太口渴，即話要買嘢飲，嗱，我lee啲衰嘢，梗係話入family mart啦，香港無吖嘛，同埋仲要少人好多，其實喺隔離咋嘛，唔明點解啲人湧晒入7-11呢。

買完嘢飲，繼續行，原來個停車場幾遠，經過food court，再行咗一陣，出咗室外，嘩，熱到呢，又好好陽光。跟住搭lift，終於搵到架車 (哈哈，好搞笑，司機開頭唔認得架車，係阿女朋友認得咋)。架車應該坐到10個人，而我地連埋司機佢地都係得8個，所以都坐得幾舒適下，係冷氣有啲唔夠，不過又不足以令我流汗既。其實司機手車都幾快，個幾鐘就到芭提雅嘞，但唔知係咪泰國啲路麻麻地，架車有啲 chok ，好彩我唔係好易暈車浪，仲可以打住機咁捱咗lee個幾鐘車程。

嗱，真係幾闊落下架，你地睇拳友E幾嘆，哈﹗

今次住 Thai Garden Resort，揀lee間係因為佢好近我地想去嗰間拳館：Fairtex，5分鐘左右腳程，樣唔衰，個泳池仲幾靚幾大，價錢ok啦，計埋稅一人每晚大概HK$255，包早餐。我地會住兩晚，跟住就過返曼谷。不過，唔知係咪而家lee份工做到人傻下傻下，我去咁多次旅行都係第一次唔記得print hotel voucher，雖然話拎passport check in就ok，但我都係慣咗有張voucher ，好似有安全感啲。所以呢，我都開定個e-mail，in case佢地搵唔到record，可以俾佢地睇返。

入到房，都幾大，不過好搞笑係得過睡房有冷氣，有度門分開咗既浴室同埋衣帽間呢，就無冷氣到架，沖涼或者去 toilet都幾熱下，仲有仲有, 如果揀 Lee 間 resort, 最好自己帶 shampoo & shower gel, 因為佢得一個入咗牆既 case 載住啲粉紅色既梘液, for shampoo & shower wor 。啲傢俬舊，不過張床就ok好瞓。我地到房就問下拳友J & H住邊間房，佢答我地係4026，我地覺得有啲怪，因為我地間Resort係分A、B、C同D座，我地分別住D23、D24同D25，跟住我八八卦卦望下跟匙卡個套，寫住個wifi code係4025。哦，咁我明啦，佢地其實係住D26，即係我地隔離。當我估到既同時，拳友J & H就whatsapp我地話係D26，wakaka~~~ 無諗過酒店又識安排我地住隔離喎，因為佢地間房thru travel agent訂既，我地個3間就係 thru agoda訂既。

我地8個會合後，傾咗幾句，各自返房整理一下，就出街搵食，原本我搵咗兩間餐廳想試既，諗住拳友J & H早啲到，拜託咗佢地叫酒店訂位，但原來兩間weekend都無得訂位既，咁唯有walk in la。我地今晚揀咗lee一間: Mum Aroi Naklua，因為近酒店啲，google map話大概15分鐘車程，另一間要30分鐘車程。我地問酒店可唔可以幫我地叫車，佢就幫我地搵咗酒店架van，來回收500 baht，我地8個人都抵既，司機預我地2個鐘食飯。

一去到，堅多人，仲要係無冷氣，噢~~~~ 但等咗10分鐘都無，又好似聽到個staff 叫拳友H個名，但又唔肯定，我就話都埋去問佢啦，原來真係叫緊佢個名。個staff寫咗個枱號俾我地，但我地完全唔知喺邊，一路行，一路問啲staff，原來係上一層嗰啲有冷氣既VIP房。Lee間嘢既賣點係對住個海灘，但如果要對海，就坐樓下嗰啲枱，喺咁熱，勁多烏蠅同望出過海灘黑掹掹既情況下，坐VIP房好似好啲，我地望既境係停車場加一個好大既廚房。

叫咗既嘢食：

食飽飽，先至係9點左右，拳友H話想去行BIG C，但佢本旅遊書標示既係BIG G，咁其實係冒牌既BIG C定係有間嘢叫BIG G，又定係旅遊書印錯呢？問咗司機，佢話BIG C，OKOK，咁就車咗我地去啦。其實BIG C就喺酒店轉個彎，車程多4分鐘左右啦。落到車，佢話要我地加多100 baht，仲以為佢咁好，等我地shopping完，車我地返酒店，原來佢話兜咗過嚟，要收多100 baht，我就覺得有啲貴囉，車我地去餐廳來回加埋等2個鐘先收500 baht，咁兜一兜過嚟要100 baht又真係貴咗啲，因為佢原本都要車我地返酒店架啦，我地都無入酒店，兜咗個彎過嚟咋喎。唉，不過算啦，去玩都係想開心啫，唔係多錢就俾啦。

我同 P 最後買咗菠蘿餅, shampoo， shower gel, 魷魚, 通鼻棒, 同埋 P 想試既 Madam Heng 番梘就收手嘞, 不過其他團友就買咗好多嘢。回程時, 有架 tuk tuk 問我地去邊, 答佢返酒店, 閎我地 120 baht, 都無講價就上啦。

返到去, 各自返房, 沖涼瞓覺, 因為聽日一早出發 cooking class!!!!